Last updated on January 12th, 2023 at 01:07 pm
ಊಬಾರ್: ಮುಲ್ಪದ ಸರ್ಕಾರಿ ಫಸ್ಟ್ ಗ್ರೇಡ್ ಕಾಲೇಜಿಡ್ ಜನವರಿ 13 ರ್ದ್ 17 ಮುಟ್ಟ ಅಖಿರ ಭಾರತ ರಾಷ್ಟ್ರೀಯ ಮಟ್ಟೊದ ಬಾಲ್ ಬ್ಯಾಡ್ಮಿಂಟನ್ ಗೊಬ್ಬು ನಡಪರೆಗುಂಡು. ಕಾಲೇಜಿದ ಪಿರವು ಮೆಯಿಟ್ ಉಂಡು ಮಲ್ದಿನ ಪೊಸ ಮೈದಾನೊಡು ಮಲ್ಲ ಮಟ್ಟ್‌ದ ಅಟ್ಟನೆ ನಡತೊಂದುಂಡು.
ಕಾಲೇಜಿದ ಪಿರವು, ನೇತ್ರಾವತಿ ಸುದೆಕ್ ತಾಗೊಂದು ಇಪ್ಪುನ ಗುಡ್ಡೆದ ಲೆಕಂತಿ ಜಾಗೆನ್ ತಟ್ಟ್ ಮಲ್ತ್‌ದ್ ಮಲ್ಲ ಮೈದಾನ ಲೆಕ ಮಲ್ದ್ಂಡ್. ಗೊಬ್ಬುಡ್ ದೇಶೊದ ಬೇತೆ ಬೇತೆ ವಿಶ್ವವಿದ್ಯಾನಿಲಯೊಲೆನ ಸುಮಾರ್ 89 ಕೂಟೊಲು ಪುದರ್ ಕೊರ್ತ, 1000 ಜನ ಗೊಬ್ಬುಗಾರೆರ್, 200 ಜನ ತೀರ್ಪುಗಾರೆರ್, 300 ಜನ ಅಧಿಕಾರಿಲು ಸೇರ್ದ್ ಬೇತೆ ಬೇತೆ ರಾಜ್ಯೊಲೊನ 1500ರ್ದ್‌ಲಾ ಎಚ್ಚಿನ ಜನ ಪಾಲ್‌ಗೆತೊನರ ಉಲ್ಲೆರ್. ಆಜಿ ಅಂಗಣೊಲೆಡ್ ಗೊಬ್ಬು ನಡಪುಂಡು ಪಂದ್ ಕಾಲೆಜಿದ ಫಿಸಿಕಲ್ ಡೈರೆಕ್ಟರ್ ಪ್ರವೀಣ್ ಕುಮಾರ್ ತೆರಿಪಾಯೆರ್.
ಈ ಜಾಗೆ ಸುದೆಬರಿಟುಪ್ಪುನೆರ್ದಾವರ ಜಾಗ್‌ರ್ತೆದ ದಿಟ್ಟಿಡ್ 100 ಜನ ಸ್ವಯಂಸೇವಕೆರೆನ್ ಉಂತಾವ. ಒಟ್ಟುಗು 10 ಜನ ರಾಷ್ಟ ಮಟ್ಟೊದ ತಾಂತ್ರಿಕ ಅಧಿಕಾರಿಲು, 50 ಜನ ದೈಹಿಕ ಶಿಕ್ಷಕೆರ್ ಇಪ್ಪುವೆರ್ ಪಂದ್ ಆರ್ ತೆರಿಪಾಯೆರ್.
ಈ ಗೊಬ್ಬುದ ಉದಿಪನ ಜನವರಿ 13 ಕ್ ಬಯ್ಯಡ್ ಕರ್ನಾಟಕ ಸರ್ಕಾರೊದ ಜಕ್ಕೆರೆ ಅಂಚೆನೇ ಗೊಬ್ಬು ಸಚಿವೆ ಕೆ ಸಿ ನಾರಾಯಣ ಗೌಡೆರ್ ಮನ್ಪೆರಗುಲ್ಲೆರ್. ಶಾಸಕೆ ಸಂಜೀವ ಮಠಂದೂರ್ ಕೊಡಿ ರಾಪಾದ್, ಕುಡ್ಲ ವಿಶ್ವವಿದ್ಯಾನಿಲಯೊದ ಉಪಕುಲಪತಿ ಪಿ ಸುಬ್ರಹ್ಮಣ್ಯ ಎಡಪಡಿತ್ತಾಯೆರ್ನ ಗುರ್ಕಾರ್ಮೆಡ್ ಉದಿಪನ ಲೇಸ್ ನಡಪರೆಗುಂಡು. ಕನ್ನಡೊ ಬೊಕ್ಕ ಪರಪೋಕು ಇಲಾಖೆದ ಸಚಿವೆ ವಿ ಸುನಿಲ್ ಕುಮಾರ್‌ಲಾ ಒಟ್ಟುಗುಪ್ಪೆರ್.
ಇಸೇಸೊಲು:
ಪರತಿರಿಟೇ ಕಡೀರ ಸರ್ತಿ ಸರಕಾರಿ ಕಾಲೇಜಿಡ್ ಇಂಚಿನ ಲೇಸ್ ನಡತೊಂದುಪ್ಪುನು
ಗ್ರಾಮೀಣ ಭಾಗೊದ ಕಾಲೇಜಿಡ್ಲಾ ಉ್ಂದುವೇ ಕಡೀರ ಸರ್ತಿ
ಆಜಿ ಅಂಗಣೊಲೆಡ್ ಗೊಬ್ಬು
89 ಕೂಟೊಲ್ನ 1500ರ್ದ್‌ಲಾ ಎಚ್ಚಿನ ಜನ ಪಾಲ್‌ಗೆತೊನುವೆರ್
ಗೊಬ್ಬು ತೂವರೆ ಸಾರ್ವಜನಿಕೆರೆಗ್ ಅನುವು