‘ಗುಳಿಗೆನಾ, ಜಾಪಾಳ್ ಮಾತ್ರೆನಾ?’ ಪಂದ್ ಕೇಂಡಿನ ಮಂತ್ರಿ ಆರಗನ್ ಈಯೆ ತೂವೊನು: ಗುಳಿಗ ಸನ್ನಿಧಿಡ್ ರತ್ನಾಕರ ಕಿಮ್ಮನೆ ಅಭಿಮಾನಿಲೆನ ಅರಿಕೆ

Last updated on March 19th, 2023 at 05:45 pm

ಕರ್ನಾಟಕೊದ ಗೃಹ ಸಚಿವೆ ಆರಗ ಜ್ಞಾನೇಂದ್ರೆ ಗುಳಿಗ ದೈವೊದ ಬಗ್ಗೆ ಬಾಯಿಗ್ ಬತ್ತಿಲೆಕ ಪಾತೆರ್ದ್ ಅವಮಾನ ಮಲ್ತಿನೆನ್ ಖಂಡಿತ್‌ದ್, ತೀರ್ಥಹಳ್ಳಿರ್ದ್ ದುಂಬುದ ಶಾಸಕೆ ಕಿಮ್ಮನೆ ರತ್ನಾಕರ್‌ನ 50ರ್ದ್‌ಲಾ ಮಿತ್ತ ಅಭಿಮಾನಿಲು ಕುಡ್ಲಮುಟ್ಟ ವಾಹನ ಜಾಥಾಡ್ ಬೈದೆರ್.

ಪಚ್ಚನಾಡಿಜ ಶ್ರೀಮಂತ ರಾಜಗುಳಿಗ ಸನ್ನಿಧಿಡ್, ಆರಗ ಜ್ಞಾನೇಂದ್ರೆ ತನ್ನ ಪಾತೆರೊಡು ತೀರ್ಥಹಳ್ಳಿದ ಜನೊಕ್ಲೆಗ್ ಅಂಚೆನೇ ತುಳುನಾಡ ಮಾತಾ ದೈವಾರಾಧಕೆರೆಗ್ ಅವಮಾನ ಮಲ್ದೆರ್. ಆರೆಗ್ ಶಿಕ್ಷೆ ಕೊರು ಪಂದ್ ಕೇಂಡೊನುಜ. ನಿನ್ನ ಕಾರ್ನಿಕ ತೋಜಾದ್ ಆರೆಗ್ ಎಡ್ಡೆ ಬುದ್ದಿ ಕೊರು ಪಂದ್ ಅರಿಕೆ ಮಲ್ತೊಂಡೆರ್.

ಅಂಚೆನೇ, ಎಂಕ್ಲು ಕಾಂಗ್ರೆಸ್ ಕಾರ್ಯಕರ್ತೆರ್ ಪಂದ್ ಪಕ್ಷೊದ ಪರವಾದ್ ಇಡೆ ಬೈದಿಜ, ದೈವೊದ ಮಿತ್ತ್ ಭಕ್ತಿ ದೀದ್ ಬೈದ. ಎಂಕ್ಲು ಶಿವದೂತೆ ಗುಳಿಗೆ ನಾಟಕೊನು ಗೊಬ್ಬಾದಿತ್ತ. ಅವೆಕ್ 16 ಸಾರ ಜನ ಸೇರ್ದಿತ್ತೆರ್. ನನಲಾ ಗುಳಿಗೆ ಎತ್ತಾಂಡ 32 ಸಾರ ಜನೊನು ಸೇರಾದ್ ನಾಟಕ ಗೊಬ್ಬಾವ. ಆಂಡ ದೈವೊಗು ಅವಮಾನ ಮಲ್ತಿನ ಆರಗ ಜ್ಞಾನೇಂದ್ರೆ ತುಳುನಾಡ್‌ದ ಒವ್ವಾಂಡಲಾ ಗುಳಿಗ ಕ್ಷೇತ್ರೊಗು ಬತ್ತ್‌ದ್ ಮಾಪು ನಟ್ಟೊಡು ಪಂದ್ ಆಗ್ರಹ ಮಲ್ದೆರ್.

ರತ್ನಾಕರ ಕಿಮ್ಮನೆ ಅಭಿಮಾನಿಲೆನ ಒಟ್ಟುಗು ಜಿಲ್ಲಾ ಕಾಂಗ್ರೇಸ್ ನಾಯಕೆ ಮಿಥುನ್ ರೈಲಾ ಇತ್ತೆರ್.