Last updated on August 25th, 2022 at 08:48 pm
ತುಳುವೆರ್ ಪಂಡ ಮಲ್ಪ ಇಪ್ಪುನ ಹಿಂದೂಲು ಮಾತ್ರ ಅತ್ತ್. ಬ್ಯಾರಿ, ಪೊರ್ಬುಲಾ ತುಳುತನೇ ಪ್ರತಿಕಲ್ಪನೆ, ಅಕುಲ್ಲಾ ತುಳುವೆರ್. ತುಳು ಕಾಲಿ ಬಾಸೆ ಅತ್ತ್, ಬಂಧುತ್ವದ ಪಣೆ ಪಂದ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಗುರ್ಕಾರ್ಲು ಪಂಡೆರ್.
ಪುತ್ತೂರ್‌ದ ಸಂತ ಫಿಲೋಮಿನಾ ಕಾಲೇಜಿದ ಫೀಲೋ ಬೊಳ್ಳಿ ತುಳು ಸಂಘ ಬೊಕ್ಕ ಮಾನವಿಕಾ ಸಂಘೊದ ಮುತಾಲಿಕೆಡ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಬೊಕ್ಕ ಜೈ ತುಲುನಾಡ್ (ರಿ.) ಸಂಘೊದ ಸೇರಿಗೆಡ್ ನಡತಿನ ತುಳು ತುಲಿಪು ಕಾರ್ಯಕ್ರಮೊಡ್ ಬಲೆ ತುಳು ಲಿಪಿ ಕಲ್ಪುಗ ಕಜ್ಜಕೊಟ್ಯನ್ ಆಗಸ್ಟ್ 25ಕ್ ಕಾಲೇಜ್‌ದ ಪಿ.ಜಿ.ಸೆಮಿನಾರ್ ಹಾಲ್‌ಡ್ ಉದಿಪನ ಮಲ್ತ್‌ದ್ ಆರ್ ಪಾತೆರ್ಯೆರ್.
ತುಳು ಕಾಲಿ ಒಂಜಿ ಬಾಸೆ ಅತ್ತ್, ಅವ್ವು ನಮ್ಮ ಸಂಸ್ಕೃತಿ, ಅವ್ವು ನಮ್ಮ ಉಸುಲು. ಈ ಮಣ್ಣ್‌ಡ್ ಬೇತೆ ಬೇತೆ ಧರ್ಮೊಲು ಒಂಜಾದಿಪ್ಪೆರ ಕಾರಣೊನೇ ತುಳು. ನಮ್ಮ ನಾಮಾಸ್‌ರ್ದಾವರ ತುಳು ಇನಿ ಮೂಡ್ಯೆ ಸೇರೊಂದುಡುಂದ್ ಪಂಡ್‌ದ್ ಅಕಾಡೆಮಿರ್ದ್ ತುಳುತ ಬುಲೆಚ್ಚಿಲ್‌ಗ್ ನಡತೊಂದುಪ್ಪುನ ಪಾಡ್ದನ ಸಂಗ್ರಹ, ಯುನಿಕೋಡ್ ಬಿನ್ನಪದ ಬಗ್ಗೆಲಾ ಪಂಡೆರ್.
ಬೊಕ್ಕ ಪಾತೆರ್ನ ಅಕಾಡೆಮಿ ಪದುಕೆರ್ ಡಾ. ಆಕಾಶ್‌ರಾಜ್ ಜೈನ್ ತುಳುನಾಡ್‌ದ ಪರತಿರಿ ಅಂಚೆನೇ ತುಳು ಲಿಪಿತ ಪರತಿರಿನ್ ತೆರಿಪಾಯೆರ್. ತುಳು ಲಿಪಿಟ್ ಪುಜ್ಯೊ(ಸೊನ್ನೆ) ಇಜ್ಜಂದಿನೆರ್ದಾವರ ಸೊನ್ನೆನ್ ಬರೆಯೆರ ಸುರು ಮನ್ಪುನೆಕ್ ದುಂಬೇ ತುಳುಲಿಪಿ ಇತ್ತ್ಂಡ್ಂದ್ ಆರ್ ಪಂಡೆರ್. ಕುಡ್ಲ ವಿವಿದ ಸಿಂಡಿಕೇಟ್ ಪದುಕೆರಾದಿತ್ತಿನ ಎಸ್ ಆರ್ ಹರೀಶ್ ಆಚಾರ್ಯೆರ್ ಪಾತೆರ್ದ್ ತುಳು ಪಿರವು ಒರಿದಿಜಿ, ನಮ ಅವೆನ್ ಪಿರವು ಪಾಡ್ದ. ನನ ತುಳುನ್ ಎದುರು ಕನಪುನ ಕಜ್ಜೊಡು ವಿದ್ಯಾರ್ಥಿಲೆ ಪಾಲ್ ಬಾರಿ ಮಲ್ಲವು ಪಂದ್ ಪಂಡೆರ್.
ಲೇಸ್‌ದ ಗುರ್ಕಾರ್ರ್ ಪ್ರಿನ್ಸಿಪಾಲ್ ರೆ.ಡಾ. ಆಂಟನಿ ಪ್ರಕಾಶ್ ಮೊಂತೆರೋ ತುಳುಟು ಮತಧರ್ಮೊಲೆನ ಬೇಲಿ ಇಜ್ಜಿ. ತನ್ನ ಬಾಸೆ, ಮಣ್ಣ್‌ದ ಮಿತ್ತ್ ಮೋಕೆದಾಂತಿನಾಯೆ ಸುಸಂಸ್ಕೃತೆ ಆಪುಜೆ ಪಂದ್ ಪಂಡೆರ್. ಮಾನವಿಕ ಸಂಘೊದ ಪ್ರೊ. ಸುಬೈರ್ ತುಳುಬಾಸೆದ ಪೊರ್ಲುದ ಬಗ್ಗೆ ರಡ್ಡ್ ಪಾತೆರ ಪಾತೆರ್ಯೆರ್. ಲೇಸ್‌‌ಗ್ ಬತ್ತಿ ಬಿನ್ನೆರೆನ್ ಫಿಲೋ ಬೊಳ್ಳಿ ಕೂಟದ ಗುರ್ಕಾರ್ದಿ ದೀಪಿಕಾ ಸನಿಲ್ ಎದುಕೊಂಡೆರ್. ಕಲ್ಪಾದಿಲಾಯಿನ ಪ್ರಶಾಂತ್ ರೈ, ಡಾ. ನೋರ್ಬಟ್ ಮಸ್ಕರೇನಸ್ ಒತ್ತುಪಾಲ್‌ಡಿತ್ತೆರ್.
ಲೇಸ್‌ದ ಅಕೇರಿಡ್ ಜೈ ತುಲುನಾಡ್ ಸಂಘೊದ ಜಗದೀಶ ಗೌಡ ಕಲ್ಕಳ, ನಿಶ್ಚಿತ್ ಜಿ ರಾಮಕುಂಜ, ಪೃಥ್ವಿ ತುಲುವೆ ತುಲು ಲಿಪಿ ಕಾರ್ಯಾಗಾರ ನಡಪಾದ್ ಕೊರ್ಯೆರ್.