Last updated on February 6th, 2023 at 10:21 am
ತುಳುನು ರಾಜ್ಯದ ರಡ್ಡನೇ ಅಧಿಕೃತ ಭಾಷೆ ಮಲ್ಪುನ ನಿರ್ಣಯೊನು ಕರ್ನಾಟಕ ಸರಕಾರ ಮಲ್ತ್ ಅವೆತ ವರದಿ ಅಟ್ಟನೆ ಮಲ್ಪರೆ ಮೋಹನ್ ಆಳ್ವ ನೇತೃತ್ವದ ಸಮಿತಿ ರಚನೆ ಆತ್ಂಡ್. ಈ ಪೊರ್ತುಡು ಇಡೀಕ್ ಇಡೀ ತುಳುನಾಡ್ ಮಾತ್ರ ಅತ್ತಂದೆ ತುಳುನು ಮೋಕೆ ಮಲ್ಪುನ ಮಾತೆರ್ಲಾ ಇರ್ಮನೆಡ್ ಸಂತೋಸುಡು ಉಪ್ಪುನದಗ ಕನ್ನಡ ಸೇನೆ ಪನ್ಪಿ ಪುದರ್ದ ಕನ್ನಡಪರ ಸಂಘಟನೆ ತುಳುಕು ಒವ್ವ್ ಸ್ಥಾನಮಾನ ಕೊರಿಯರೆ ಬಲ್ಲಿ ಕರ್ನಾಟಕೊಡು ಕನ್ನಡನೇ ಸಾರ್ವಭೌಮ ಪನ್ದ್ ಅಕ್ಷೇಪನೆ ಮಲ್ದ್ಂಡ್. ಉಂದೆನ್ ತೆರಿನ ಬೆಂಗಳೂರುಡು ಕನ್ನಡಪರ, ಅಸಂಘಟಿತ ಕಾರ್ಮಿಕೆರೆನ ಪರ ಸುಮಾರ್ ವರ್ಸೊರ್ದಿಂಚಿ ಪೊರುಂಬಾಟ ಮಲ್ತೊಂದಿತ್ತಿನ ಭರತ್ ಶೆಟ್ಟಿ ಪಿಸಿರಾದ್ ವೀಡಿಯೋ ಮಲ್ತ್ ಫೇಸ್ಬುಕ್ಕುಡು ಪಟ್ಟೊಂಡೆರ್.
ಇನಿ ಪಂಚ ದ್ರಾವಿಡ ಭಾಷೆಡ್ ಒಂಜಿ ಭಾಷೆ ಆಯಿನ ನಮ್ಮನೇ ರಾಜ್ಯಡ್ ಪುಟ್ಟಿನ ತುಳುಭಾಷೆ ಎನ್ನ ಅಪ್ಪೆ ಭಾಷೆ. ಅಂಚಿನ ಪವಿತ್ರವಾಯಿನ ದೈವಭಾಷೆ ತುಳುಕು ಇನಿ ಮಾನಾದಿಗೆ ತಿಕ್ಕೊಂದುಂಡು ಪಂಡ ಅವೆತ ಪಿರವು ಏತೋ ಜವನೆರೆ, ಪೆರಿಯಾಕುಲು ಏತೋ ವರ್ಸೊರ್ದಿಂಚಿ ಪೊರುಂಬೊಂದುಲ್ಲೆರ್. ಈ ಪೊರ್ತುಡು ಏರಾ ಒರಿ ಮೂಜಿಕಾಸ್ದಾಯೆ ಬತ್ತ್ ಅವೆಕ್ ಅಕ್ಷೇಪನೆ ಮಲ್ತೊಂದುಲ್ಲೆ. ಆಯಗ್ ನೇರ ಸವಾಲ್ ಪಾಡೊಂದುಲ್ಲ, ಕರ್ನಾಟಕ ಆಯನ ಅಮ್ಮೆರ್ನನಾ? ಇನಿಮುಟ್ಟ ಆಯೆ ಒಡೆ ಪೋಡಿತ್ತೆ? ನಿಕುಲು ಕೆಲವೆರ್ ಕಾಲಿ ಕನ್ನಡದ ಶಾಲ್ ಪಾಡೊಂದು ರೋಲ್ ಕಾಲ್ ಮಲ್ಪರೆ ಉಪ್ಪುನಾ? ನಿಕಲೆಗ್ ಮಾನ ಮರ್ಯಾದಿ ಉಂಡಾ? ಪನ್ದ್ ಆಕ್ರೋಶೊಡು ಪಂಡೆರ್.
