Last updated on December 1st, 2022 at 04:05 pm
ತುಳುನಾಡ್ದ ದೈವೊಲೆನ ಕಾರ್ನಿಕೊನು ಪತೊಂದು ದಂದೆ ಮಲ್ಪರೆ ಪಿದಡಿನ ನಮಕ್ ಅಲ್ಪಲ್ಪ ತೆರಿದ್ ಬರೊಂದುಂಡು. ಬೆಂಗಳೂರು, ಮೈಸೂರುಡು ಪೂರಾ ಕಾಸ್ ಕೊರ್ಲೆ ಗಂದ ಕೊರ್ಪ, ಪೇಟಿಯಂ ಮಲ್ಪುಲೆ ನಿಕಲೆನ ಕಷ್ಟ ಪರಿಹಾರ ಆಪುಂಡು ಪನ್ಪಿಲೆಕ್ಕ ದೈವೊಲೆನ ಪುದರ್ ಒಟ್ಟಾರೆ ಗಲಸ್ ದ್ ಮೂಲ ನಂಬಿಕೆದ ಮುದೆಲ್ ಗದ್ದಾವುನ ಪುನೆಪುನು ಮಲ್ತೊಂದುಲ್ಲೆರ್. ಈ ವಿಷಯ ತುಳುನಾಡ್ದ ದೈವಾರಾಧಕೆರೆಗ್ ಬಾರೀ ಪಿಸಿರ್ ಬೊಕ್ಕ ಮಂಡೆಬೆಚ್ಚ ಕೊರ್ತುಂಡು. ಈತ್ ಮಾತ್ರ ಅತ್ತಂದೆ ಕಾಂತಾರ ಪಿಚ್ಚರ್ ಬತ್ತಿಬೊಕ್ಕ ಈ ಮರ್ಲ್ ನನಲಾತ್ ಜಾಸ್ತಿ ಆತ್ಂಡ್. ಕಾಂತಾರ ಗುಳಿಗೆ, ಪಂಜುರ್ಲಿ ಪನ್ದ್ ಒಟ್ಟಾರೆ ದೈವ ನಂಬರೆ ಸುರು ಮಲ್ದೆರ್.
ಈ ದಿಸೆಟ್ ನಮ್ಮಕುಡ್ಲ ಚಾನೆಲ್ದಕುಲು ಬೊಕ್ಕ ತುಳುನಾಡ್ದ ಸಾಮಾಜಿಕ ಪೊರುಂಬಾಟಗಾರೆ ದೀಪು ಶೆಟ್ಟಿಗಾರ್ ಸೇರ್ದ್ ದೊಡ್ಡಬಳ್ಳಾಪುರದ ಪೊಂಜೊವುನ ಜಾತಕ ಪಿದಯಿ ಪಾಡ್ದೆರ್. ಪೊಂಜೊವುನ ಪುದರ್ ಮಂಜುಳಾ ಪನ್ದ್, ಆಲ್ ಅಲೆಗ್ ಕೊರಗಜ್ಜೆ ಕನೊಟು ಬತ್ತ್‌ದ್ ನಂಬರೆ ಪನ್ತೆ, ಎಂಕ್ ತುಳು ಬರೊಂದಿತ್ತಿಜಿ ಅಜ್ಜೆನೇ ತುಳು ಕಲ್ಪಾಯಿನಿ ಪನ್ದ್ ಪನೊಂದಿತ್ತೊಲು. ದೀಪು ಶೆಟ್ಟಿಗಾರ್ ಮೇರ್ ಅಲೆಡ ಪಾತೆರಿನ ಆಡಿಯೋ ಕೇಂಡಿನ ಅಲೆನ ಕಂಡನೆ ಮೋಹನ್ ಮೇರ್, ದೀಪು ಮೆರೆಗ್ ಲೆಪ್ಪು