Last updated on December 6th, 2022 at 01:18 pm
ಡಿಸೆಂಬರ್ 15 ರ್ದ್ 17 ಮುಟ್ಟ ಮಲೇಶಿಯಾಡ್ ನಡಪರೆಗುಪ್ಪುನ ಅಂತರಾಷ್ಟ್ರೀಯ ವರ್ಲ್ಡ್‌ಕಪ್ ಥ್ರೋಬಾಲ್ ಚಾಂಪಿಯನ್‌ಶಿಪ್ ಗ್ ಭಾರತೊದ ಕೂಟೊಗು ತುಳುನಾಡ ಒಡಿಪು ತಾಲೂಕುದ ಕೋಡಿಬೆಂಗ್ರೆದ ವೈಷ್ಣವಿ ಜಿ.ಸುವರ್ಣ ಅಜತ್ ಬೈದಿತ್ತೆರ್. ಆಂಡ ಇಲ್ಲದ ಬಂಙೊಲೆನ ನಡುಟು ಈ ಗೊಬ್ಬುದಲೇಸ್‌ಗ್ ಪೋಪುನ ಸಾಧ್ಯ ಆದಿಜ್ಜಂಡ್. ಆಂಡ ಇತ್ತೆ ಊರ್‌ದ ಮಲ್ಲ ಉಡಲ್‌ದ ದಾನಿಲೆನ ಸಾಕಾರೊಡು ವೈಷ್ಣವಿಗ್ ತಿಕ್ಕ್‌ದಿನ ಈ ಅವಕಾಶ ಒರಿದ್ಂಡ್.
ಭಾರತೊದ ಕೂಟೊಗು ಅಜತ್ ಬೈದಿನ 15 ಜನೊಟು ತುಳುನಾಡ ವೈಷ್ಣವಿಲಾ ಒರ್ತಿ. ಬ್ರಹ್ಮಾವರೊದ ಎಸ್.ಎಮ್.ಎಸ್.ಕಾಲೇಜ್‌ದ ಸುರುತ್ತ B.Com. ಓದೊಂದುಪ್ಪುನ ವೈಷ್ಣವಿಗ್ ಎಲ್ಯರ್ದಿಂಚಿಲಾ ಗೊಬ್ಬುನೇಟ್ ಬಾರಿ ಮನಸ್, ಜಿಲ್ಲಾಮಟ್ಟೊ, ರಾಜ್ಯಮಟ್ಟೊ ಬೊಕ್ಕ ರಾಷ್ಟ್ರಮಟ್ಟೊಡ್ ಪಾಲ್ ಪಡೆದ್ ಇನಾಮ್ ಗೆಂದ್‌ದೆರ್
ಛತ್ತೀಸ್‌ಘಡಟ್ ನಡತಿನ ರಾಷ್ಟ್ರೀಯ ಥ್ರೋಬಾಲ್ ಪಂದ್ಯಾಕೂಟೊಡ್ ಕರ್ನಾಟಕ ರಾಜ್ಯೊದ ಕೂಟೊಡು ಇತ್ತೆರ್. ಮೈಸೂರ್‌ಡ್ ನಡತಿನ ರಾಷ್ಟ್ರಮಟ್ಟೊದ ಥ್ರೋಬಾಲ್ ಪಂದ್ಯಾಟಡ್ ಸುರುತ್ತ ಇನಾಮ್ ಗೆಂದ್‌ದೆರ್. ಮೂಜಿ ಸರ್ತಿ ಕರ್ನಾಟಕ ರಾಜ್ಯಮಟ್ಟೊದ ಥ್ರೋಬಾಲ್ ಡ್ ಸುರುತ್ತ ಇನಾಮ್, ಬರ್ಚಿ ದಕ್ಕುನ, ಗುಂಡು ದಕ್ಕುನ, ಚಕ್ರ ದಕ್ಕುನ ಪಂತೊಲೆಡ್ ರಾಜ್ಯಮಟ್ಟೊಡ್ ಇನಾಮ್ ಗೆಂದುದೆರ್.
ಮರಕ್ಕಲ ಕುಟುಮೊರ್ದ್ ಬೈದಿನ ವೈಷ್ಣವಿ ಕೋಡಿಬೆಂಗ್ರೆದ ಗೋವಿಂದ ಮೆಂಡನ್ ಬೊಕ್ಕ ಬೇಬಿ ಸುವರ್ಣ ಮೊಕ್ಲೆನ ಮಗಲ್. ಮೀನ್ ಪತ್ತ್‌ದ್ ತಿಕ್ಕುನ ಪಣವುಡ್ ಇಲ್ಲದ ಖರ್ಚಿ ಪೋಪಿನವ್ವೇ ಕಷ್ಟ ಆದುಪ್ಪುನಗ ರಾಷ್ಟ್ರಮಟ್ಟೊಡ್ ಸಾಧನೆ ಮಲ್ತ್‌ದ್, ಅಂತರಾಷ್ಟ್ರೀಯ ಮಟ್ಟೊಡ್ ಸಾಧನೆ ಮಲ್ಪರೆಗ್ ಪಿದಾಡ್ದಿನ ಮೇರ್ ತುಳುನಾಡ್‌ಗೇ ಪೆರ್ಮೆ. ಮೆರೆನ ಸಾಧನೆಗ್ ತುಳುನಾಡ ಮಾತ ದೈವ-ದೇವೆರ್ ಬೆರಿಬಲ ಕೊರ್ದು ಕಾತೊಂದು ಬರಡ್ಂದ್ ತುಳುವಾಣಿದ ಕಡೆರ್ದ್ ನಟ್ಟೊನುವ.