Last updated on September 20th, 2022 at 07:40 am
ಉಬಾರ್‌ದ ಪಂಜಲ ಪನ್ಪಿನಲ್ಪ ಕುಡ್ಲ – ಬೆಂಗ್ಳೂರ್ ಪೆರ್ಸಾದಿದ ಬರಿಟ್ ನೇತ್ರಾವತಿ ಸುದೆಟ್ ಮುದಲೆಲು ತೂಯೆರ ತಿಕ್ಕ್‌ದ್, ಮುಲ್ಪದ ಜನ ಬಾರಿ ಆತಂಕೊಡುಲ್ಲೆರ್.
ಮುಲ್ಪದ ಪೆಟ್ರೋಲ್ ಬಂಕ್‌ದಲ್ಪ ಸುದೆಟ್ ಮದ್ಯಾನದ ಪೊರ್ತುಡು ಪೊಯ್ಯೆದ ದಿಡ್ಡ್‌ದ ಮೂಜಿ ಮುದಲೆಲು ತೋಜಿದ್ ಬೈದ. ಮೂಜೆಟ್ ಒಂಜಿ ಮಲ್ಲ ಸರ್ರೊದ ಮುದಲೆ ಆಂಡಡ ಬಾಕಿದ ರಡ್ಡ್ ಒಂತೆ ಎಲ್ಯ ಇತ್ತ ಪಂದ್ ತೂಯಿನ ಸಿದ್ದೀಕ್ ಕೊಪ್ಪಲ ತೆರಿಪಾದೆರ್. ಈ ಸುದೆಕ್ ಜನ ಮೀನ್ ಪತ್ತೆರ, ಗಾಲ ಪಾಡೆರ ಪೋವೊಂದಿಪ್ಪೆರ್. ಅವ್ವತ್ತಂದೆ ಪರಗೇಟ್‌ದಲ್ಪ ಪೆರ್ಸಾದಿದ ಬೇಲೆದಕುಲು ಗುಡ್ಚಿಲ್ ಕಟ್ಟ್‌ದ್ ಬದ್ಕೊಂದುಲ್ಲೆರ್. ಮುದಲೆಲು ತೂಯೆರೆ ತಿಕ್ಕಿನ ಮಾತೆರೆಗ್ಲಾ ಪೋಡಿಗೆ ಕುಲ್ಲುದ್ಂಡ್.
ಇಂಚಿಪ್ಪೊಗು ಉಬಾರ್‌ದ ಮುಟ್ಟದ ಪೆರ್ನೆದಲ್ಪ ಮೀನ್ ಪತ್ತೆರ ಪೋದಿತ್ತಿನ ನಾಲ್ ಜನ ಮುದಲೆ ತೂತಿನವು ಸುದ್ದಿಯಾದಿತ್ತ್ಂಡ್.
