Last updated on August 31st, 2022 at 09:15 am
ಪ್ರಧಾನ ಮಂತ್ರಿ ನರೇಂದ್ರ ಮೋದಿಯೆರ್ ಸೆಪ್ಟೆಂಬರ್ 2 ಕ್ ಕುಡ್ಲಗ್ ಬರ್ಪುನೆಕ್ ದುಂಬು, ಕೂಳೂರ್‌ಡ್ ಗುಡ್ಚಿಲ್‌ಡ್ ಕುಲ್ಲ್‌ದಿತ್ತಿ 30 ರ್ದ್‌ಲಾ ಎಚ್ಚ ಜನೊನು ಭದ್ರತಾ ಲೆಕ್ಕಾಚಾರೊದ ಪಿರ್ಕಾರ ಅಡಿಲಕ್ಕಾದೆರ್. ಮುಟ್ಟ ಮುಟ್ಟ ಒರ್ಂಬ ಕುಟುಮೊಲು ಜೋಕುಲು ಬಾಲೆಲೆ ಒಟ್ಟುಗು ಗುಡ್ಚಿಲ್‌ಲೆಡ್ ಬದ್‌ಕೊಂದಿತ್ತೆರ್.
ಮೊಕುಲು ನಿಲೆ ಆದಿತ್ತಿ ಜಾಗ್ ಮೋದಿಯೆರ್ ಭಾಷಣ ಮನ್ಪೆರೆಗುಪ್ಪುನ ಗೋಲ್ಡ‌ಫಿಂಚ್ ಸಿಟಿರ್ದ್ ಕಾಲಿ ಒಂಜಿ ಕಿಲೋಮೀಟರ್ ದಾತ್ ದೂರ ಉಂಡು. ಪ್ರಧಾನಿಲು ಎಂಆರ್‌ಪಿ‌ಎಲ್ ಬೊಕ್ಕ ಎನ್‌ಎಮ್‌ಪಿ‌ಟಿಡ್ ಪೊಸ ಯೋಜನೆಲೆಗ್ ಕಲ್ಲ್ ಪಾಡ್ದ್, ಆತಿನ ಯೋಜನೆಲೆನ ಲೋಕಾರ್ಪಣೆ ಮನ್ಪೆರೆಗುಲ್ಲೆರ್.
ಈ ಜನೊಕ್ಲೆನ್ ಭದ್ರತಾ ದೃಷ್ಟಿರ್ದ್ ಮುಲ್ಪರ್ದ್ ಲಕ್ಕಾವೊಂದುಲ್ಲ. ಅಕಲೆಗ್ ಇತ್ತೆಗ್ ಇತ್ತೊನರ ಬೇತೆ ವ್ಯವಸ್ಥೆ ಮಲ್ತ್‌ದ ಪಂದ್ ಜಿಲ್ಲಾಧಿಕಾರಿ ಡಾ. ರಾಜೇಂದ್ರ ಕೆ ವಿ ಪಂಡೆರ್. ಕಾರ್ಪೋರೇಟರ್ ಕಿರಣೆರ್ನ ಬೆರಿಸಾಯೊಡು ಮೊಕ್ಲೆಗ್ ಕುಡ್ಲ ಸಿಟಿ ಕಾರ್ಪೋರೇಷನ್‌ಡ್ ಒರಿಯೊನರ ವ್ಯವಸ್ಥೆ ಆತ್ಂಡ್ಂದ್ಲಾ ಆರ್ ಪಂಡೆರ್.
ಈ ಜಾಗೆಗ್ ಬೇಟಿ ಕೊರ್ನ ತಹಶೀಲ್ದಾರ್ ಬೊಕ್ಕ ಕಾರ್ಮಿಕ ಇಲಾಖೆದ ಅಧಿಕಾರಿಲು ಈ ಜನೊಕುಲು ಶಾಶ್ವತವಾದ್ ಉಂತುನಕ್ಲುಂದ್ ಆಂಡ ಅಕಲೆಗ್ ಶಾಶ್ವತವಾದ್ ಇತ್ತೊನರ ವ್ಯವಸ್ಥೆಲಾ ಮನ್ಪಾವ ಪಂಡೆರ್. ನೆಟ್ಟ್ ಎಚ್ಚಿನಕುಲು ಆಂಧ್ರದಕುಲು, ಸುತ್ತ ಮುತ್ತ ಎಲ್ಯೆಲ್ಯ ಬೇಲೆ ಮಲ್ತ್ ಬಂಜಿದಿಂಜಾವೊಂದುಲ್ಲೆರ್.