Last updated on December 20th, 2022 at 11:18 am
ಬಾಗಲಕೋಟೆ: ತನ್ನ ಮಗಲ್ ಮದಿಮೆ ಆದಿತ್ತಿನ ಪರಜಾತಿದ ಮರ್ಮಯನ್ ಅಮ್ಮೆ ಕೈದ್‌ಲೆಡ್ ಆಕ್‌ದ್ ಕೆರ್ತಿನ ನಡಕೆ ಬಾಗಲಕೋಟೆಡ್ ನಡತ್‌ದ್ಂಡ್. ತೀರಿನಾರ್ ಜಮಖಂಡಿ ಪೇಂಟೆದ ಗಿಟ್ಟದ ಟಾಕೋಡಾ ಗ್ರಾಮೊದ ಭುಜಬಾಲಾ ಕರ್ಜಗಿ(34) ಪಂದ್ ತೆರಿದ್ ಬೈದ್ಂಡ್. ಆರೋಪಿ ತಮ್ಮಣ್ಣ ಗೌಡೆ ಬೊಕ್ಕ ನನ ರಡ್ಡ್ ಜನೊನು ಪೋಲೀಸ್ ನಾಡೊಂದುಲ್ಲೆರ್.
ಪೋಲೀಸೆರೆ ಪ್ರಕಾರ ಭುಜಬಾಲಾ ಜೈನ ಸಮುದಾಯೊಗು ಸೇರ್ದಿನಾರ್. ಮೆರೆನ ಬೊಡೆದಿ ಭಾಗ್ಯಶ್ರೀ ಕ್ಷತ್ರಿಯೆರಾದಿತ್ತೆರ್. ಒಂಜಿ ವರ್ಸೊಗು ದುಂಬು ರಡ್ಡ್ ಜನಲಾ ಬಲ್ತ್ ಪೋದು ಮದಿಮೆ ಆದಿತ್ತೆರ್. ಒಂತೆ ಸಮೆ ಕರಿದ್ ಪಿರ ಊರುಗ್ ಬತ್ತ್ಂಡಲಾ ಅಪ್ಪೆ-ಅಮ್ಮರ್ದ್ ದೂರೊನೇ ಇತ್ತೆರ್. ತಮ್ಮಣ್ಣ ಗೌಡ್ರೆಗ್ ಮಗಲ್ ಬೊಕ್ಕ ಮರ್ಮಯನ ಮಿತ್ತ್ ಬಾರಿ ಪಗೆ ಇತ್ತ್ಂಡ್.
ಡಿಸೆಂಬರ್ 17ಕ್ ಊರ್‌ದ ಹನುಮ ದೇವಲ್ಯೊದ ಎದುರುಡೆ ಭುಜಬಾಲೆರ್ ನಡತೊಂದು ಪೋನಗ ಆರೋಪಿಲು ಆರೆನ ಕಣ್ಣ್‌ಗ್ ಮುಂಚಿದ ಪೊಡಿ ದಕ್ಕ್‌ದ್, ಕೈದ್‌ಲೆನ್ ಗಲಸ್‌ದ್ ಆಕ್‌ದೆರ್. ಗಾತಿದ ಪೆಟ್ಟಾದಿತ್ತಿನಾರೆನ್ ಆಸ್ಪತ್ರೆಗ್ ಸೇರಾಂಡಲಾ, ಚಿಕಿತ್ಸೆ ಪಲಿಪಂದೆ ಆ‌ಸ್ಪತ್ರೆಡೇ ತೀರ್ದೆರ್. ಮಿತ್ತಜಡ್ತೆಡ್ ಆರೋಪಿಗ್ ರಡ್ಡ್ ಜನ ಸಕಾಯ ಮಲ್ದಿನ ತೆರಿದ್ ಬೈದ್ಂಡ್.