Last updated on August 30th, 2022 at 10:10 am
1) ತುಳುಕು ದಾಯೆಗ್ ಮಾನ್ಯತೆ ಬೋಡು?
ಇತ್ತೆದ ಆಧುನಿಕ ಕಾಲೊಡು ಬಾಸೆ ಒರಿದ್ ನನ ದುಂಬುದ ಜನಮಾನಿಲೆಗ್ ಪೋವೊಡಾಂಡ ಆ ಬಾಸೆಡ್ ದಿಂಜ ಬೆನ್ನಿಲಾವೊಡು. ಬಾಸೆ ಒರಿಯೊಡಾಂಡ ಆ ಬಾಸೆ ಆಡಳಿತ, ಶಿಕ್ಷಣ, ಬೇರ ಬೊಕ್ಕ ಮನರಂಜನೆಡ್ ಬರೊಡು. ತುಳು ಬಾಸೆದ ಬುಲೆಚ್ಚಿಲ್, ಸಂಶೋಧನೆ, ಕಜ್ಜಕೂಟೊಲೆಗ್ ರಾಜ್ಯಾಶ್ರಯ ಬೋಡು. ತುಳುವಪ್ಪೆ ಜೋಕುಲು ತುಳುಟೇ ಕಲ್ಪುಲೆಕ್ಕಾವೊಡು. ಈತ್ ಮಾತ ಆವೊಡಾಂಡ ತುಳುಕು ರಾಜ್ಯ ಬೊಕ್ಕ ರಾಷ್ಟ್ರ ಮಾನ್ಯತೆ ಬೋಡು.
2) ರಾಜ್ಯದ ಅಧಿಕೃತ ಬಾಸೆ ಪಂಡ ದಾದ?
ಒಂಜಿ ರಾಜ್ಯೊಡು ಪಾತೆರುನ, ಆ ನೆಲತ ಬಾಸೆನ್ ಆ ರಾಜ್ಯೊದ ಸರಕಾರ, ಆಡಳಿತ, ಶಿಕ್ಷಣೊಡು ಗಲಸ್‌ದ್ ಅವೆಕೊಂಜಿ ಮಾನ್ಯತೆ ಕೊರ್ಪಿನೆಕ್ಕ್ ರಾಜ್ಯದ ಅಧಿಕೃತ ಬಾಸೆದ ಮಾನಾದಿಗೆ ಪನ್ಪೆರ್.
3) ಸಂವಿಧಾನೊದ 8ನೇ ಪರಿಚ್ಛೇದ ಪಂಡ ದಾದ?
ಉಂದು ನಮ್ಮ ಭಾರತ ದೇಸೊದ ಸಂವಿಧಾನೊಗ ಒಂಜಿ ಭಾಗೊ. ಈ ಭಾಗೊಡು ನಮ್ಮ ದೇಶೊದ ಬಾಸೆಲೆಗ್ ಸಂವಿಧಾನೊಡು ಬೊಕ್ಕ ಕೇಂದ್ರ ಸರಕಾರೊಡು ಮಾನ್ಯತೆ ತಿಕ್ಕುಂಡು. ಇತೋರ್ತು 22 ಬಾಸೆಲು ಈ ಪಟ್ಟಿಡ್ ಉಲ್ಲ. ತುಳು ಇದಮುಟ್ಟ ಈ ಪಟ್ಟಿಗ್ ಸೇರ್ದಿಜಿ. ತುಳುನು 8ನೇ ಪರಿಚ್ಛೇದೊಗು ಗೋಡ್ಯಾವೊಡು ಪನ್ದ್ 1971ನೇ ಇಸವಿರ್ದ್ ತುಳುವೆರ್ ಪುನೆವೊಂದುಲ್ಲೆರ್.
4) ರಾಜ್ಯಬಾಸೆ ಆಪಿನ ಬೊಕ್ಕ 8ನೇ ಪರಿಚ್ಛೇದ ಸೇರುನ ಒಂಜೆನಾ?
