ಜಾತಿಗ್ ಯಾತ್ರೆ, ಧರ್ಮೊಗು ಯಾತ್ರೆ ಮಲ್ಪುನ ತುಳುವೆರ್ ಭಾಷೆಗಾದ್ ದಾಯೆಗ್ ಯಾತ್ರೆ ಮಲ್ಪುಜೆರ್?

Last updated on January 6th, 2023 at 09:51 am

ತುಳುವಪ್ಪೆನ ಸೋಲ್ ಪನ್ದ್ ಪನೊಡಾ ಅತ್ತ್ ತುಳುವೆರೆಡ ಒರ್ಮೆ ಇಜ್ಜಿ ಪನ್ದ್ ಪನೊಡಾ ತೆರಿಯುಜಿ. ಜಾತಿಗಾದ್ ಒಂಜಾಪಿನ ತುಳುವೆರ್, ಧರ್ಮೊಗಾದ್ ಒಂಜಾಪಿನ ತುಳುವೆರ್, ಭಾಷೆಗಾದ್ ಒಂಜಾಪುಜೆರ್? ಜಾತಿದ ಪಿರವು ಬರ್ಪಿನ ಮಠ ಮಾನ್ಯೊಲೆನ ಸ್ವಾಮಿಲು, ಧರ್ಮದ ಪಿರವು ಬರ್ಪಿನ ಸಂಘಟನೆ, ಧರ್ಮಾಧಿಕಾರಿಲು ಭಾಷೆದ ವಿಷಯ ಬನ್ನಗ ಮಾಯ ಆಪೆರ್? ಉಂದು ದಾಯೆಗ್ ಇಂಚ?

ಕರ್ನಾಟಕದ ಸಿಎಂ ಇತ್ತೆ ಕೇನಿ ಕೇನಿನಕಲೆಗ್ ಕೇನಿನೆನ್ ಕೊರೊಂದುಲ್ಲೆರ್ಗೆ. ಜಾತಿ ಸಂಘಟನೆಲು ಪೋಂಡ ಪ್ರಾಧಿಕಾರ ಕೊರ್ಪೆರ್ಗೆ, ಧರ್ಮ ಸಂಘಟನೆಲು ಪೋಂಡ ಅನುದಾನ ಕೊರ್ಪೆರ್ಗೆ, ಅಂಚಾದುಪ್ಪುನಗ ಭಾಷೆ ಸಂಘಟನೆಲು ಪೋಂಡ ನಮ್ಮಪ್ಪೆ ಬಾಸೆಗ್ ಮಾನಾದಿಗೆ ಕೊರಯೆರಾ?

ಧರ್ಮ ಸಮಾವೇಶೊಗು ಒಟ್ಟಾಪಿನ ತುಳುವೆರ್ ತುಳುವಪ್ಪೆಗಾದ್, ಅಳಿಯೊಂದಿತ್ತಿನ ತುಳು ಭಾಷೆನ್ ಒರಿಪಾವರೆ ಒಟ್ಟಾವಯೆರಾ? ತುಳುನಾಡ್ ಡ್ ಧರ್ಮ ಒರಿದಿನಿ ತುಳು ಭಾಷೆರ್ದ್. ತುಳು ಭಾಷೆ ಅಳಿಂಡ ಧರ್ಮ ಉಂಡಾ? ಅಪ್ಪೆರ್ದ್ ಮಲ್ಲ ಸತ್ಯ-ಧರ್ಮ ಉಂಡಾ? ನಾಲಯಿದ ಕೊಡಿಟ್ ಉಂತುದ್, ವಿವೇಚನೆ ಕೊರ್ದು, ಪ್ರಪಂಚ ತೂವರೆ ಕಲ್ಪಾಯಿನ ತುಳುಲಾ ನಮ್ಮ ಅಪ್ಪೆ ಅತ್ತಾ?

ಕೆಲವೊರ ಎನ್ನುಂಡು ನಮ್ಮ ಊರುಡು ಉಪ್ಪುನ ಮಲ್ಲ ಮಲ್ಲ ಮಠ ಮಾನ್ಯೊಲು, ಲೋಕೊರ್ಮೆ ಪುಗಾರ್ತೆದ ದೇವಲ್ಯೊಲೆನ್ ನಡಪಾವುನ ಜನಕುಲು ಮಾತೆರ್ನ ಅಪ್ಪೆ ಬಾಸೆ ತುಳು. ಮೊಕಲೆನ ಎದುರು ಮಾತಾ ಸರಕಾರಲಾ ಬತ್ತ್ ಪುಡ್ಯೊನುಂಡು, ಮೊಕುಲು ಒಂಜಿ ಪಾತೆರ ಪಂಡ ತುಳುಕು ಮಾನಾದಿಗೆ ತಿಕ್ಕಂದಾ? ಆಂಡಲ ಮೊಕಲೆನ ದೊಂಡೆ ಉಡರ್ದ್ ಪಾತೆರ ದಾಯೆಗ್ ಬರ್ಪುಜಿ?

ಎದುರುಡು ಮೆಗ್ಯೆ ಪಲಯೆ ಪನೊಂದು ಒರಿಯನ್ ತೂಂಡ ಒರಿಯಗಾವಂದಿನ ಮಲ್ಲ ಮಲ್ಲ ಜಾತಿದಕಲೆನ್ ಕಟ್ಟ್ ಪಾಡಿನ ಸೂತ್ರ ತುಳು ಅತ್ತಂದೆ ಬೇತೆ ಒವ್? ತುಳು ಪನ್ಪಿ ಸೂತ್ರ ಕಡಿಂಡ ನಮ್ಮ ಸಂಸ್ಕೃತಿ, ನೀತಿ, ಧರ್ಮೊಗು ಅರ್ಥ ಇಜ್ಜಿ.

ಈತ್ ಪೂರಾ ಅಧಿಕಾರ ಇತ್ತ್ ದ್ಲಾ ತುಳುವೆರೆ ಕೈಟ್ ದಾಲ ಮಲ್ಪರೆ ಆಪುಜಿ ಪಂಡ, ಪಿಲಿತ ಕಿಲೆಟ್ ಪುಟ್ಟಿ ಪೆರ್ಗುಡೆಲಾದ್ ಪೋಯೆರಾ ತುಳುವೆರ್ ಪನ್ಪಿ ಡೌಟು ಬರ್ಪುಂಡು.
ದಾನೆ ಒರಿಯೇ ಒರಿ ತುಳು ಬಾಸೆಗಾದ್ ತುಳುವೆರೆನ್ ಒಂಜಿ ಮಲ್ಪುನ ನಾಯಕೆ ಇಜ್ಜೆನಾ? ದಾಯೆಗ್ ಮಾತಾ ಜಾತಿ ಧರ್ಮ ಸಂಘಟನೆಲ್ ಒಂಜಿ ಮಲ್ತ್ ಪಾದಯಾತ್ರೆ ಮಲ್ಪುಜೆರ್ ತುಳುವೆರ್? ತುಳು ಭಾಷೆಗ್ ರಾಜ್ಯ ಬಾಸೆದ ಮಾನಾದಿಗೆಗ್? ಜಾತಿದ ವಿಷಯೊಡು ಬರ್ಪಿನ 50% ಜನ ತುಳುತ ವಿಷಯೊಡು ಬತ್ತೆರ್ಡ ಇನಿ ತುಳುಕು ಮಾನಾದಿಗೆ ಕೊರ್ಲೆ ಪನ್ದ್ ನಟ್ಟುನ ಪರಿಸ್ಥಿತಿ ಬೈದಿತ್ತಂದ್.