Last updated on January 24th, 2023 at 08:35 am
ಪೊಸದೆಲ್ಲಿ: ಎಂಕ್ ಒಮ್ಮುನ ಪೊಣ್ಣು ತಿಕ್ಕ್ಂಡ ಮದಿಮೆ ಆಪೆ ಪಂದ್ ಕಾಂಗ್ರೆಸ್ ನಾಯಕೆ ರಾಹುಲ್ ಗಾಂಧಿ ಪಂಡೊಂದೆರ್. ಯೂಟ್ಯೂಬ್‌ಡ್ ತೆನಸ್-ತಿರ್ಗಟದ ಮಿತ್ತರ್ಮೆ ಆಯಿನ ‘ಕರ್ಲಿ ಟೇಲ್ಸ್’ ದೊಟ್ಟುದ ಪಾತೆರಕತೆಡ್ ಆರ್ ತನ್ನ ಜೋಕುಲಾಟಿಕೆದ ದಿನೊತ ಇಸಯೊಲೆನ್,ತನ್ನ ಇಸ್ಟೊದ ತೆನಸ್‌ಲೆನ ಬಗ್ಗೆ ಅಂಚೆನೇ ರಾಜಕೀಯ ಬುಡ್ದ್ ಪಿದಯಿದ ಕೆಲ ಇಸಯೊಲೆನ ಬಗ್ಗೆ ಪಾತೆರ್ಯೆರ್.
ಮದಿಮೆ ಆಯೆರ ಒವ್ವೇ ಸಮಸ್ಯೆ ಇಜ್ಜಿ. ಎನ್ನ ಅಪ್ಪೆ-ಅಮ್ಮೆಲಾ ಬಾರಿ ಮೋಕೆಡ್ ವೈವಾಹಿಕ ಜೀವನೊನು ಕರಿತ್‌ನಕ್ಲು, ಒರ್ಯನೊರಿ ಬಾರಿ ಮೋಕೆ ಮಲ್ತೊಂದಿತ್ತೆರ್. ಅಕುಲೆನ್ ತೂವೊಂದು ಮಲ್ಲೆ ಆತೆ ಅಂಚಾದ್ ಎನ್ನ ನಿರೀಕ್ಷೆಲು ಒಂತೆ ಎಚ್ಚ ಉಲ್ಲ, ಒಮ್ಮುನ ಪೊಣ್ಣು ತಿಕ್ಕ್ಂಡ ಮದಿಮೆ ಆಪೆಂದ್ ರಾಹುಲ್ ಪಂಡೊಂದೆರ್.
ಈರೆನ ಕೈ ಪತ್ತೆರ ಬರ್ಪಿನಾರೆಡ ಇಂಚಿನನೇ ಗುಣ ಬೋಡು ಪನ್ಪಿನ ದಾಲ ಉಂಡೇಂದ್ ಕೇಂಡಿನೆಕ್, ಅಂಚ ದಾಲ ಇಜ್ಜಿ, ಎಂಕ್ ಬೋಡಿಪ್ಪುನ ಮೋಕೆ ತೋಜುವುನ ಅಂಚೆನೇ ಸಂವೇದನಾಶೀಲ ಪೊಣ್ಣು ಪಂದ್ ಪಂಡೆರ್. ಭಾರತ್ ಜೋಡೋ ಯಾತ್ರೆ ರಾಜಸ್ಥಾನೊಡುಪ್ಪುನಗ ನಡತಿನ ಈ ಪಾತೆರಕತೆದ ವೀಡಿಯೋನು ಕಾಂಗ್ರೆಸ್ ಐತಾರ ಸೋಷಿಯಲ್ ಮೀಡಿಯಾಡ್ ಪಟ್ಟೊಂದೆರ್.
ಎಂಕ್ ಮಾಸದ ವನಸ್ ಇಸ್ಟ, ಕಡ್ಲೆ, ಪೆಲಕಾಯಿ ಪತ್ತುಜಿ, ಕಬಾಬ್, ಟಿಕ್ಕಾ, ಆಮ್ಲೆಟ್ ಬಾರಿ ಇಸ್ಟ, ಎನ್ನ ಕಡೀರ್ದ ಕಾರ್ಪೋರೇಟ್ ಬೇಲೆಡ್ 3000 ಪೌಂಡ್‌ಗ್ ಬೆನ್ತೆ ಪಂದ್ ಈ ವೀಡಿಯೋಡ್ ಆರೆನ ಜೀವನೊದ ಕೆಲ ಇಸಯೊಲೆನ್ ಪಟ್ಟೊಂದೆರ್.