Last updated on November 10th, 2022 at 08:24 pm
ತುಳುಬಾಸೆಡೇ ತುಳುವೆರೆಗ್ ಮದಿಪು ಎತ್ತಾವೊಡು, ತುಳುಕುಲಾ ಉಲಬಲೆಟ್ ನಿಲೆ ಕೊರೊಡು, ತುಳು ಬರವುಟ್ಲಾ ನ್ಯೂಸ್ ಪಾಡೊಡು ಪನ್ಪಿ ಉದ್ದೇಸ ದೀವೊಂದು ಉದಿತಿನ ಒಂಜಿ ವೆಬ್ಸೈಟ್ ತುಳುವಾಣಿ.
ಎಂಕುಲು ಒವ್ವೇ ಪನವುದ ಅಂಗ್ ದೀವಂದೆ, ಎರೆನಲ ಬೆರಿ ಪತ್ತಂದೆ, ಎಂಕಲೆಗ್ ಬೇಲೆ ಬೇತೆನೇ ಇತ್ತ್ಂಡಲ ತುಳುಕಾದೊಂತೆ ಪೊರ್ತು ಅಜತ್ ದೀದ್ ಈ ವೆಬ್ಸೈಟ್ ನಡಪಾವೊಂದುಲ್ಲ.
ತುಳುವೆರ್ ತುಳುಟು ನ್ಯೂಸ್ ಓದುಜೆರ್ ಪನ್ಪಿನ ಪಾತೆರೊನು ಕಲು ಮಲ್ತ್ ಪುಟ್ಟುದು ನೂದು ದಿನ ಆನಗನೇ ಒಂಜಿ ಲಕ್ಷ ವೀವ್ಸ್ ದೆತೊಂಡ.
ತುಳುಬಾಸೆಡ್ ವೆಬ್ಸೈಟ್ ಮಲ್ತ್ ಒಂಜಿ ಲಕ್ಷ ವೀವ್ಸ್ ದೆತೊನುನ ಎಲ್ಯ ಪುನೆಪು ಅತ್ತ್. ಇನಿ ಎಂಕುಲು ಇಡೆಗ್ ಎತ್ತರೆ ತುಳುವೆರ್ ಮೋಕೆಡ್ ಎಂಕ್ಲೆನ ಈ ಎಲ್ಯ ತುಳುವಪ್ಪೆನ ಪರಕೆನ್ ತನ್ಕುಲೆನ ಮಟ್ಟೆಲ್ ದಿಂಜಾಯಿನವು ಎಂಕ್ಲೆ ಪುಣ್ಯ.
ಎಂಕಲೆಗ್ ಒವ್ವೇ ಅಜೆಂಡಾ ಇಜ್ಜಿ, ಐಡಿಯಾಲಜಿ ಇಜ್ಜಿ, ಪಂತ ಇಜ್ಜಿ. ಎಂಕಲೆಗ್ ಉಪ್ಪುನ ಒಂಜೇ ಧರ್ಮ ಅವ್ ತುಳು ಧರ್ಮ, ಒಂಜೇ ನಾಲಯಿ ಅವ್ ತುಳುವಪ್ಪೆ ಕೊರ್ತಿನ ನಾಲಯಿ, ಒಂಜೇ ಅಜೆಂಡ ಅವ್ ತುಳುತ ಬುಲೆಚ್ಚಿಲ್. ಎಂಕುಲು ಬರೆಪಿನೆಟ್ಟ್ ದಾದಾಂಡಲ ತೆಟ್ಟ್ ಇತ್ತ್ಂಡ ತುಳುವೆರ್ ಪಿಸಿರ್ ಎನ್ನಂದೆ ನಿಕ್ಲೆ ಮಟ್ಟೆಲ್ ಡ್ ಬುಲೆಯಿ ಜೋಕುಲ್ನಲೆಕ್ಕ ಮಾನಾಲೆ, ತಿದ್ದೊನ್ವ. ಎಡ್ಡೆ ಇತ್ತ್ಂಡ ಇಂಚೆನೆ ತುಳುವೆರೆನ್, ತುಳು ಚಾಕಿರಿ ಮಲ್ಪಿ ಜೋಕುಲೆನ್ ಬುಲೆಪಾಲೆ.
