Last updated on March 7th, 2023 at 05:51 pm
ಕುಡ್ಲ: ಜೈ ತುಲುನಾಡ್ (ರಿ.) ಭಾರತೊಗು ತನ್ನಾಲ್ಮೆ ತಿಕ್ಕ್‌ದ್ 75 ವರ್ಸ ಆಯಿನ ಚೀಪೆನೆಂಪುಡು ತುಳುನಾಡ ಸುಮಾರ್ 111 ಕಬಿಕ್ಲೆನ ಪದೊಕ್ಲೆನ್ ಸಂಪೊಲ್ತ್‌ದ್ ‘ತುಲು ಪುರ್ಪ’ ಪನ್ಪಿನ ತುಲು ಕಬಿತೆ ಸಂಕಲನೊನು ತುಲುಲಿಪಿಟ್ ಅಚ್ಚಿ ಮಲ್ತ್‌ದೆರ್. ಭಕ್ತಿಗೀತೆ, ತುಲುನಾಡಗೀತೆ, ಸೈನಿಕರೆನ ಬಗೆಟ್ ಬರೆತಿನ ಕಬಿತೆ, ಬೆನ್ನಿದ ಕಬಿತೆ ಬೊಕ್ಕ ಸಮಾಜೊಗ್ ಎಡ್ಡೆ ಸೊಲ್ಲಂಜ ಕೊರ್ಪುನ ಕಬಿತೆಲೆನ್ ಈ ಮಸ್ತಿರೆಡ್ ಅಚ್ಚಿ ಮಲ್ದೆರ್.
ಈ ಮಸ್ತಿರೆಗ್ ಪೂಜ್ಯೆರ್ ಪೇಜಾವರ ಮಠಾಧೀಶೆರ್ ಶ್ರೀ ಶ್ರೀ ಶ್ರೀ ವಿಶ್ವಪ್ರಸನ್ನ ತೀರ್ಥೆರ್ ಬೊಕ್ಕ ಕುಡುಮದ ಕಾವಂದೆರ್ ಡಾ. ವೀರೇಂದ್ರ ಹೆಗ್ಡೆರ್ನ ಆಶೀರ್ವಚನ, ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ದುಂಬುದ ಪದುಕೆರ್ ಡಾ.ಆಕಾಶ್ ರಾಜ್ ಜೈನ್ ಸುರುತ ಪಾತೆರ ಬರೆತೆರ್. ಸಂಘಟನೆದ ಬಗ್ಗೆ ರಡ್ಡ್ ಪಾತೆರ ಸಂಘಟನೆದ ಗುರ್ಕಾರ್ಲಾಯಿನ ಅಶ್ವಥ್ ತುಳುವೆ , ಕಾರ್ಯಂತೆರ್ ಅವಿನಾಶ್ ಮುಕ್ಕ ಬರೆತೆರ್, ಬೆನ್ನುಡಿನ್ ಹರಿಕೃಷ್ಣ ಪುನರೂರು ಬರೆತೆರ್.
ಕೋಡೆ ಜೈ ತಲುನಾಡ್ (ರಿ.) ಸಂಘಟನೆ ಈ ಮಸ್ತಿರೆನ್ ಕುಡುಮದ ಕಾವಂದೆರೆಗ್ ಅರ್ಪಣೆ ಮಲ್ತೆರ್. ಮಸ್ತಿರೆನ್ ತೂದು ಸಂಘೊದ ತುಳುಪರ ಬೇಲೆಲೆನ್ ಪುಗರ್ದ್, ಅಂಚೆನೇ ತುಳು ಲಿಪಿತ ಫಾಂಟ್‌ಲೆನ ಬಗ್ಗೆ ಇಸೇಸ ಉಮೇದ್‌ಡ್ ವಿಚಾರಣೆ ಮಲ್ತೆರ್.
ಈ ಪೊರ್ತುಡು ಜೈ ತುಲುನಾಡ್(ರಿ.) ಸಂಘಟನೆದ ಒತ್ತು ಸಂಘಟನಾ ಕಾರ್ಯಂತೆರಾಯಿನ ಪೃಥ್ವಿ ತುಲುವೆ, ಐಟಿ ನಿದಯಂತೆರಾಯಿನ ಸುಮಂತ್‌ ಹೆಬ್ರಿ, ತುಲು ಲಿಪಿ ಕಲ್ಪಾದಿಲಾಯಿನ ಪವಿತ್ರಾ ಮೊಕುಲು ಒತ್ತುಪಾಲ್‌ಡಿತ್ತೆರ್‌.