ಪಡ್ಡೆದ್ರ ಜಾರಂದಾಯ ಸಾನೊಡು ದೈವದ ಕಾರ್ನಿಕ! ದೈವಸ್ಥಾನದ ವಿರುದ್ದ ಕೋರ್ಟುಗು ಪೋದು ನೇಮೊಗು ತಡೆ ಕನತಿನ ಜನ ತೀರಿಯೆರ್

Last updated on January 8th, 2023 at 08:40 am

ಒಡಿಪು ಪಡ್ಡೆದ್ರದ ಪಡ್ಡಾಯಿಬಿತ್ತಿಲ್ ಜಾರಂದಾಯ ಸಾನದ ವಿರುದ್ದ ಸುರುತ ಸಲ ಪನ್ಪಿಲೆಕ್ಕ ಒರಿ ಕೋರ್ಟುಗು ಪೋದಿತ್ತೆರ್, ಕೋರ್ಟುರ್ದು ಸಾನೊಡು ನಡಪೊಡಾಯಿನ ವರ್ಸಾದಿದ ಕೋಲೊಗು ತಡೆಯಾಜ್ಞೆ ಕನತ್’ದ್ ಕೋಲ ಉಂತಾದಿತ್ತೆರ್. ಕೋರ್ಟುರ್ದು ತಡೆಯಾಜ್ಞೆ ಕನತಿನ ಮನದಾನಿಯೇ ಆರ್ ಕುಸ್ಕ್’ದ್ ಬೂರ್ದು ತೀರಿನವು ಕಾಕತಾಳೀಯನಾ ಅತ್ತ್ ದೈವದ ಕಾರ್ನಿಕನಾ ಪನ್ದ್ ಮಾತೆರ್ ಗೆರೆಪುಲೆಕ್ಕ ಆತ್ಂಡ್.

ಪಡ್ಡಾಯಿಬಿತ್ತಿಲ್ ಜಾರಂದಾಯ ಸಾನ ಅಲ್ಪ ಸುತ್ತಮುತ್ತದ ಜಾಗೆಲೆಡ್ ಬಾರೀ ಕಾರ್ನಿಕದ ಜಾಗ. ಮೂಲು ವರ್ಸೊಗೊರ ನೇಮ ನಡತೊಂದಿತ್ತ್ಂಡ್. ಈ ಸಾನ ತೂವೊನರೆ ಪಡ್ಡಾಯಿಬಿತ್ತಿಲ್ ಜಾರಂದಾಯ ಬಂಟ ಸೇವಾ ಸಮಿತಿ ಪನ್ಪಿ ಟ್ರಸ್ಟ್ ಉಂಡು. ಈ ಸಮಿತಿಡ್ ಪ್ರಕಾಶ್ ಶೆಟ್ಟಿ ಗುರ್ಕಾರ್ಲಾದಿತ್ತೆರ್. ಸಮಿತಿ ಪಗತಿನೇ ಮೇರ್ ಬೇತೆನೆ ಟ್ರಸ್ಟ್ ಮಲ್ತ್ ಸಾನದ ಇಲ್ಲದ ಜಯ ಪೂಜಾರಿ ಮೇರೆನ್ ಗುರ್ಕಾರೆ ಆದ್ ಮಲ್ತೆರ್. ಮೂಲ ಟ್ರಸ್ಟ್ ನ್ ಬುಡ್ದ್ ಪೊಸ ಟ್ರಸ್ಟ್ ಮಲ್ತಿನ ಪ್ರಕಾಶ್ ಶೆಟ್ಟಿ ಸಾನ ಎಂಕ್ಲೆಗ್ ಸೇರ್ದಿನ ಪನ್ದ್ ಹಕ್ಕ್ ಸಾಧಿಸಾಯೆರೆ ತೂಯೆರ್.

