Last updated on October 19th, 2022 at 10:30 am
ಬಡತನದ ಪುಡೆರ್ದ್ ಒರಿ ಲಕ್ಕ್’ದ್ ತನ್ನ ಕಾರ್ ಡ್ ತಾನ್ ಉಂತುದು ತನ್ನೊಟ್ಟುಗು ತನ್ನ ಸಮಾಜೊಲಾ ಎಡ್ಡೆ ಆವೊಡು ಪನ್ಪಿ ಅಂಗಲಪ್ಪು ದೀವೊಂಡಿನ ರಾಮಪ್ಪ ಪೂಜಾರ್ಲೆ ಎಡ್ಡೆಂತಿನ ಮುಗ್ದ ಉಡಲ್ನ್ ಮಕ್ಕರ್ ಮಲ್ತ್ ಜೋಕು ಮಲ್ಪರೆ ಮನಸಾಂಡಲಾ ಎಂಚ ಬರು?
ಸೋಮಪ್ಪ ಪೂಜಾರಿ ಬೊಕ್ಕ ದುಗ್ಗು ಪೂಜಾರ್ತಿನ ಮಗೆಯಾದ್ ಪುಟ್ಟಿನ ರಾಮಪ್ಪಣ್ಣಗ್ ಬಡವು ಬಡತನ ಪಂಡ ದಾದ ಪನ್ದ್ ತೆರಿದಿತ್ತ್ಂಡ್. ನುಪ್ಪುದ ಎತ್ವಾರ, ತನ್ನ 14ನೇ ವರ್ಸೊಡೇ ಇಲ್ಲ್ ಬುಡ್ದ್ ಹೊಟೇಲ್ ಡ್ ಬೆನ್ಪುಲೆಕ್ಕ ಮಲ್ತ್ಂಡ್. ಸಾಲೆಗ್ ಪೋದು ಕಲ್ಪುನ ಯೋಗ ಇತ್ತ್ ಜಿ ಅರೆಗ್ ಅಂಚ ಪನ್ದ್ ಪ್ರಪಂಚ ಜ್ಞಾನೊಗು ಕುಂದೆಲ್ ಇತ್ತ್’ಜಿ. ಕದ್ರಿಡ್ ಹೊಟೇಲ್’ಡ್ ಬೇಲೆ ಮಲ್ತೊಂದಿಪ್ಪಿನಗನೇ ಹೊಟೇಲ್ದ ಧನಿ ರಾಮಪ್ಪಣ್ಣನ ಎಡ್ಡೆಂತಿನ ನಿಷ್ಟೆ ತೂದು ಅರೆಗ್ ಒಂಜಿ ಹೊಟೇಲ್ ಮಲ್ಪಾಯೆರ್. ಅವೆರ್ದ್ ಬೊಕ್ಕ ರಾಮಪ್ಪಣ್ಣೆ ಪಿರ ತೂಯಿಜೆರ್. ಬೆಗರ್ ಸೀಂಟ್’ದ್ ಬೆಂದ್’ದ್ ಕಂಕನಾಡಿಡ್ ಒಂಜಿ ಜಾಗೆ ದೆತೊಂದು ಹೊಟೇಲ್ ಪಾಡಿಯೆರ್. ಹಂಪನಕಟ್ಟೆಡ್ ರಾಜಕಮಲ್ ಪನ್ಪಿ ಹೊಟೇಲ್ ಉಂಡು ಮಲ್ತೆರ್.
ಕಾಸ್ ಮಾತೆರ್ಲಾ ಮಲ್ಪುವೆರ್ ಆಂಡ ಕಾಸ್ ಮಲ್ತಿಬೊಕ್ಕ ತನ್ಕುಲು ಬತ್ತಿ ತಾದಿನ್ ಮದತಿನಕುಲೇ ದಿಂಜ. ರಾಮಪ್ಪಣ್ಣೆ ಅಂಚ ಅತ್ತ್. ತಾನ್ ವಾ ಬಂಗೊಡು ಮಿತ್ತ್ ಬೈದೆ ಬಡವುದ ಬೇನೆ ದಾದ ಪನ್ದ್ ತೆರಿದಿನಾರಾದ್ ಎದುರು ಪಿರ ತೂವಂದೆ ದಾನ ಧರ್ಮ ಮಲ್ಪರೆ ಸುರು ಮಲ್ತೆರ್. ತನ್ನ ಹೊಟೇಲ್’ಗ್ ಬತ್ತಿನಕಲೆಗ್ ಒಂಜೇ ನಯಪೈಸೆ ಹೆಚ್ಚಿಗೆ ದೆತೊನಂದೆ ಕೇನಿನಾತ್ ಬಲಸೊಂದಿತ್ತೆರ್. ತಾನ್ ಸಾಲೆ ಕಲ್ತ್’ಜಿ ಆಂಡ ಸಮಾಜೊದ ಜೋಕುಲು ಕಲ್ಪೊಡು ಪನ್ದ್ ಕುದ್ರೋಳಿ ಗೋಕರ್ಣನಾಥ ಕಾಲೇಜ್’ಗ್ 1,11,111 ರೂ ದೇನಿಗೆ ಕೊರಿಯೆರ್. ಕಲ್ಪರೆ ಕಾಸ್ ಇಜ್ಜಿ ಆಂಡ ಕಲ್ಪುನ ಆಸೆ ಇತ್ತಿ ಏತೋ ಜೋಕುಲೆಗ್ ತಾನೇ ಕಾಸ್ ಕೊರ್ದು ಕಲ್ಪಾಯೆರ್. ಕಂಬುಲೊಗು ಬೋಡಾಪಿನ ಸೌಕರ್ಯ ಮಲ್ತೆರ್. ತನ್ನ ಇಲ್ಲಡ್ ಧರ್ಮ ನೇಮ ಮಲ್ಪಾವೊಂದಿತ್ತೆರ್. ತುಳುನಾಡ್’ದ ಏತೋ ಕಾಂಗ್ರೇಸ್ ಲೀಡರ್ನಕಲೆಗ್ ಪಣವುದ ಸಕಾಯ ಮಲ್ತ್’ದ್ ಅಕುಲು ಗೆಂದರೆ ಬೆರಿತಾಗಾಂದ್ ಉಂತಿಯೆರ್.
