Last updated on September 5th, 2022 at 10:39 am
ನಾಗಾಲ್ಯಾಂಡ್‌ದ ಮುಡಾಯಿ ಮರ್ಗಿಲ್‌ರ್ದ್ ಎಲೆಕ್ಷನ್‌ಗ್ ದುಂಬು ಪೊಸ ರಾಜ್ಯೊಗು ಬೋಡಾದ್ ಬುಲಿಪು ಜೋರುಡು ಕೇನೊದುಂಡು. ಅಲ್ಪದ 20 ಎಮ್ಎಲ್‌ಎ ನಕುಲು ಈ ಬೇಡಿಕೆ ಸಂದುನೆಟ್ಟ ಒವ್ವೇ ಎಲೆಕ್ಷನ್‌ಡ್ ಪಾಲ್‌ದೆತೊನುಜ ಪಂದ್ ಘೋಷಣೆ ಮಲ್ತಿನೇ ಈ ಪೊರ್ಂಬಾಟ ಬಾರಿ ಸುದ್ದಿ ಮಲ್ತೊಂದುಂಡು.
ಮೂಡಾಯಿ ನಾಗಾಲ್ಯಾಂಡ್‌ಡ್ ಮಾನ್, ಟ್ಯುಂಸಂಗ್, ಕಿಫರ್, ಲಾಂಗ್‌ಲೆಂಗ್, ನಾಕ್ಲಾಕ್ ಬೊಕ್ಕ ಶಾಮಟಾರ್ ಪನ್ಪಿ 6 ಜಿಲ್ಲೆಲುಲ್ಲ. ಈ ಜಿಲ್ಲೆಲೆಡ್ ಚಾಂಗ್, ಖಿಯಾಮ್‌ನ್ಯುಂಗನ್, ಕೋನ್ಯಾಕ್, ಫಾಮ್, ಸ್ಯಾಂಗ್‌ತಮ್, ಥಿಖಿರ್ ಬೊಕ್ಕ ಯಿಮ್‌ಖ್ಯುಂಗ್ ಪನ್ಪಿ 7 ಬೇತೆ ಬೇತೆ ಮೂಲನಿವಾಸಿ ಜನಾಂಗದಕುಲು ಉಲ್ಲೆರ್.
ಈಸ್ಟರ್ನ್ ನಾಗಾಲ್ಯಾಂಡ್ ಪೀಪ್‌ಲ್ಸ್ ಆರ್ಗನೈಜೇಷನ್ (ENPO)ದ ಮುತಾಲಿಕೆಡ್ ಆಗಸ್ಟ್ 26 ಕ್ ನಡತಿನ ಇನಯೊ(ಮೀಟಿಂಗ್)ಡ್ ಈ ನಿರ್ಧಾರ ದೆತೊಂದೆರ್. ಈ ಇನಯೊಡು ರಾಜಕಾರಣಿಲು, 7 ಮೂಲನಿವಾಸಿ ಜನಾಂಗೊದ ಗುರ್ಕಾರ್ಲು ಅಂಚೆನೇ ಬೇತೆ ಸಂಘಟನೆಲೆ ಪದಾಧಿಕಾರಿಲು ಪಾಲಾ‌ಪಡೆದಿತ್ತೆರ್. ಸೇರ್ದಿತ್ತಿನಕುಲು ಮಾತ ಪೊಸ ರಾಜ್ಯ ತಾಪನೆ ಆವಂದೇ ಒವ್ವೇ ಎಲೆಕ್ಷನ್‌ಡ್ ಎಂಕ್ಲ ಪಾಲ್‌ಪಡೆವುಜ ಪಂದ್ ಘೋಷಣೆ ಮಲ್ತೆರ್.
60 ಜನ ಪದುಕೆರುಪ್ಪುನ ನಾಗಾಲ್ಯಾಂಡ್ ವಿಧಾನಸಭೆತ ಎಲೆಕ್ಷನ್ ಬರ್ಪಿವರ್ಸ ಫೆಬ್ರವರಿ ಡ್ ನಡಪೆರೆಗುಂಡು ಒಟ್ಟುಗು 12 ವರ್ಸೊರ್ದು ನಡಪಂದಿ ಪೇಂಟೆಲೆನ ನಗರಸಭೆ ಎಲೆಕ್ಷನ್‌ಲಾ ಜನವರಿಗ್ ದುಂಬು ಆವೊಡು ಪಂದ್ ಸುಪ್ರೀಮ್ ಕೋರ್ಟ್ ಪಂಡಿನ ಬೆರಿಟ್ ಈ ಪೊರ್ಂಬಾಟ ಜೋರಾತ್ಂಡ್.
ಸೇರ್ದಿತ್ತಿ ಶಾಸಕೆರೆ ಪರವಾದ್ ಪಾತೆರ್ನ ಮಂತ್ರಿ ಸಿ ಎಲ್ ಜಾನ್ ‘ಈ ಜನೊಕ್ಲೆರ್ದಾವರ MLAಲಾತಿನ ಎಂಕ್ಲ ಎಂಕ್ಲೆನ ಜನೊಕ್ಲೆನ ಬೇಡಿಕೆಲೆನ ವಿರುದ್ದ ಏಪೊಲಾ ಪೋಪುಜ. ಪೊಸ ರಾಜ್ಯ ಜನೊಕ್ಲೆನ ಬೇಡಿಕೆ ಅವೆಕ್ ಎಂಕ್ಲ ಸಂಪೂರ್ಣ ಸಹಕಾರ ಕೊರ್ಪ’ ಪಂದ್ ಪಂಡೆರ್
2010ರ್ದ್ ಗಡಿ ಗಡಿ ಕೇಂದ್ರೊಗು ENPO ಕಡೆರ್ದ್ ಬಿನ್ನಪ, ಜ್ಞಾಪಕಪತ್ರೊಲೆನ್ ಕಡಪುಡ್ಂಡಲಾ ಕೇಂದ್ರೊರ್ದ್ ನೆತ್ತ ಪರವಾದ್ ಆವಡ್ ವಿರುದ್ಧವಾದ್ ಆವಡ್ ಒವ್ವೇ ಉತ್ತರ ಬರಂದಿನ ಜನೊಕ್ಲೆನ ಪಿಸ್‌ರ್‌ಗ್ ಕಾರಣ ಆತ್ಂಡ್ ಪಂದ್ ಆರ್ ಪಂಡೆರ್.