ಕೊರ್ದು ನಿಜ ಸಂಗತಿ ಪನೊಂಡೆರ್. ಮೊಕಲೆಗ್ ಮದ್ಮೆ ಆದ್ ಪದಿನೈನ್ ವರ್ಸ ಆಂಡ್, ಅಲೆಗ್ ತುಳು ಸುರುವೇ ಬರೊಂದಿತ್ತ್ಂಡ್, ಮೋಲು ಕಂಡನನ್ ಬುಡ್ದ್ ಮಂಡ್ಯದ ಕುಡೊರಿಯನೊಟ್ಟುಗು ಪೋದಿತ್ತೊಲು. ಮೂಜಿ ಪೊಣ್ಣು ಜೋಕುಲು ಉಲ್ಲ ಪನ್ದ್ ತೆರಿದ್ ಬೈದ್ಂಡ್. ಮೊಲೆನ ಸುದ್ದಿ ಸೋಶಿಯಲ್ ಮೀಡಿಯಾ ಬೊಕ್ಕ ನ್ಯೂಸ್‌ಲೆಡ್ ಬತ್ತಿನೇ ಇತ್ತೆ ನಾಪತ್ತೆ ಆತೊಲು ಪನ್ದ್ ಸುದ್ದಿ.
ಈತ್ ಮಾತ್ರ ಅತ್ತ್ ಮೈಸೂರುಡ್ಲಾ ತುಳುನಾಡ್ದ ದೈವೊಲೆನ್ ಪತೊಂದು ದಂದೆ ಮಲ್ತೊಂದಿಪ್ಪುನ, ತುಳುನಾಡ್ದಕುಲೇ ಅಲ್ಪ ಪೋದು ಕೋಲ ಕಟ್ಟಿನ ಪೂರಾ ವಿಷಯ ನಮ್ಮ ಕುಡ್ಲ ಚಾನೆಲ್ಡ್ ತೆರಿದ್ ಬತ್ತ್ಂಡ್.
ಮರಿ ತುಚ್ಚಿಂಡ ಮರ್ದ್ ಉಂಡು ಆಂಡ ಮಣ್ಣ್ ತುಚ್ಚಿಂಡ ಇಜ್ಜಿ ಪನ್ದ್ ನಮ್ಮ ಪೆರಿಯಾಕುಲು ಪನೊಂದಿತ್ತೆರ್. ದೈವಾರಾಧನೆ ಅಜೆ ತಪ್ಪರೆ ಪಿದಯಿದಕುಲು ಮಾತ್ರ ಅತ್ತ್ ಅಲ್ಪ ಪೋದು ಸೇವೆ ಮಲ್ಪುನ, ಅಕಲೆಗ್ ಅಲ್ಪ ದೈವ ನಂಬರೆ ಸಕಾಯ ಮಲ್ತಿನ ಪ್ರತಿಯೊರಿ ತುಳುವನಲ ತಪ್ಪು. ದೈವೊಲು ತುಳುವ ಸೀಮೆ, ಕುಟುಮ, ಊರು ಬುಡ್ದ್ ತಮೆರಿ ದಾಂತಿ ಊರುಲೆಕ್ ಪೋಪಿಲೆಕ್ಕ ಮಲ್ತಿನಿ ಏರ್? ನಾಟಕ, ಪಿಚ್ಚರ್ಲೆಡ್ ದೈವೊಲೆನ್ ತೂಪಾವುನ ಸಮನಾ? ಆರಾಧನ ಪ್ರಕ್ರಿಯೆಗ್ಲಾ ರಂಗ ಪ್ರಕ್ರಿಯೆಗ್ಲಾ ಎತ್ವಾಸ ದಾಂತಿಲೆಕ್ಕ ಮಲ್ತಿನಿ ಏರ್? ಉಂದು ಮಾತೆಕ್ಕ್ ತುಳುವೆರ್ ಮದಿಪೊಡು. ತುಳುವೆರೇ ಮದಿಪೊಡು.