ವೇಣೂರು : ಜ್ವರೊಟು ಒಂಜೇ ಇಲ್ಲದ ರಡ್ಡ್ ಜೋಕುಲು ಸಾವು

Last updated on October 27th, 2022 at 03:51 pm

ಜ್ವರ ಮಂಡೆಗ್ ಅಡರ್ದ್ ವೇಣೂರುದ ಒಂಜೇ ಇಲ್ಲದ ರಡ್ಡ್ ಜೋಕುಲು ಕುಡ್ಲದ ಖಾಸಾಗಿ ಅಸ್ಪತ್ರೆಡ್ ತೀರಿಯೆರ್. ಪದಂಗಡಿ ಗ್ರಾಮದ ಮೊಹಮ್ಮದ್ ಅಬ್ಬಾಸ್ ಬೊಕ್ಕ ಮೈಮುನ ಮೊಕಲೆನ ಜೋಕುಲಾಯಿನ ಸಿನಾನ್(10) ಬೊಕ್ಕ ಸಫ್ವಾನ್(4) ತೀರಿನ ಜೋಕುಲು. ಸಿನಾನ್ 4ನೇ ಕ್ಲಾಸ್ ಡ್ ಕಲ್ತೊಂದಿತ್ತೆ ಅಂಚೆನೆ ಸಫ್ವಾನ್ ಅಂಗನವಾಡಿಡ್ ಕಲ್ತೊಂದಿತ್ತೆ.

ಅಕ್ಟೋಬರ್ 21ಕ್ಕ್ ಎಲ್ಲಿಡ್ ಜ್ವರ ಬತ್ತಿನೇ ಕೈತಲ್ದ ಬೈದ್ಯೆರೆಡ ಮರ್ದ್ ಕನದಿತ್ತೆರ್, ಜ್ವರ ಜೋರಾಯಿನೇ ಮನದಾನಿ ಕೊನೊದು ಟೆಸ್ಟ್ ಮಲ್ಪಾಯಿನೇ ಬೈದ್ಯೆರ್ ಕುಡ್ಲಗ್ ಕೊನೊರೆ ಪಂಡೆರ್. ಕುಡ್ಲ ಆಸ್ಪತ್ರೆಡ್ ಜ್ವರ ಮಂಡೆಗ್ ಅಡರಿನ ತೂದು ಜೋಕುಲೆನ್ ಐಸಿಯುಡು ದೀದಿತ್ತೆರ್. ಮರ್ದ್ ನಡಪಂಡೆ ಅಕ್ಟೋಬರ್ 24ಕ್ಕ್ ಸಫ್ವಾನ್ ತೀರಿಯೆ. ಮನದಾನಿ ಅಕ್ಟೋಬರ್ 25ಕ್ಕ್ ಸಿನಾನ್ ತೀರಿಯೆ.

ರಡ್ಡ್ ಜೋಕುಲೆನ್ಲಾ ಕಲೆಯೊನಿನ ಅಪ್ಪೆ ಅಮ್ಮನ ಬುಲ್ಪಾಟಿಕೆ ಮುಗಲ್ ಮುಟ್ಟುಂಡು. ಅಮ್ಮೆ ಮೇಸ್ತ್ರಿ ಬೇಲೆ ಮಲ್ತೊಂದು ಅಪ್ಪೆ ಇಲ್ಲಡೇ ಇತ್ತಿನ ಬಡವೆರೆ ಕುಟುಮ ಪನ್ದ್ ತೆರಿದ್ ಬೈದ್ಂಡ್.