Last updated on December 25th, 2022 at 09:27 am
ತುಳುನಾಡ್‌ಡ್ ಸುಮಾರ್ ನವೆಂಬರ್ ರ್ದ್ ಮಾರ್ಚ್ ಮುಟ್ಟ ಅಂಕ-ಆಯನ, ಕೋಲ-ಕಂಬುಲ ಮಾತ ಏಪೊಲೊರ್ದ್ಎಚ್ಚಾದ್ ನಡಪುನ ಪೊರ್ತು. ಈ ಪೊರ್ತುಡು ನಾಡ್‌ದ ಸಾಂಸ್ಕೃತಿಕ ಪ್ರವಾಸೋದ್ಯಮ ಎರ್ತೆಲ್ ತೂಪುಂಡು. ಈ ಡಿಸೆಂಬರ್‌ಡ್ ನಮ್ಮ ವೈವಾಟ್ ಕಮ್ಮಿಡ್ 700ಕೋಟಿ ರೂಪಾಯಿ ಕಡತ್‌ದ್ಂಡ್ ಪಂದ್ ಆರ್ಥಿಕ ತಜ್ಞೆರ್ ಪನೊಂದುಲ್ಲೆರ್.
ಕಂಬುಲ, ಆಟ, ಕೋಲ, ನಾಗಮಂಡಲ, ಬ್ರಹ್ಮಕಲಶೋತ್ಸವ, ಜಾತ್ರೋತ್ಸವ, ಸಾಂತ್‌ಮಾರಿ, ಕ್ರಿಸ್‌ ಮಸ್, ಉರೂಸ್ ಇಂಚ ಸಾಲ್ ಸಾಲ್ ಜಾತ್ರೆ ಉಚ್ಚಯೊಲು ನಡತೊಂದುಲ್ಲ, ನಡಪರೆಗುಲ್ಲ. ನೆತ್ತ ಒಟ್ಟುಗು ಬೆದ್ರಡ್ ನಡತೊಂದುಪ್ಪುನ ವಿಶ್ವ ಸಾಂಸ್ಕೃತಿಕ ಜಾಂಬೂರಿ, ಕಂಬುಲ, ಪೊಸ ವರ್ಸೊದ ಕುಸಿ, ಸಾಲ್ ಸಾಲ್ ಮದಿಮೆ, ಜಾತ್ರೆಲೆರ್ದ್ ತುಳುನಾಡ ಸಾಂಸ್ಕೃತಿಕ ಪ್ರವಾಸೋದ್ಯಮ ರೈಸೊಂದುಂಡು.
NRI ಲು ಅಪ್ಪೆನಾಡ್‌ಗ್
ಕ್ರಿಸ್ಮಸ್, ಪೊಸ ವರ್ಸ ಪಂದ್ ಸಾಲ್ ಸಾಲ್ ರಜೆ ಇಪ್ಪುನಗ ಪಿದಯಿ ದೇಸೊಡುಪ್ಪುನ ತುಳುವೆರ್ಲಾ ಒರ ತುಳುವ ಮಣ್ಣ್‌ಗ್ ಬರ್ಪೆರ್. ಈ ಸರ್ತಿ ಇಂಚಿನ 25ಸಾರೊರ್ದ್‌ಲಾ ಎಚ್ಚಿನ ಎನ್‌ಆರ್‌ಐ ಲು ಊರುಗು ಬೈದೆರ್‌ . ಮದಿಮೆದ ಹಾಲ್, ಪಾರ್ಟಿಹಾಲ್ ಮಾತ ಜನವರಿ ಅಕೇರಿ ಮುಟ್ಟ ಇನೆದಾಂತೆ ಬುಕ್ ಆತ.
ಕಾಲಿ ಪ್ರವಾಸೋದ್ಯಮಡೇ ಸಾವಿರ ಕೋಟಿ ವೈವಾಟ್ ನಡಪಾವುನ ತುಳುನಾಡ್‌ಡ್ ಬೇತೆ ಉದ್ದಿಮೆಲೆನಲಾ ಲೆಕ್ಕ ಪಾಡ್ಂಡ ಈ ಲೆಕ್ಕ ಅವೇತೋ ಸಾರ ಕೋಟಿರ್ದ್ ಮಿತ್ತ್ ಪೋವು.
ಈತ್ ಪೂರಾ ವೈವಾಟ್ ಇತ್ತ್ಂಡಲಾ, ತುಳುನಾಡ್ಗ್ ಸತು ದಿಂಜಾವುನಂಚಿನ ಮೂಲ ಸೌಕರ್ಯದ ಬುಲೆಚ್ಚಿಲ್ ಇಜ್ಜಿ ಪನ್ಪಿನವು ಬೆಸರ್ದ ಸಂಗತಿ. ಕರ್ನಾಟಕೊಡು ಬೆಂಗಳೂರುಗು ಪುಗೆಲ್ ಕೊರ್ದು ಬುಲೆಯುನಂಚಿನ ಒವ್ವಾಂಡಲ ಜಾಗ ಇತ್ತ್ಂಡ ಅವ್ ಕುಡ್ಲ, ಕುಡ್ಲರ್ದ್ ಪೋಯಿನ ಟ್ಯಾಕ್ಸ್ ಪೂರಾ ಕುಡ್ಲದ ಬುಲೆಚ್ಚಿಲ್ ಗ್ ಏತ್ ಗಲಸುಂಡು ಪನ್ದ್ ನಮ ಎನ್ನೊಡಾಯಿನ ಇಚಾರ.