ತುಳುವೆರ್ ಇನಿಮುಟ್ಟಲ ಒಂಜಿ ಸಹನೆ ತಾಳ್ಮೆಡ್ ಬೈದ. ಎಂಕ್ಲೆನ ಬಾಸೆನ್ ಕಾರ್ದ ಕಜವು ಮಲ್ತಿನೆನ್ಲಾ ಸಹಿಸೊಂದು ಬೈದ. ಆಂಡಲ ಇನಿ ಕೋಡೆದ ಜವನೆರ್ ಲಕ್ಕ್ ದ್ ಬಾಸೆದ ಮಾನಾದಿಗೆ ಅಕೇರಿಗ್ ಎತ್ತುನಗ ಅಡ್ಡಕಾರ್ ಪಾಡುವರಾ? ಈತ್ ವರ್ಸ ಪೊರುಂಬೊಂದು ತುಳುತವೇ ಆಯಿನ ಲಿಪಿ ಆವಡ್, ಶಾಸನೊಲಾವಡ್, ಕಾವ್ಯೊಲಾವಡ್ ಮಾತಾ ದಾಖಲೆ ದಾದ ಬೋಡು ಅವೆನ್ ಎಂಕ್ಲೆನ ತುಳುನಾಡ ಜವನೆರ್ ನಾಡ್ ಪತ್ತುದೆರ್. ನಿಕ್ಲೆನ ತಾಂತ್ರಿಕ ದೋಷೊಗು ದಾದ ಪೂರಾ ಬೋಡಾ ಅವೆನ್ ಪೂರಾ ಒದಗಾದ.
ಈತೇ ಅತ್ತ್ ತುಳುವೆರ್ಲಾ ತುಳುಕಾದ್ ಪೊರುಂಬುನ ಜವನೆರೆಗ್ ಬೆರೆಬಲ ಕೊರ್ಪುಜೆರ್. ಏತೋ ಜವನೆರ್ ಬೆಂಗಳೂರುಡು ಕುಡ್ಲಡ್ ತುಳುಕೊಂಜಿ ಮಾನಾದಿಗೆ ತಿಕ್ಕೊಡು ಪನ್ದ್ ಪೊರುಂಬುವೆರ್ ಆಂಡ ಅಕಲೆಗ್ ತುಳುವೆರೇ ಬೆರಿಬಲ ಕೊರ್ಪುಜೆರ್. ಕಾಲಿ ಫೇಸ್ಬುಕ್ಕುಡು ಲೈಕ್ ಕೊರುಂಡ ಯಾವುಜಿ. ಪ್ರತಿಯೊರಿಲಾ ವೀಡಿಯೋ ಮಲ್ತ್ ಪಾಡೊಡು ತುಳುವೆರ್ ಎಂಚ ಒಗ್ಗಟ್ಟಾದ್ ಉಲ್ಲ ಪನ್ದ್ ಈ ವಿಚಾರೊಡು ಧ್ವನಿ ಕೊರೊಡು. ಇತ್ತೆಲಾ ನಿಕುಲು ಬತ್‌ತ್‌ಜರ್ಡ ಬೊಕ ನನ ಯಾಪ ಬರ್ಪಿನಿ? ಅಂಚಾದ್ ಬೇನೆಡ್ ಪನೊಂದುಲ್ಲೆ ನಮ್ಮ ಬಾಸೆಗ್ ತಾನಮಾನ ತಿಕ್ಕುನಗ ಇಂಚಿನ ಪುಡಾರಿಲು ಅಡ್ಡ ಕಾರ್ ಪಾಡುನಗ ನಮ ಮಾತೆರ್ ಮಲ್ಲ ಮಟ್ಟ್‌ದ ಧ್ವನಿ ಕೊರುಂಡ ವಾ ಮಗೆಲಾ ಬರಯೆ, ಏರ್ನ ಅಮ್ಮೆರ್ನಲಾ ಅತ್ತ್ ಉಂದು ರಾಜ್ಯ ಉಂದು ರಾಜ್ಯ ನಮಕ್‌ಲಾ ಸೇರ್ದಿನ ಪನ್ದ್ ಭರತ್ ಶೆಟ್ಟಿ ಪಂಡೆರ್.