ತುಳುವಾಣಿ ಪನ್ದ್ ಮಾತ್ರ ಅತ್ತ್, ತುಳುಕಾದ್ ಬೆನ್ಪಿನ, ತುಳುವೆರ್ ಉಂಡು ಮಲ್ತಿನ ಮಾತಾ ಮಾಧ್ಯಮೊಲೆನ್ ಬುಲೆಪಾಲೆ. ಉಂದು ಒವ್ವೇ ಮಲ್ಲಾದಿಗೆ ತೂಪಾವರೆ ಬರೆಯಿನಿ ಅತ್ತ್. ತುಳು ಬುಲೆಯೊಡು ತುಳು ನನಾತ್ ಗಟ್ಟಿ ಆವೊಡಾಂಡ ತುಳು ಮಾಧ್ಯಮೊಲು ಬುಲೆಯೊಡು. ತುಳು ಬಾಸೆ ಒರಿಯೊಡಾಂಡ ತುಳುವೆರ್ ತುಳು ಬರವುಲೆನ್ ಓದೊಡು ತುಳು ಲಿಪಿ ಕಲ್ಪೆೊಡು, ತನ್ನ ತುಳುವ ಅಸ್ಥಿತ್ವದ ಬಗೆಟ್ ಪೆರ್ಮೆ ಒರಿತೊನೊಡು.
ಎಂಕ್ಲು ಎಂಕ್ಲೆ ವೆಬ್ಸೈಟ್ ಡ್ ತುಳು ಪರತಿರಿಟೇ ಇಸೇಸ ಪುನೆಪಾಯಿನ ತುಳು ಲಿಪಿಟ್ ನ್ಯೂಸ್ ಕೊರೊಂದುಲ್ಲ. ತುಳುಟೇ ತಂತ್ರಜ್ಞಾನ, ಬೈದ್ಯ, ರಾಜಕೀಯ, ಸಾಹಿತ್ಯ, ಊರು-ರಾಜ್ಯ-ಪರವೂರ ನ್ಯೂಸ್ಲೆನ್ ಪಟ್ಟೊಂದುಲ್ಲ. ದಿನೊಕು ಎಂಕ್ಲೆನ ಬಂಜಿತ ಪಡಿತ ಬೇಲೆ ಕರಿದ್ ಏತ್ ಪೊರ್ತು ಒರಿಯುಂಡಾ ಅವೆನ್ ತುಳುವಾಣಿಗಾದ್ ಗಲಸೊಂದುಲ್ಲ.
ಓಲೋಲೋ ಬೆನ್ಪಿನ ಜೋಕುಲು – ಜೋಕುಲು ಸೇರ್ದ್ ಜೋಕುಲಾಟಿಕೆಡ್ ಮಲ್ತಿನ ಒಂಜಿ ವೆಬ್ಸೈಟ್, ಆಂಡ ತುಳುವೆರ್ ಎಂಕಲೆಗ್ ಬೆರಿಬಲ ಕೊರ್ದು ಮಲ್ಲ ಜಬದಾರಿ ಕೊರ್ತೆರ್. ಆ ಜಬದಾರಿನ್ ಒರಿತೊನರೆ ತುಳುನಾಡ ಬೆರ್ಮೆರ್-ಸತ್ಯೊಲು ಎಂಕಲೆಗ್ ಬಲ ಕೊರಡ್ ಪನ್ದ್ ನಟ್ಟೊನುವ.
ತುಳುವೆರ್ ಬುಲೆಯೊಡು, ತುಳು ಬುಲೆಯೊಡು. ತುಳುತ ಚಾಕಿರಿ ಇಂಚೆನೆ ದುಂಬರಿಯುಂಡು.
– ತುಳುವಾಣಿದ ತಮೆರಿಲು