ಒರಿ ಕಲ್ಪಂದಿನಾಯೆ, ತಿರ್ತ್ ಜಾತಿದಾಯೆ, ಬಡವೆ ತನ್ನ ಕಾರ್’ಡ್ ತಾನ್ ಉಂತುದು ಸಮಾಜದ ಮಿತ್ತರ್ಮೆಗ್ ಏರುವೆ ಪನ್ನಗ ಆಯನ ಕಾರ್ ಒಯಿತ್ತ್ ತಿರ್ತ್ ಪಾಡರೆ ತೂಪಿನ ಜನಕುಲು ಸಾರ ಉಪ್ಪುವೆರ್. ಗುಡ್ಚಿಲ್’ಡ್ ಇತ್ತಿನಾಯೆ ಬಂಗ್ಲೆ ಕಟ್ಟ್’ದ್ ಕಾರ್’ಡ್ ತಿರ್ಗುನೆನ್ ತೂವರೆ ಆವಂದೆ ಕೆಲವೆರ್ ರಾಮಪ್ಪಣ್ಣನ ಬಗೆಟ್ ಮಕ್ಕರ್ ಮಲ್ತ್ ಆರ್ನ ಪುದರ್ ಹಾಲ್ ಮಲ್ಪರೆ ತೂಯೆರ್. ಒಂಜಿ ಕನ್ನಡದ ಪತ್ರಿಕೆಡ್ ದಿನಾಲ ‘ರಾಂಪನ ಜೋಕು’ ಪನ್ದ್ ಪಾಡ್ದರೆ ಸುರು ಮಲ್ತೆರ್. ಅಕುಲು ಜೋಕು ಪಾಡಿಯೆರ್ ಸಮಾಜ ತೆಲ್ತ್ಂಡ್. ರಾಂಪಣ್ಣೆ ಮಾತ್ರ ತನ್ನಾತೆಗೇ ಒವೆಕ್ಲಾ ಕೆಬಿಕೊರಂದೆ ಸಮಾಜೊಡು ತಿರ್ತ್ ಬೂರಿನಕಲೆನ್ ಮಿತ್ತ್ ದೆರ್ಪರೆ ಪುನೆಪು ಬರೊಂದಿತ್ತೆರ್.
ತನ್ನ ಮಿತ್ತ್ ಏತೇ ಜೋಕ್ ಬತ್ತ್ಂಡಲ ಅವೆಕ್ ಎದುರು ಪಾತೆರಿಯರೆ ರಾಂಪಣ್ಣೆ ಪೋಯಿಜೆರ್. ದೈವೊಲೆನ್ ನಂಬೊಂದಿತ್ತಿನ ಆರ್, ದೈವೊಲೆನ ಮಿತ್ತ್ ಪಾಡ್ದ್ ತನ್ನಾತೆಗೇ ತಾನ್ ಇತ್ತೆರ್.
ನನೊರ ರಾಂಪೆ ಆವಡ್ ರಾಂಪನ ಜೋಕು ಆವಡ್ ಪನ್ದ್ ಅಪಹಾಸ್ಯ ಮಲ್ಪುನಗ ನಿಕುಲು ಒರಿ ಬಡವೆ ಈ ಸಮಾಜೊಡು ಮಲ್ಲಾಯೆ ಆಯಿನೆನ್ ಅಪಹಾಸ್ಯ ಮಲ್ಪುನು ಪನ್ದ್ ಎನ್ನ್’ಲೆ. ಒರಿ ಕಲುತೆರಿಯಂದಿನ ಸುದ್ದ ಮನಸ್ದ ಜನನ್ ಅಪಹಾಸ್ಯ ಮಲ್ಪುನು ಪನ್ದ್ ತೆರಿಲೆ. ನಿಕುಲು ರಾಮಪ್ಪಣ್ಣೆ ನಂಬಿನ ದೈವೊಲೆಗ್ ಅಪಹಾಸ್ಯ ಮಲ್ಪುನು ಪನ್ದ್ ತೆರಿಲೆ.