Last updated on August 18th, 2022 at 09:23 am
ಮುಲ್ಕಿ ಒರುಂಬ ಮಾಗಣೆದ ಜಾಗೆ ಜಾಗೆ ಚಾಕಿರಿದಕ್ಲೆನ ಗುರ್ಕಾರ್ಲೆನ ಸಭೆಟ್ ಒಂಜಿ ಮಲ್ಲ ನಿರ್ಣಯ ಆಂಡ್. ನನ ಮುಲ್ಕಿ ಒರುಂಬ ಮಾಗಣೆದ ಒವ್ವೇ ದೈವಸ್ಥಾನೊಲೆನ ಲೆಪ್ಪೋಲೆಡ್-ಬ್ಯಾನರ್ ಡ್, ದೈವದ ಪಟ, ನೇಮ ಕಟ್ಟುನಕ್ಲೆನ ಪಟ, ಕೊಡಿಯಡಿ, ಗಗ್ಗರದ ಪಟಕುಲೆನ್ ಪಾಡ್ಯರೆ ಬಲ್ಲಿ ಪಂದ್ ಆಂಡ್.
ಅಜೆ ತತ್ತೊಂದು ಪೋವೊಂದುಪ್ಪುನ ದೈವಾರಾಧನೆಗ್ ಶಿಸ್ತು ಕನೊಡು ಪನ್ದ್ ಪೆರಿಯಾಕುಲು ಸೇರ್ದ್ ನಿರ್ಣಯೊ ಮಲ್ತೆರ್.
ಕೆಲವು ನಿರ್ಣಯೊಲು :
• ರಾಜನ್ ದೈವದ ಗಡಿ ಆತಿನಕುಲು, ಕುಟುಮದ ದೈವೊಲೆನ ಚಾಕಿರಿ ಮಲ್ಪರೆ ಬಲ್ಲಿ. ದರ್ಶನ, ಮೈಯಾರೆ ಬನ್ನಗ ಅರೆನ್ ಪತ್ತುನಕುಲು ಪ್ಯಾಂಟ್ ಶರ್ಟ್ ಪಾಡರೆ ಬಲ್ಲಿ, ಮುಂಡು ತುತ್ತೊಡು. ಪೂಜನೆಗ್ ಗುಡ್ಡೆ ಕೇಪುಲೊನೇ ಗಲಸೊಡು. ಗಂಧೊಲೆನ್ ಸಾನೊಡೇ ಮಲ್ಪೊಡು, ಕೆಮಿಕಲ್ ಪಾಡಿನೆನ್ ಗಲಸರೆ ಬಲ್ಲಿ.
• ರಾಜನ್ ದೈವೊಲೆನ ಮನೆ ಮಂಚ, ಮೊಗ ಮೂರ್ತಿಲೆನ್ ಚಾಕ್ರಿದಕುಲು ಅತ್ತಂದೆ ಬೇತೆ ಏರ್ಲಾ ಮುಟ್ಟರೆ ಬಲ್ಲಿ. ಗ್ರಾಮೊಡು ಗಡಿ ಆತಿನ ಚಾಕ್ರಿದಕುಲು ಇಜ್ಜೆರ್ಡ ಬರಿತ ಗ್ರಾಮೊರ್ದು ಲೆತೊಂದು ಬತ್ತ್ ಮಲ್ಪಾವೊಲಿ.
• ಮೊಗ ಮೂರ್ತಿಲೆನ್ ಚಾಕ್ರಿದಕುಲೇ ದೆಕ್ಕೊಡು, ಬಾಕಿದ ಬಂಡಾರೊಲೆನ್ ಬೇತಕುಲು ದೆಕ್ಕೊಲಿ.
• ಬಂಡಾರ ಜಪ್ಪುನಗ ದೈವದ ಮೊಗ ಮೂರ್ತಿಲೆನ್ ಚಾಕ್ರಿದಕುಲೇ ಪತ್ತೊಡು. ಬಾಕಿದೆನ್ ಸುದ್ದೊಡುಪ್ಪುನಕುಲು ಪತ್ತೊಲಿ.
• ನೇಮ ಆನಗ ಬಂಡಿ ಸವಾರಿ ಪುಲ್ಯ ಕಾಂಡೆನೇ ಮಲ್ಪೊಡು, ವಾ ವಾ ಪೊರ್ತುಡು ಅತ್ತ್.
• ಬಟ್ಟಲ್ದ ಗಂಧೊನು ಜಾಗೆ ಜಾಗೆದ ಲೆಪ್ಪುದಕಲೆಗ್ ಮಾತ್ರ ಕೊರೊಡು.
• ಜಾಗೆ ಜಾಗೆದಕುಲು, ಗಡಿ ಆತಿನಕುಲು ನೇಮದಪಗ ತರೆಕ್ ಮುಂಡಾಸ್ ಕಟ್ಟೊಡು
• ನೇಮೊಡು ಬೀರ ಪನೊಡೇ. ದೈವದ ಪಾತ್ರಿ, ಜೀಟಿಗೆ, ಬೊಲ್ಕುಡೆ, ನೇಮ ಕಟ್ಟುನಕುಲು ಗ್ರಾಮೊದ ಅಜಲ್ದಕಲೆಗ್ ಕೊರೊಡು.
• ಚಾಕ್ರಿದಕಲೆಗ್ ಅಮೆ ಕರ ಸೂತಕ ಆಂಡ, ಆಯಾಯ ಊರುದ ಕಟ್ಟ್ ಲೆಕ ಮಲ್ತೊಂದು ಬರೊಡು.
