Last updated on February 28th, 2023 at 06:40 pm
ಎಂಕ್ಲೆನ ಊರುದ ಮಾತಾ ಅಪ್ಪೆಲ್ಲು, ಆಂಟಿನಕುಲು ತೂಪಿನ ಒಂಜಿ ಧಾರವಾಹಿ ಉಂಡು. ದಿನಾಲ ರಾತ್ರೆ ವನಸ್‌ದ ಪೊರ್ತುಗು ಬಟ್ಟಲ್ ಬರೀಕ್ ದೀದ್‌ಲಾ ತೂಪೆರ್ ಕೆಲವೆರ್. ಧಾರವಾಹಿ ದಾಲಾ ಅತ್ತ್ ಅವೆಟ್ 50 ವರ್ಸದ ಪರಬೆ ಒರಿ 20 ವರ್ಸದ ಪೊಣ್ಣನ ಮಂಡೆ ಮರ್ಲ್ ಮಲ್ತ್ ಮದಿಮೆ ಆತೆ, ಆಯನ ಮಾಮಿ ಆಯನ ಪಲಿಲೆಕ್ಕ ಉಲ್ಲೊಲು, ಆತೇ ಅತ್ತ್ ಆ ಪೊಣ್ಣು ಮದ್ಮೆ ಆಯಿಬೊಕ್ಕಲಾ ಬಿಕ್ಕೊಂದು ಸಾರ್ ಸಾರ್ ಪನ್ದ್ ತನ್ನ ಕಂಡನನ್ ಲೆತ್ತೊಂದಿಪ್ಪುವೊಲು.
ವಿಷಯ ಅವ್ವತ್ತ್. ಈ ಐವ ವರ್ಸದ ಪರಬೆ 20 ವರ್ಸದ ಪೊಣ್ಣನ್ ಬಂಜಿನ ಮಲ್ದೆ. ಈ ವಿಷಯೊನು ಆಲ್ ಅಲೆನ ಇಲ್ಲದಕಲೆಗ್ ಕರಿನ ಅಷ್ಟೆಮಿದಾನಿ ಪಂತೊಲು. ಅಷ್ಟೆಮಿ ಕರಿನ ವರ್ಸ ಆಗೋಸ್ಟುಡು ಆತಿನಿ, ಆಲ್ ಪನ್ಪಿನ ಪೊರ್ತುಗು ಅಲೆಗ್ ಒಂಜಿ-ರಡ್ಡ್ ತಿಂಗೊಲು ಆಂಡಲ ಆದಿಪ್ಪುಂಡು. ಆ ಲೆಕ್ಕೊಡು ಇತ್ತೆ ಪಂಡ ಮಾರ್ಚಿಗ್ ಅಲೆಗ್ 8-9 ತಿಂಗೊಲು ಆದ್ ಪೆದ್ದರೆ ರೆಡಿ ಆತೊಡು. ಆಂಡ ಸೋಜಿಗ ದಾದ ಪಂಡ ಅಲೆನ ಬಂಜಿ ನನಲ ರಡ್ಡ್ ತಿಂಗೊಲ್ದ ಬಂಜಿನಾಲ್‌ನಾತ್‌ಲಾ ಬಲಿರ್‌ದಿಜಿ. ಅಲೆನ ಬಂಜಿಡ್ ಬಾಲೆನೇ ಉಪ್ಪಾ? ಅತ್ತ್ ಪುಚ್ಚೆದ ಕಿನ್ನಿ ಮಿನಿ ಉಪ್ಪಾ?
ಆತೇ ಅತ್ತ್ ಈ ನಡುಟು ಅಲೆನ ಕಂಡನಗ್ ಆಕ್ಸಿಡೆಂಟ್ ಆಪುಂಡು. ಸ್ಟಿಕ್ಕರ್ ಪತ್ತಾಯಿಲೆಕ್ಕ ಆಯನ ಮೋನೆನ್ ಪಗಪುವೆರ್. ಆತ್ ಯಾವುಜಿ ಪಂಡ ಆಯಗ್ ಮಂಡೆಗ್ ಪೆಟ್ಟ್ ಬೂರ್ದು ಪೂರಾ ನೆಂಪು ಪೋದಿತ್ತ್ಂಡ್. ಸುಮಾರ್ ಮರ್ದ್ ಮಲ್ತ್ ಕುಡ ಸಮ ಆಯೆ. ಇತ್ತೆ ಆಯಗ್ ಮಾತಾ ನೆಂಪು ಬೈದ್ಂಡ್‌ಗೆ. ಈತ್ ಪೂರಾ ಆವರೆ ಒಂಜಿ ರಡ್ಡ್ ವರ್ಸ ಆಂಡಲ ಬೊಡ್ಚಾ?
ಆಂಡಲ ನಮ್ಮ ಬಂಜಿನಾಲ್ ಸುಬ್ಬಿನ ಬಂಜಿ ಮಾತ್ರ ರಡ್ಡ್ ತಿಂಗೊಲ್ದಲೆಕ್ಕ ಉಂಡು. ಆನೆಗ್ ಬಂಜಿ ಬಲಿರ್ಯರೆ ರಡ್ಡ್ ವರ್ಸ ಬೋಡುಗೆ ಮೋಲು ಮಿನಿ ಆನೆನಾ? ದೇವೆರೆಗೇ ಗೊತ್ತು!.
ಈತ್ ಯಾವುಜಿ ಪನ್ಪಿನೆಕ್ಕ್ ಪೊಣ್ಣಗ್ ಒಂಜಿ ಅಪ್ಪೆ ಉಂಡು ಅಲೆನ್ ಕಾಲಿ ಬುಲ್ಪರೆ ದೀತಿನಿ. ಬೊಕ್ಕ ಒರಿ ದೊಲ್ಲೆ ಅರ್ಪೆಲೆ ಅಮ್ಮೆ ಉಲ್ಲೆ. ಪರಬೆ ಕಾಸ್‌ದಾಯೆ ಪನ್ದ್ ಪುನರ್‌ಜನ್ಮ ಸಂಕಮಸನ ಪನ್ದ್ ಮೋಲು ಮದ್ಮೆ ಆತಿನಿ.
ಉಂದೆನ್ ಪೂರಾ ತೂಂಡ ನಮ್ಮ ಊರ್ದ ಪೊಂಜೊವುಲೆನ ಮಂಡೆ ಒಡೆಗ್ ಎತ್ತು ಮಾರೆ ಸಾವು!