Last updated on October 27th, 2022 at 07:39 am
ಕರ್ನಾಟಕ ಸರಕಾರದ ನನ ದುಂಬುದ ಅಧಿವೇಶನ ಬರ್ಪಿ ವರ್ಸ ಮಾರ್ಚ್‌ಡ್ ನಡಪರೆ ಉಂಡು. ಉಂದು ಈ ವಿಧಾನಸಭೆತ ಕಡೇತ ಅಧಿವೇಶನ ಅವೆರ್ದ್ ಬೊಕ್ಕ ಎಲೆಕ್ಷನ್ ನಡಪುಂಡು. ಕರಿನ ಸಲ ತುಳುವೆರ್ ಟ್ವಿಟರ್ ಅಭಿಯಾನ ಮಲ್ಪುನಗ ಕರ್ನಾಟಕ ಬಿಜೆಪಿದ ಗುರ್ಕಾರ್ಲಾಯಿನ ನಳೀನ್ ಕುಮಾರ್ ಕಟೀಲ್ ಮೇರ್ ಅಕ್ಲೆನ ಅವಧಿಡ್ ತುಳುಕು ರಾಜ್ಯಬಾಸೆದ ಮಾನಾದಿಗೆ ಕೊರ್ಪಾವ ಪನ್ದ್ ಪಾತೆರ ಕೊರ್ದಿತ್ತೆರ್.
ಇಂಚಪ್ಪೊಗು ಬೆಂಗಳೂರುಡು ತುಳುವೆರೆನ್ ಲೆತ್ತ್ ಪಾತೆರಿನ ಕನ್ನಡ ಸಚಿವೆ ಸುನೀಲ್ ಕುಮಾರ್ ಮೇರ್, ತುಳುಕು ಅಧಿಕೃತ ಸ್ಥಾನಮಾನ ಕೊರ್ಪಿನ ಪ್ರಕ್ರಿಯೆ ನಡತೊಂದುಂಡು ಪನ್ದ್ ಪಂತೆರ್. ಕಾನೂನು ಇಲಾಖೆಗ್ ಈ ಪ್ರಪೋಸಲ್ ಪೋಪುಂಡು ಅಲ್ಪೊರ್ದು ಒಪ್ಪಿಗೆ ತಿಕ್ಕಿಬೊಕ್ಕ ಅಧಿವೇಶನೊಗು ಪೋಪುಂಡು ಪನ್ದ್ ಪಂತೆರ್. ಅಂಚೆನೆ ತುಳು ಪೊರುಂಬಾಟಗಾರೆ ರೋಶನ್ ರೆನಾಲ್ಡ್ ತನ್ನ ಫೇಸ್ಬುಕ್ ಗೋಡೆಡ್ ಕುಡ್ಲದ ಶಾಸಕೆರಾಯಿನ ವೇದವ್ಯಾಸ ಕಾಮತೆರೆನ ಮುತಾಲಿಕೆಡ್ ತುಳು ರಾಜ್ಯ ಬಾಸೆಗ್ ಬೋಡಾಪಿನ ದಾಖಲೆ, ಮಾಹಿತಿ ಸರಕಾರೊಗು ಕೊರ್ತುಂಡು ಪನ್ದ್ ತೆರಿಪಾದೆರ್. ಉಂದು ಕಾನೂನು ಸಲಹಾ ಸಮಿತಿಗ್ ಪೋತುಂಡು ಪನ್ದ್ ಪಂಡೆರ್.
ತುಳು ರಾಜ್ಯಬಾಸೆದ ಮಾನಾದಿಗೆದ ವಿಸಯೊಡು ತುಳುವೆರ್ ಇಂಚಪ್ಪೊಗು ಕುಡ್ಲ ಕ್ಲಾಕ್ ಟವರ್‌ದಲ್ಪ ಮಲ್ಲ ಮಟ್ಟ್‌ದ ಪ್ರತಿಭಟನೆ ಮಲ್ದಿತ್ತೆರ್. ತುಳುಕು ಮಾನಾದಿಗೆ ಬೋಡು ಪನ್ದ್ ಪ್ರತಿಯೊರಿಯ ಬೇಡಿಕೆಯಾದುಂಡು. ತುಳುನಾಡ ಶಾಸಕೆಕ್ ಸಂಸದೆರ್ ನನಾಂಡಲ ಈ ವಿಸಯೊಡು ಒಂತೆ ತೀವ್ರವಾದ್ ಬೇಲೆ ಮಲ್ಪುನ ಅಗತ್ಯ ಉಂಡು.