ತುಳುನಾಡ್ದ ಕಂಬುಲೊಡು ಗಿರ್ದೆರುಲೆರ್ದ್ ಜಾಸ್ತಿ ಭಾಷಣೊಲು ನಡತೊಂದುಂಡಾ?

Last updated on December 7th, 2022 at 09:59 am

ತುಳುವೆರೆ ಪರಪೋಕುದ ಬೆನ್ನಿದ ನಿಲೆಟ್ ಕರಿತೊಂದಿತ್ತಿನ ಕಂಬುಲ ಇನಿ ಒಂಜಿ ಗೊಬ್ಬು ಆತ್ಂಡ್. ಆವಡ್ ಮಲ್ಲೆತ್ತ್, ಅಂಚಾಂಡಲ ನಮ್ಮ ಪರಪೋಕು ಒರಿದ್ಂಡ್ ಪನ್ದ್ ಗೆರೆತೊನೊಲಿ. ಆಂಡ ಇಂಚಪ್ಪೊಗು ತುಳುವೆರ್ ಪಂಡಿನ ದೂರು ದಾದ ಪಂಡ ಕಂಬುಲದ ಕಲಟ್ ಎರು ಗಿಡಪುನೆರ್ದ್ ಜಾಸ್ತಿ ಭಾಷಣೊಲು ಆವೊಂದುಂಡು. ಆನೆರ್ದ್ ಪತ್ತಿನ ಮುನೆ ಮುಟ್ಟಲ ಭಾಷಣನೇ! ಈ ಭಾಷಣದಕಲೆನ ಕಿರಿಕಿರಿ ಒಡೆ ಮುಟ್ಟ ಪಂಡ ಕೆಲವೆರ್ ಕಾಲಿ ಭಾಷಣ ಕೊರಿಯರೆನೇ ಒಲ್ಪ ಪೂರಾ ಕಂಬುಲ ಆಪುಂಡಾ ಅಡೆಗ್ ಎತ್ತುನಕುಲುಲಾ ಉಲ್ಲೆರ್. ಚಲ್ಲೆ ಪಿಲ್ಲೆಲು, ಮಾಜಿ ಹಾಲಿನಕುಲು, ಗ್ರಾಮ ಪಂಚಾಯಿತಿರ್ದ್ ಪತ್ತಿನ ಕೇಂದ್ರ ಸರಕಾರ ಮುಟ್ಟದಕುಲು, ಅವ್-ಉಂದು ಸಂಘಟನೆಲು ಬತ್ತಿನಕಲೆಗ್ ಮಾತಾ ಮೈಕ್ ಕೊರ್ಪಿನೆನ್ ಕಂಬುಲದ ಮಲ್ಪಾವುನಕುಲು ಉಂತಾವೊಡು. ಸ್ಟೇಜ್ ಪ್ರೋಗ್ರಾಂ ಒರ ಮಲ್ತ್ ಉಂತಾಂಡ ಎಡ್ಡೆ, ಉಂದು ದಾಲ ಅತ್ತ್ ಸುರುರ್ದ್ ಅಕೇರಿಮುಟ್ಟಲ ನಡು ನಡುಟು ಬತ್ತಿನ ಮಾತೆರೆಗ್ಲಾ ಮೈಕ್ ಕೊರುಂಡ ಎಂಚ?

ಸತ್ಯ ಪನೊಡ ಜನಕುಲು ಬರ್ಪಿನ ಎರುಕುಲೆನ್ ತೂವರೆ, ಎರು ಗಿಡಪುನೆನ್ ತೂವರೆ. ಈ ಅರ್ದಂಬರ್ದ ಪಾತೆರಿನಕಲೆನ ಸೋಗಲೆ ಕೇನರೆ ಅತ್ತ್. ನನೊಂಜಿ ಕಂಬುಲ ಆಯೋಜಕೆರೆಡ ಬಿನ್ನಪು, ನಿಕುಲು ತುಳುನಾಡ್ ಡ್ ಕಂಬುಲ ಮಲ್ಪುನಗ ತುಳು ಬರ್ಪಿನಕಲೆಗ್, ತುಳು ಪಾತೆರಿಯರೆ ಪೆರ್ಮೆ ಮಲ್ಪುನಕಲೆಗ್ ಮಾತ್ರ ಮೈಕ್ ಕೊರ್ಲೆ. ತುಳು ತೆರಿದ್ಲಾ ಬಿಕ್ಕ್ ದ್ ಬೇತೆ ಬಾಸೆ ಪಾತೆರುನಕಲೆಗ್ ದಯಮಲ್ತ್ ಕೊರೊಡ್ಚಿ.

ಬೊಕ್ಕ ಸ್ಟೇಜ್ಡ್ ಕುಲ್ಲರೆ ಎರ್ಕಾದ್ ಉಂತುನಕಲೆಡ ಒಂಜಿ ಬಿನ್ನಪು. ನಿಕಲೆನ್ ಲೆತ್ತೆರಾ, ಪೋಲೆ ರಡ್ಡ್ ಪಾತೆರ ಪನ್ಲೆ ಅವ್ವತ್ತಂದೆ ಗಂಟೆಗಟ್ಟಲೆ ಪುರಾಣ ಬೊಡ್ಚಿ. ಕಂಬುಲ ಕಂಬುಲ ಆದೇ ಉಪ್ಪಡ್ ಒವ್ವೇ ಕ್ಯಾಂಪೇನ್ ಆಪಿನಿ ಬೊಡ್ಚಿ.