ಜಾರಂದಾಯ ಬಂಟ ಸಾನದ ಸಮಿತಿದ ನಿರ್ಧಾರದಲೆಕ್ಕ ಈ ವರ್ಸ ವರ್ಸಾದಿದ ನೇಮ ಜನವರಿ 7ಕ್ಕ್ ನಡಪೊಡು ಪನ್ದ್ ನಿಗಂಟಾದಿತ್ತ್ಂಡ್. ಉಂದೆತ ವಿರುದ್ದ ಕೋರ್ಟುಗು ಪೋಯಿನ ಜಯಪೂಜಾರಿ ಬೊಕ್ಕ ಪ್ರಕಾಶ್ ಶೆಟ್ಟಿ ಕೋಲ ನಡಪಂದಿಲೆಕ್ಕ ಕೋರ್ಟುರ್ದು ತಡೆಯಾಜ್ಞೆ ಕನತೆರ್. ಡಿಸೆಂಬರ್ 23ಕ್ಕ್ ತಡೆಯಾಜ್ಞೆ ಕನತಿನ ಜಯ ಪೂಜಾರಿ ಡಿಸೆಂಬರ್ 24ಕ್ಕ್ ಅಚಾನಕ್ಕಾದ್ ಕುಸ್ಕುದು ಬೂರ್ದು ತೀರುವೆರ್. ಮೇರ್ ಅಲ್ಪನೇ ಕೈತಲ್ದ ತಂಬಿಲದವುಲು ಮಾತೆರ್ನ ಎದುರು ಕುಸ್ಕುದು ಬೂರ್ದು ತೀರಿನವು ಇತ್ತೆ ಜನಕುಲು ಪಾತೆರುಲೆಕ್ಕ ಆತ್ಂಡ್.

ಮೊಕುಲು ಕೋಲ ಕಟ್ಟುನ ಪಂಬದೆರೆಗ್ಲಾ ಪೋಡ್ಯಾದ್ ಎಂಕ್ಲೆಗ್ ಬೋಡಾಪಿಲೆಕ್ಕ ನುಡಿ ಕೊರೊಡು ಪನ್ದಿತ್ತೆರ್ಗೆ ಪನ್ಪಿನ ಇಸಯ ಬೊಲ್ಪುಗು ಬೈದ್ಂಡ್. ಜನವರಿ 7ಕ್ಕ್ ಬತ್ತಿನ ತಡೆಯಾಜ್ಞೆ ಪೋದಿತ್ತ್ಂಡ್ ಆಂಡ ಆನಿ ತೀರಿನ ಸಾನದಿಲ್ಲದ ಜಯ ಪೂಜಾರಿ ಮೆರೆನ ಬೊಜ್ಜ ಆಯಿನೆರ್ದಾವರ ಕೋಲ ದುಂಬು ಪಾಡ್ ಗ ಪನ್ದ್ ಸಮಿತಿ ನಿರ್ದಾರ ಮಲ್ದಿತ್ತ್ಂಡ್. ಆಂಡ ಊರುದಕಲೆನ್ ಎದುರು ಪಾಡೊಂದಿನ ಶೆಟ್ಟಿ ಬೊಕ್ಕ ಬೆಂಬಲಿಗೆರ್ ಆನಿಯೇ ಕೋಲ ನಡಪೊಡು ಪನ್ದ್ ಪಿದಡ್ದಿತ್ತೆರ್ ಪನ್ದ್ ತೆರಿದ್ ಬೈದ್ಂಡ್.

ಈತ್ ಪೂರಾ ಆಯಿನೇ ಊರುದ ಪತ್ತೇರೆ ಕೂಟದಕುಲು ಸೇರ್ದ್ 500 ವರಿಸೊರ್ದುಲಾ ಜಾಸ್ತಿ ಇತಿಹಾಸ ಉಪ್ಪುನ ಜಾರಂದಾಯ ಬಂಟ ಸೇವಾ ಸಮಿತಿ ಮಲ್ಪುನ ನಿರ್ದಾರದಲೆಕ್ಕ ನಡಪುಗ ಪನ್ಪಿ ತೀರ್ಮಾನೊಗು ಬೈದೆರ್ ಪನ್ದ್ ತೆರಿದ್ಂಡ್.