ಅತ್ತ್, ಉಂದು ರಡ್ಡ್ ಬೇತೆ ಬೇತೆ ವಿಸಯೊಲು. ರಾಜ್ಯ ಬಾಸೆದ ಮಾನಾದಿಗೆ ರಾಜ್ಯ ಸರಕಾರೊಗು ಸೇರ್ದಿನವು. 8ನೇ ಪರಿಚ್ಛೇದೊಗು ಗೋಡ್ಯಾವುನ ಕೇಂದ್ರ ಸರಕಾರದ ಬೇಲೆ. ಒಂಜಿ ಬಾಸೆ 8ನೇ ಪರಿಚ್ಛೇದೊಡು ಇಜ್ಜಿಡಲಾ ರಾಜ್ಯ ಬಾಸೆ ಆದ್ ಮಾನಾದಿಗೆ ಕೊರ್ಪಿನೆಕ್ಕ್ ಒವ್ವೇ ತಾಂತ್ರಿತ ಅಡೆತಡೆ ಇಜ್ಜಿ.
5) ತುಳುನ್ 8ನೇ ಪರಿಚ್ಛೇದೊಡು ಗೋಡ್ಯಾಂಡ ತುಳುಬಾಸೆಗ್ ತಿಕ್ಕುನ ಪ್ರೇಜನೊಲು ದಾದ?
— ಸಾಹಿತ್ಯ ಅಕಾಡೆಮಿರ್ದ್ ಮಾನಾದಿಗೆ ಬೊಕ್ಕ ಬಾಸೆದ ಬುಲೆಚ್ಚಿಲ್‌ಗ್ ಕೇಂದ್ರ ಸರಕಾರೊರ್ದ್ ಪಣವುದ ಬೆರಿಸಾಯ.
— ಬೇತೆ ಬಾಸೆಲೆರ್ದ್ ತುಳು ಸಾಹಿತ್ಯೊಲೆನ ತರ್ಜುಮೆ. ತುಳು ಸಾಹಿತ್ಯೊಗು ಬೆರಿತಾಂಗ್ ಬೊಕ್ಕ ಪಣವುದ ಸಕಾಯೊಲಾ ತಿಕ್ಕುಂಡು.
— ಸಂಸತ್ ಪದುಕೆರ್(MP) ಬೊಕ್ಕ ವಿಧಾನಸಭೆತ ಪದುಕೆರ್(MLA) ಸಂಸತ್ತ್‌ಡ್ ಅಂಚೆನೇ ರಾಜ್ಯ ಅಸೆಂಬ್ಲಿಡ್ ತುಳುಟೇ ಪಾತೆರೊಲಿ. ತುಳುನಾಡ್‌ದ ಸಮಸ್ಯೆಲೆನ್ ತುಳುಟೇ ತೆರಿಪಾವೊಲಿ.
— ನಾಗರಿಕ ಸೇವಾ ಪರೀಕ್ಷೆಲು ಅತ್ತ್ಂಡ ಬೇತೆ ಒವ್ವೇ ಸ್ಪರ್ಧಾತ್ಮಕ ಪರೀಕ್ಷೆಲೆನ್ ತುಳುಟೇ ಬರೆಪುನ ಸಂದರಪ್ಪು ತಿಕ್ಕುಂಡು.
— ಕೇಂದ್ರ ಸರಕಾರೊರ್ದು ವಿಶೇಷ ಪ್ಯಾಕೇಜ್‌ಲು ತಿಕ್ಕುವ.
— ಪ್ರಾಥಮಿಕ ಬೊಕ್ಕ ಪ್ರೌಢಶಾಲೆಡ್ ತುಳು ಕಲ್ಪಾವೊಲಿ.
— ತುಳುನಾಡ್‌ಗ್ ಸಂಬಂಧಫಟ್ಟಿನ ಕಲಾಪ್ರಕಾರೊಲು ಯಕ್ಷಗಾನ, ಭೂತಾರಾಧನೆದಂಚಿನ ಕಸುಬುದಕ್ಲೆಗ್ ಪ್ರೋತ್ಸಾಹ, ಪಣವುದ ಸಹಕಾರ ಬೊಕ್ಕ ಈ ಕಲೆಕ್ಲೆನ ಒರಿಪು/ಬುಲೆಚ್ಚಿಲ್‌ಗ್ ತಾಂಗ್ ತಿಕ್ಕುಂಡು.
