Last updated on December 1st, 2022 at 06:48 pm
ಕಿನ್ಯಮಗಲ್ನೂರು: ಜಿಲ್ಲೆದ ವಿವಾದಿತ ಧಾರ್ಮಿಕ ಕೇಂದ್ರ, ಬಾಬಾಬುಡನ್ ಗಿರಿತ ದತ್ತಾತ್ರೇಯ ಪೀಠೊಡು ಡಿಸೆಂಬರ್ 06 ರ್ದ್ 08 ಮುಟ್ಟ 3 ಮೂಜಿ ದಿನೊತ ದತ್ತಾತ್ರೇಯ ಜಯಂತಿ ಆಚರಿಪೆರ ಕರ್ನಾಟಕ ನೇಲ್ಯ ನ್ಯಾಯಂತಡೆ ಅನುವು ಮಲ್ತ್ ಕೊರ್ತುಂಡ್.
2018ಡ್ ಅಪಗದ ರಾಜ್ಯ ಸರ್ಕಾರ ದತ್ತಪೀಠೊಡು ಪೂಜಾ ವಿಧಿವಿಧಾನೊಲೆನ ಕರಿಪೆರ ಮುಸ್ಲಿಂ ಮೌಲ್ವಿ ಸೈಯದ್ ಗೌಸ್ ಮೊಹಿಯುದ್ದೀನ್‌ರೆನ್ ನೇಮಕ ಮಲ್ತ್ ಆದೇಶ ಕೊರ್ದಿತ್ತ್ಂಡ್. ಆಂಡ ಈ ಆದೇಶೊನು ಕರ್ನಾಟಕ ನೇಲ್ಯ ನ್ಯಾಯಂತಡೆದ ಏಕ ಸದಸ್ಯ ಪೀಠ ರದ್ದ್ ಮಲ್ದಿತ್ತ್ಂಡ್. ಈ ರದ್ದ್ ಮಲ್ದಿನ ಆದೇಶೊನು ಪ್ರಶ್ನಿತ್‌ದ್ ಸಂದಾದಿತ್ತಿನ ನಿನ್ನಿಬಿನ್ನಪುದ ವಿಚಾರಣೆನ್ ನ್ಯಾಯಮೂರ್ತಿಲಾಯಿನ ಅಲೋಕ್ ಅರಾಧೆ ಬೊಕ್ಕ ವಿಶ್ವಜಿತ್ ಶೆಟ್ಟಿ ಮೊಕ್ಲೆನ ಮುತಾಲಿಕೆದ ವಿಭಾಗೀಯ ಪೀಠ ನಡಪಾದ್ ಕೊರ್ನ್ಡು.
ರಾಜ್ಯ ಸರ್ಕಾರೊದ ಪರ ವಾದ ಮಲ್ದಿನ ಅಡ್ವೊಕೇಟ್ ಜನರಲ್ ಪ್ರಭುಲಿಂಗ ನಾವದಗಿ, ಡಿಸೆಂಬರ್ 6, 7 ಬೊಕ್ಕ 8 ಗ್ ದತ್ತಾತ್ರೇಯ ಜಯಂತಿ ಆಚರಿಪುನ ಅಟ್ಟನೆ ಆತ್ಂಡ್. ದೇವಲ್ಯೊಡು ಪೂಜಾ ವಿಧಿವಿಧಾನ ಕರಿಪುನ ವಿಚಾರೊಲೆನ್ ತೂವೊನ್ರ ಮಲ್ದಿನ ವ್ಯವಸ್ಥಾಪನಾ ಸಮಿತಿ ಬೋಡಾಪಿನ ಮಾತ ವ್ಯವಸ್ಥೆಲೆನ್ ಮಲ್ತೊಂದುಂಡು. ಮಾತಾ ಭಕ್ತೆರ್ ದತ್ತ ಪೀಠೊದ ದತ್ತ ಪಾದುಕೆಗ್ ಪೂಜೆ ಮನ್ಪೆರಗುಲ್ಲೆರ್ ಪಂದ್ ಪಂಡೆರ್.
ಈ ಬಗೆಟ್ ಬಾರಿ ಕುಸಿಟ್ ಪಾತೆರ್ನ ಕಿನ್ಯಮಗಲ್ನೂರು ಶಾಸಕೆ ಸಿ. ಟಿ. ರವಿ ಬಡಕಾಯಿದ ಅಯೋಧ್ಯೆ, ಹಿಂದೂಲೆನ ಪವಿತ್ರ ಕ್ಷೇತ್ರ ದತ್ತಾತ್ರೇಯ ಪೀಠೊಗು ನೇಮಕ ಆತಿನ ವ್ಯವಸ್ಥಾಪನಾ ಸಮಿತಿ ರದ್ದ್ ಮನ್ಪೆರ ಪಾಡಿನ ಅರ್ಜಿಯೇ ರದ್ದಾತ್ಂಡ್. ಈ ಮಣ್ಣ್‌ದ ಕಾನೂನುನು ದೆರ್ತ್ ಪತ್ತಿನ ಐತಿಹಾಸಿಕ ತೀರ್ಪು ಪಂದ್ ಪಂಡೆರ್.
ಮಾತ ವಾದೊಲೆನ್ ಕೇಂಡಿನ ಪೀಠ ಸದ್ಯೊಗು ದತ್ತಾತ್ರೇಯ ಜಯಂತಿ ಕರಿಪೆರ ಅನುವು ಮಲ್ತ್ ಕೊರ್ದು, ಎಚ್ಚಿನ ವಿಚಾರಣೆನ್ 2023 ತ ಜನವರಿ 12 ಕ್ ನಡಪಾವ ಪಂದ್ ಪಂಡ್ಂಡ್.
ವಿಶ್ವ ಹಿಂದೂ ಪರಿಷತ್ ಬಜರಂಗದಳೊದ ಕಡೆರ್ದ್ ದತ್ತಮಾಲಾ ಅಭಿಯಾನ ಸುರುವಾತ್ಂಡ್. ಬಾರಿ ಎಚ್ಚಿನ ಸಂಖ್ಯೆಡ್ ಮಾಲಾಧಾರಿಲು ಈ ಸರ್ತಿ ದತ್ತಾತ್ರೇಯ ಪೀಠೊಡು ಸೇರುನ ನಿರೀಕ್ಷೆ ಉಂಡು.