Last updated on March 19th, 2023 at 09:57 am
ಕುಡ್ಲ ಸಾಂಸ್ಕೃತಿಕ ಪ್ರತಿಷ್ಠಾನ ಕುಡ್ಲ ಮೊಕಲ್ನ ಮುತಾಲಿಕೆಡ್ ತುಳುನಾಡ್‌ದ ಮಾಮಲ್ಲ ತೆನಸ್‌ಲೆನ ಉಚ್ಚಯ ಮಾರ್ಚ್ 22 ರ್ದ್ 26 ಮುಟ್ಟ ನಡಪರೆಗುಂಡು ಪಂದ್ ಸಂಘಟಕೆ ಯತೀಶ್ ಬೈಕಂಪಾಡಿ ತೆರಿಪಾಯೆರ್.
ಸುದ್ದಿಗೋಷ್ಠಿಡ್ ಪಾತೆರ್ನ ಆರ್ ಬಯ್ಯ 5 ಗಂಟೆರ್ದ್ ರಾತ್ರೆ 11 ಗಂಟೆ ಮುಟ್ಟ ಕರಾವಳಿ ಉತ್ಸವ ಮೈದಾನೊರ್ದ್ ಬ್ರಹ್ಮಶ್ರೀ ನಾರಾಯಣ ಗುರು ಸರ್ಕಲ್‌ಡೆ ಆದ್ ಮಣ್ಣಗುಡ್ಡೆ ಗುರ್ಜಿ ಜಂಕ್ಷನ್ ಮುಟ್ಟ ಈ ತೆನಸ್‌ದುಚ್ಚಯೊದ ಅಟ್ಟನೆ ಆತ್ಂಡ್. ಇಸೇಸವಾದ್ ತುಳುನಾಡ್‌ದ ಸಾಂಪ್ರದಾಯಿಕ ತೆನಸ್‌ಲೆನ ಒಟ್ಟುಗು ಪಿದಯಿ ರಾಜ್ಯೊಲೆನ ತೆನಸ್‌ಲೆಗ್ಲಾ ಆದ್ಯತೆ ಕೊರ್ಪ ಪಂದ್ ಪಂಡೆರ್.
ತುಳುನಾಡ್‌ದ ಬೇತೆ ಬೇತೆ ತೆನಸ್‌ಲೆನ ಪೊಲಬು ಮನ್ಪಾವುನೆತೊಟ್ಟುಗು ಸ್ವ‌ಉದ್ಯೋಗೊಗು ಬೋಡಾಪಿನ ಒಂಜಿ ಮಿತ್ತರ್ಮೆನ್ ಉಂಡುಮನ್ಪುನ ಪುನೆಪು ಉ್ಂದಾದುಂಡು. ಹೋಟೆಲ್, ಐಸ್‌ಕ್ರೀಮ್, ಗೃಹೋತ್ಪನ್ನೊಲು ಅಂಚೆನೇ ಬೇತೆ ಬೇತೆ ರಿತಿಟ್ ತೆನಸ್‌ದ ಉದ್ಯಮೊಡಿಪ್ಪುನಕುಲು ಈ ಫೆಸ್ಟ್‌ಡ್ ಪಾಲ್‌ಗೆತೊನ್ರ ಉಲ್ಲೆರ್. ಒಟ್ಟುಗು ಮಿನದನ ಲೇಸ್, ಪರಪೋಕುದ ಲೇಸ್‌ಲಾ ಇಪ್ಪುನೆರ್ದಾವರ ಈ ಒಂಜಿ ಉಚ್ಚಯ ತುಳುನಾಡ್‌ಡೇ ಪೊಸತೊಂಜಿ ಭಾಷ್ಯ ಬರೆಪುಂಡು ಪಂದ್ ಪಂಡೆರ್.
ಸಂಸದೆ ನಳಿನ್ ಕುಮಾರ್ ಕಟೀಲ್ ಬೊಕ್ಕ ಶಾಸಕೆ ವೇದವ್ಯಾಸ ಕಾಮತೆರೆನ ಮಾರ್ಗದರ್ಶನೊಡು ನಡಪುನ ‘ಮಂಗಳೂರು ಫುಡ್ ಫಿಯೆಸ್ಟಾ’ ಡ್ ತೆನಸ್‌ದ ಒಟ್ಟುಗು ನಲಿಕೆ, ಪದ, ಮಿಮಿಕ್ರಿ, ನಾಟಕ, ಜಾದೂ, ಕೆರಾ‌ಓಕೆ, ವಾದ್ಯಗೋಷ್ಠಿ, ಸರ್ಕಸ್, ಸೈಕಲ್ ಬ್ಯಾಲೆನ್ಸ್, ಬಗ್ಗಿ ಗಾಡಿ, ಗೇಮ್ಸ್, ಜುಂಬಾ, ಫಿಟ್‌ನೆಸ್ ಗೊಬ್ಬುಲು, ಬೆಡಿಮರ್ದ್, ಬಾಡಿ ಬಿಲ್ಡಿಂಗ್, ಮಸಾಜ್, ಚೆಂಡೆ, ನಾಸಿಕ್, ಸೂ ನಲಿಕೆ, ಸೆಲ್ಲಿ ಕೌಂಟರ್, ಫ್ಲಾಶ್ ಬೊಲ್ಪುದಗೊಬ್ಬುಲ್ಲಾ ಉಲ್ಲ.
ಫೆಸ್ಟ್‌ನ್ ನನಲಾತ್ ರೈಸಾವೆರೆ ಬೋಡಾದ್ ರಂಗ್ ರಂಗ್‌ದ ವಿದ್ಯುತ್ ದೀಪಾಲಂಕಾರ, ತಾಲೀಮ್, ಸಂಗೀತ, ಪಿಲಿಏಸದ ಬಣ್ಣ ಪೂಜುನ ಪಂತೊ, ಗೂಡುದೀಪ ಪಂತೊನ್ಲಾ ಅಟ್ಟನೆ ಮಲ್ದ ಪಂದ್ ಪಂಡೆರ್.
ಪ್ರತಿ ಜಂಕ್ಷನ್‌ಡ್ ಸಾಂಸ್ಕೃತಿಕ ಕಾರ್ಯಕ್ರಮ, ಜೋಕುಲೆಗಾದ್ ಬೇತೆನೇ ಜಾಗೆ, ಕುದುರೆ ಸವಾರಿ, ಒಂಟೆ ಸವಾರಿ, ಸೆಲ್ಫಿ ಬೂತ್, ಪರ ಕಾರ್‌ಲೆನ ತೂಪರಿಕೆ ಲೇಸ್‌ದ ಇಸೇಸ ಆಕರ್ಷಣೆ ಆವರೆಗುಂಡು ಪಂದ್ ಪಂಡೆರ್.
ಸುದ್ದಿಗೋಷ್ಠಿಡ್ ಗಿರಿಧರ್ ಶೆಟ್ಟಿ, ಅಶ್ವಥ್ ಕೊಟ್ಟಾರಿ, ಲಲಿತ್, ಜಗದೀಶ್ ಕದ್ರಿ ಒತ್ತುಪಾಲ್‌ಡಿತ್ತೆರ್.