— ತುಳು ಬಾಸೆದ ಪಿಚ್ಚರ್‌ಲೆಗ್ ಮಾನ್ಯತೆ ತಿಕ್ಕುಂಡು. ಮಲ್ಲ ಮಲ್ಲ ಪ್ರಶಸ್ತಿಲೆಗ್ ತುಳು ಪಿಚ್ಚರ್‌ಲೆನಲಾ ಪುದರ್ ಕೊರೊಲಿ. (ಇತ್ತೆ ಪುದರ್ ಕೊರ್ಯೆರಲಾ ಆಪುಜಿ)
— ತುಳು ಬಾಸೆದ ಸಾಹಿತ್ಯೊಲೆಗ್ ದುನ್ನ ಇತ್ತ್ಂಡಲಾ ತುಳು ಅಕಾಡೆಮಿದ ಬುಡ್ಂಡ ಬೇತೆ ಒವ್ವೇ ಮಲ್ಲ ಮಾನಾದಿಗೆದ ಭಾಗ್ಯ ಇಜ್ಜಿ. 8ನೇ ಪರಿಚ್ಛೇದೊಡು ಗೋಡ್ಯಾವುನೆರ್ದ್ ಜ್ಞಾನಪೀಠ ಬೊಕ್ಕ ಕೇಂದ್ರ ಸಾಹಿತ್ಯ ಅಕಾಡೆಮಿದ ಮಾನಾದಿಗೆ ತಿಕ್ಕುಂಡು.
— ತುಳು ಬರವು (ಲಿಪಿ) ಗ್ ಮಾನ್ಯತೆ ತಿಕ್ಕುನೆತೊಟ್ಟುಗು ಕರೆನ್ಸಿ ನೋಟುಡು ತುಳು ಬರವು ಬರ್ಪುಂಡು.
6) ಟ್ವಿಟರ್ ಕ್ಯಾಂಪೇನ್ ಪಂಡ ದಾದ? ಉಂದೆಟ್ ದಾಲಾ ಪೆರಜನ ಆಪುಂಡಾ?
ಟ್ವಿಟರ್ ಪನ್ಪಿನವು ಲೋಕೊರ್ಮೆದ ಜನಕುಲು ಗಲಸುನ ಒಂಜಿ ಸೋಶಿಯಲ್ ಮೀಡಿಯಾ. ಉಂದೆಟ್ ವಿಶ್ವದ ಮಲ್ಲ ಮಲ್ಲ ನಾಯಕೆರ್, ನಮ್ಮ ಜನಪ್ರತಿನಿಧಿನಕುಲು ಮಾತೆರ್ಲ ಉಲ್ಲೆರ್. ತುಳುನು ಅಧಿಕೃತ ಮಲ್ಪುಲೆ ಪನ್ದ್ ಬರೆದ್ ಪಾಡ್ದ್ ಬಿನ್ನಪು ಮಲ್ಪೊಲಿ ನೆಟ್ಟ್. ಉಂದೆಕ್ ಅಕುಲು ಪ್ರತಿಕ್ರಿಯೆ ಕೊರ್ಪೆರ್ ಮಾತ್ರ ಅತ್ತಂದೆ ಒಂಜಿ ವಿಷಯೊದ ಪಿರವುಡು ಈತ್ ಜನ ಉಲ್ಲೆರ್ ಪನ್ದ್ ಅಕಲೆಗ್ ತೆರಿಯುಂಡು.
7) ಕನ್ನಡ ಬಾಸೆದ ವಿರುದ್ಧ ಈ ಕ್ಯಾಂಪೇನ್ ಮಲ್ತೊಂದುಂಡಾ?
ನೂದೆಕ್ ನೂದು ಇಜ್ಜಿ. ಈ ಕ್ಯಾಂಪೇನ್ ತುಳು ಬಾಸೆಗ್ ಮಾನ್ಯತೆದ ಬಗ್ಗೆ ಮಾತ್ರ ಗೇನೊಡು ದೀವೊಂದು ನಡಪುಂಡು. ತುಳು ಬಾಸೆಗ್ ಮಾನಾದಿಗೆ ತಿಕ್ಕ್ಂಡ ಕನ್ನಡಗ್ ಆವಡ್ ಬೇತೆ ಒವ್ವೇ ಬಾಸೆಗಾವಡ್ ನಷ್ಟ ಇಜ್ಜಿ.
