Last updated on March 24th, 2023 at 08:11 pm
ತುಳುನಾಡ್ ಬೊಕ್ಕ ತುಳು ಭಾಷೆಗ್ ಆವೊಂದಿಪ್ಪುನ ನಿರಂತರ ಅವಗಣನೆ ಇನಿ ಕೋಡೆದ ಅತ್ತ್. ತುಳುನಾಡ್‌ರ್ದ್ ಅಜತ್ ಪೋತಿನ ಮಾತಾ ಜನಪ್ರತಿನಿಧಿಲು ಕಾಲಿ ಸುಳ್ಳು ಭರವಸೆಲೆನ್ ಮಾತ್ರ ಕೊರ್ತೆರ್ ಅತ್ತಂದೆ ತುಳುವೆರ್ನ ಆಸೆ ಅಭಿಲಾಷೆಲೆನ್ ಇದಮುಟ್ಟ ಈಡೇರ್ತಿಜೆರ್. ಇಂಚೊಗು ಅಮಸರೊಡು ಕರ್ನಾಟಕ ಸರಕಾರ ತುಳುನು ಅಧಿಕೃತ ಭಾಷೆ ಪನ್ದ್ ಘೋಷಿನೆ ಮಲ್ಪರೆ ವರದಿ ಸಮಿತಿ ಮಲ್ತ್ ವರದಿ ಕೇಂಡೆರ್, ಸರ್ಕಾರ ಇದಮುಟ್ಟ ಒವ್ವೇ ಪ್ರತಿಕ್ರಿಯೆ ಕೊರ್ತುಜಿ. ನನ ಒಂತೆ ದಿನ ಮಾತ್ರ ಉಪ್ಪುನ , ಇತ್ತೆದ ಸರಕಾರ ತುಳು ಭಾಷೆನ್ ಅಧಿಕೃತ ಮಲ್ತಿಜಿಡ ತುಳುನಾಡೊರ್ಮೆ ಚುನಾವಣೆ ಬಹಿಷ್ಕಾರ ಮಲ್ಪುವ ಪನ್ದ್ ಮೂಡುಬಿದ್ರೆ ತುಳುಕೂಟದ ಬೊಕ್ಕ ಅಖಿಲ ಭಾರತ ತುಳು ಒಕ್ಕೂಟದ ಪನವುದ ಪಾಲವೆರ್ ಚಂದ್ರಹಾಸ ದೇವಾಡಿಗ ಪಂಡೆರ್.
ಮೇರ್ ಮಾತಾ ತುಳು ಸಂಘಟನೆಲು ಕದ್ರಿ ಗೋ ರಕ್ಷನಾಥ ಸಭಾಂಗಣಟ್ ಮಲ್ತಿನ “ನಿಕಲು ಬರೋರ್ಚಿ ಯೆಂಕ್ಲು ಓಟು ಪಾಡುಜ” ಅಭಿಯಾನದ ಸುರುತ ಸಭೆಟ್ ಪಾತೆರಿಯೆರ್.
ಸಭೆನ್ ಉದ್ದೇಶಿಸಾದ್ ಪಾತೆರಿನ ತುಳುನಾಡ ರಕ್ಷಣಾ ವೇದಿಕೆದ ಗುರ್ಕಾರೆ ಯೋಗೀಶ್ ಶೆಟ್ಟಿ ಜಪ್ಪು ಮೇರ್ ತುಳುವೆರೆಗ್ ಆಪಿನ ಈ ಅನ್ಯಾಯ ನನ ತಡೆತೊನರೆ ಆಪುಜಿ, ಇತ್ತೆಲಾ ಎಂಕುಲು ಅಜತಿನ ಜನಪ್ರತಿನಿಧಿಲೆಗ್ ಬೊಕ್ಕ ಸರಕಾರೊಗು ಎಂಕ್ಲೆನ ಬಗ್ಗೆ ನಿರ್ಲಕ್ಷ ದೋರಣೆ ಆಂಡ ತುಳುನಾಡ್ದ ಪ್ರತಿ ಗ್ರಾಮಡ್ಲಾ ಚುನಾವಣಾ ಬಹಿಷ್ಕಾರ ಅಭಿಯಾನೊನು ಮಲ್ಪುನ ಅನಿವಾರ್ಯ ಪನ್ದ್ ಎಚ್ಚರಿಕೆ ಕೊರಿಯೆರ್.
ಕಜ್ಜಕೂಟೊಗು ತುಳು ಕೂಟ ಬೆದ್ರ, ತುಳುನಾಡ ರಕ್ಷಣಾ ವೇದಿಕೆ, ತುಳುವರ್ಲ್ಡ್ ಮಂಗಳೂರು, ನಮ್ಮ ತುಳುನಾಡು ಟ್ರಸ್ಟ್, ತುಳುವರೇ ಆಯನ ಕೂಟ ಕುಡ್ಲ, ನಮ ತುಳುವೆರ್ ಇಂಚಿನ ಸಂಘಟನೆಲು ಬೆರಿಬಲ ಕೊರ್ದು ಸೇರಿಯೆರ್.
ಸಭೆಟ್ ಕೆ ಲಕ್ಷ್ಮೀನಾರಾಯಣ ರೈ ಹರೇಕಳ, ಜ್ಯೋತಿಕ ಜೈನ್, ಶಮಿನ ಆಳ್ವಾ, ಮಂಜುನಾಥ ಅಡಪ, ಜಿವಿಎಸ್ ಉಳ್ಳಾಲ್, ರಾಜೇಶ ಹೆಗ್ಡೆ ಪೊಳಲಿ, ಕ್ಲಿಟಸ್ ಲೋಬೊ, ಪ್ರಶಾಂತ್ ಭಟ್ ಕಡಬ,ಗೀತಾ ಜೆ ಹೆಗಡೆ, ಭಾರತಿ ರೈ, ಯಶು ಪಕ್ಕಳ ತಲಪಾಡಿ, ಸುರೇಶ್ ಕೋಟ್ಯಾನ್, ರೂಪೇಶ್ ರೈ, ಹರಿಚಂದ್ರ ಕೋಟೆ ಕಾರು, ವಿಜೇತ್ ಮಂಗಳೂರು, ಶಾಲಿನಿ ರೈ, ವೀಣಾ ಜೆ ಶೆಟ್ಟಿ, ಕುಸುಮ ಆರ್ ಶೆಟ್ಟಿ, ರೋಶನ್ ಡಿಸೋಜಾ, ಶಾರದಾ ಶೆಟ್ಟಿ, ಹರೀಶ್ ಶೆಟ್ಟಿ ಶಕ್ತಿನಗರ, ವಿಕಾಸ್ ಮಂಗಳೂರು, ಪ್ರಜ್ವಲ್ ಆಳ್ವ, ಸುಮತಿ ಎಸ್ ಹೆಗಡೆ, ಕವಿತಾ ಮೊಕುಲು ತನ್ಕುಲೆ ಅಭಿಪ್ರಾಯನ್ ಪಟ್ಟೊಂಡೆರ್.