Last updated on December 7th, 2022 at 01:49 pm
ಸುರತ್ಕಲ್: ಡಿ 7 : ವೈದ್ಯಕೀಯ ಚೆಕಪ್‌ಗ್ ಬತ್ತಿನ ಪೊಂಜೊವುಲು ಕುಂಟು ಮಾಪುನ ದೃಶ್ಯೊಲೆನ್ ಕಂಡ್‌ದ್ ಮೊಬೈಲ್ ಕ್ಯಾಮರಾ ದೀದ್ ರೆಕಾರ್ಡ್ ಮಲ್ತೊಂದಿತ್ತಿನ ಅಮಾನವೀಯ ಘಟನೆ ಕುಡ್ಲದ ಪ್ರೈವೇಟ್ ಆಸ್ಪತ್ರೆ ಒಂಜೆರ್ದ್ ವರದಿ ಆತ್ಂಡ್.
ಈ ಬಗ್ಗೆ ಸುರತ್ಕಲ್ ಸ್ಟೇಷನ್‌ಡ್ ಜವನ್ದಿಯೊರ್ತಿ ಕೊರ್ತಿನ ಕೇಸ್‌ದಂಚ ಪ್ರಕರಣ ದಾಕ್ಲಾತ್ಂಡ್. ಈ ಕೃತ್ಯ ಮಲ್ದಿನ ಆರೋಪಿ ಗುಲ್ಬರ್ಗಾದ ಪವನ್ ಕುಮಾರ್‌ (21)ನ್ ಪೊಲೀಸೆರ್ ಕೈದ್ ಮಲ್ದೆರ್. ಉ್ಂಬ್ಯೆ ಆಸ್ಪತ್ರೆಡ್ ಬೇಲೆ ಮಲ್ತೊಂದಿತ್ತಿನ ನರ್ಸಿಂಗ್‌ ವಿದ್ಯಾರ್ಥಿ.
ಆಸ್ಪತ್ರೆಡ್ ಚೆಕಪ್‌ಗ್ ಬರ್ಪುನ ಪೊಂಜೊವುನಕುಲು ಸ್ಕ್ಯಾನಿಂಗ್‌ಗ್ ಪೋಪಿನ ದುಂಬು ಕುಂಟು ಮಾಪೆರ ಒಂಜಿ ಅದೆತ ವ್ಯವಸ್ಥೆ ಮಲ್ದಿತ್ತ್ಂಡ್. ಜವನ್ದಿ ಒರ್ತಿ ಕುಂಟು ಮಾಪೆರ ದುಂಬು ಅಂಚಿಂಚಿ ಪರಿಶೀಲನೆ ಮಲ್ದೆರ್. ಈ ಪೊರ್ತುಡು ದೆಂಗದ್ ದೀದಿತ್ತಿನ ಮೊಬೈಲ್ ತಿಕ್ಕ್‌ದ್ಂಡ್. ಈ ಸಂಗತಿನ್ ಪೊಣ್ಣು ಆಸ್ಪತ್ರೆದ ಬೈದ್ಯೆರೆ ಗೇನೊಗು ಕನತೆರ್.
ಈ ಬಗ್ಗೆ ಜಡ್ತೆ ಮಲ್ತಿನೇ ಆಸ್ಪತ್ರೆಡ್ ಬೇಲೆ ಮಲ್ತೊಂದಿತ್ತಿನ ನರ್ಸಿಂಗ್‌ ವಿದ್ಯಾರ್ಥಿ ಪವನ್ ಮೊಬೈಲ್ ಕ್ಯಾಮರಾ ದೀತಿನಾಯೆ ಪಂದ್ ತೆರಿದ್ ಬೈದ್ಂಡ್. ಆಸ್ಪತ್ರೆದಕುಲು ಪೊಣ್ಣನೊಟ್ಟು ಉಂತುದು ಆಯನ ಮಿತ್ತ್ ಸುರತ್ಕಲ್ ಠಾಣೆಗ್ ದೂರು ಕೊರ್ಯೆರ್.
ಗುಲ್ಬರ್ಗಾ ಮೂಲೊದ ಪವನ್ ವಿದ್ಯಾಭ್ಯಾಸೊದ ನಿಮಿತ್ತ ಬಜ್ಪೆಡ್ ಕುಲ್ದಿತ್ತೆ. ಉ್ಂಬ್ಯನ್ ಕೈದ್ ಮಲ್ದಿನ ಪೊಲೀಸೆರ್ ನ್ಯಾಯಂತಡೆಗ್ ಲೆತೊಂದುಪೋತೆರ್.