Last updated on August 25th, 2022 at 08:14 am
ಕರ್ನಾಟಕ ಬಿಜೆಪಿದ ಇತ್ತೆದ ಗುರ್ಕಾರ್ಲಾಯಿನ ನಳೀನ್ ಕುಮಾರ್ ಕಟೀಲ್ ಮೇರ್ನ ಅಧಿಕಾರವಧಿ ಆಗಸ್ಟ್ ಕಡೇತ ವಾರೊಡು ಮುಗಿಯುಂಡು. ಆರ್ ನನೊರ ಅಧ್ಯಕ್ಷೆ ಆಪುಜಿ ಪನ್ದ್ ಪಕ್ಷದ ಪೆರಿಯಾಕ್ಲೆಗ್ ತೆರಿಪಾದೆರ್. ಅಂಚಾದ್ ನನ ದುಂಬುಗು ಏರ್ ಅಧ್ಯಕ್ಷೆ ಆದ್ ಬರ್ಪಿ ವರ್ಸದ ಓಟುಡು ಗೆಂದರೆ ಪುನಪುವೆರ್ ಪನ್ಪಿನ ಇತ್ತೆ ರಾಜಕೀಯ ವಲಯೊಡು ಬಾರೀ ಚರ್ಚೆಗ್ ನೆವನ ಆತ್ಂಡ್.
ಅಧ್ಯಕ್ಷೆರ್ನ ರೇಸ್ ಡ್ ಸಿ ಟಿ ರವಿ, ಶೋಭಾ ಕರಂದ್ಲಾಜೆ ಬೊಕ್ಕ ಸುನೀಲ್ ಕುಮಾರ್ ನ ಪುದರ್ ಬಾರೀ ಬಲ್ತೊಂದುಂಡು. ಬಿಜೆಪಿ ನನ ಒಂಜಿ ಮಾಸ್ ಲೀಡರ್, ಹಿಂದುತ್ವದ ಬಗೆಟ್ ಪ್ರಕರ ಪಾತೆರುನ ತಂಕ ಉಪ್ಪುನಕಲೆನ್ ತೂವೊಂದುಂಡು ಪನ್ದ್ ತೆರಿದ್ ಬೈದ್ಂಡ್. ಬರ್ಪಿ ವರ್ಸ ಓಟು ಉಪ್ಪುನೆರ್ದಾವರ ಈ ಸಲದ ಆಯ್ಕೆ ಮಸ್ತ್ ಪ್ರಾಮುಖ್ಯವಾದುಂಡು. ಯುಡಿಯೂರಪ್ಪೆರ್ ಜತ್ತಿಬೊಕ್ಕ ಅರೆನಲೆಕ್ಕ ಒರಿ ಮಾಸ್ ಲೀಡರ್ ಬಿಜೆಪಿಗ್ ತಿಕ್ಕುಜಿ, ಇತ್ತೆದ ಸಿಎಂ ಮಾಸ್ ಲೀಡರ್ ಅತ್ತ್ ಮಾತ್ರ ಅತ್ತಂದೆ ಅರೆನ್ ಒರಿಯನೇ ಪತೊಂದು ಓಟುಗು ಪೋವರೆ ಆಪುಜಿ.
ಸಿ ಟಿ ರವಿ ಬೊಕ್ಕ ಶೋಭಾ ಕರಂದ್ಲಾಜೆ ಇರ್ವೆರ್ಲಾ ಒಕ್ಕಲಿಗ ಸಮುದಾಯದಕ್ಲು. ಉಂದು ಅಕಲೆಗ್ ಪ್ಲಸ್ ಪಾಯಿಂಟ್ ಆಪುಂಡು ಮಾತ್ರ ಅತ್ತಂದೆ ಇರ್ವೆರ್ಲಾ ರಾಜ್ಯೊಡು ಪುದರ್ ಪೋಯಿನಕುಲು. ಸುನೀಲ್ ಕುಮಾರ್ ತುಳುನಾಡ್ದ ಮಲ್ಲ ಸಮುದಾಯ ಆಯಿನ ಬಿರುವ ಸಮುದಾಯದಾರ್, ಉಂದೆರ್ದಾತ್ರ ಬಿರುವ-ಈಡಿಗ ಸಮುದಾಯ ಮಿತ್ತ್ ಕನತಿಲೆಕ್ಕಲಾ ಆವು. ಒಟ್ಟುಡು ನನ ಒಂತೆ ದಿನೊಟೇ ನಳಿನೆರ್ ಜತ್ತ್ ದ್ ಬೇತೆ ಒರಿ ಅಧ್ಯಕ್ಷೆ ಆಪಿನ ಖಚಿತ.
