Last updated on March 7th, 2023 at 07:47 am
ಪಾಟ್ನಾ: ಬಿಹಾರೊದ ಖಗಾರಿಯಾಡೊಂಜಿ ಬಾರಿ ಅಪರೂಪೊದ ಮದಿಮೆ ನಡತ್ದ್ಂಡ್.
ಈ ಅಪರೂಪೊದ ಪ್ರೇಮಕಥೆಟ್ ರಡ್ಡ್ ಪೊಂಜೋವುಲು ಪರಸ್ಪರೆರ್ನ ಕಂಡನ್ಯನಕ್ಲೆನ್ ಮೋಕೆ ಮಲ್ತೊಂದಿತ್ತೆರ್, ಇತ್ತೆ ಈ ಮೋಕೆ ಆಲೆನ ಕಂಡನ್ಯನ್ ಮೋಲು, ಮೊಲೆನ ಕಂಡನ್ಯನ್ ಆಲ್ ಮದಿಮೆ ಆಪಿಲೆಕ ಮಲ್ತ್ಂಡ್.
ವರದಿಲೆನ ಪಿರ್ಕಾರ, ಪಿಸ್ರಾ ಗ್ರಾಮೊದ ರೂಬೀದೇವಿ ಪನ್ಪಿನ ಪೊಂಜೊವು ನೀರಜ್ ಕುಮಾರ್ ಸಿಂಗ್ ಪನ್ಪಿನಾಯನ್ 2009ಡ್ ಮದಿಮೆ ಆದಿತ್ತೆರ್. ಈ ಜೋಡಿಗ್ ರಡ್ಡ್ ಆನ್ ರಡ್ಡ್ ಪೊಣ್ಣು ಸೇರ್ದ್ ನಾಲ್ ಜನ ಜೋಕುಲುಲ್ಲೆರ್. ಈ ನಡುಟ್ ರೂಬೀದೇವಿಗ್ ಅವ್ವೇ ಗ್ರಾಮೊದ ಮುಕೇಶ್ ಕುಮಾರ್ ಸಿಂಗ್ ಪನ್ಪಿನಾಯನ ಮಿತ್ತ್ ಮೋಕೆ ಅರ್ಲ್‌ದ್ಂಡ್. ಇಸೇಸ ಪಂಡ ಈ ಮುಕೇಶನ ಬೊಡೆದಿನ ಪುದರ್‌ಲಾ ರೂಬೀದೇವಿ. ಈ ಜೋಡಿಗ್ಲಾ ರಡ್ಡ್ ಜನ ಜೋಕುಲುಲ್ಲೆರ್. ಮೋಕೆಡ್ ಬೂರ್ದಿತ್ತಿ ನೀರಜ್‌ನ ಬೊಡೆದಿ ರೂಬೀದೇವಿಲಾ ಮುಕೇಶೆಲಾ ಕರಿವ ವರ್ಸೊದ ಫೆಬ್ರವರಿ 6ಕ್ ಬಲ್ತ್ ಪೋದ್ ಮದಿಮೆ ಆದಿತ್ತೆರ್. ರೂಬೀದೇವಿ ಬಲ್ಪುನಗ ತನ್ನ ಒಂಜಿ ಪೊಣ್ಣು ಬಾಲೆನ್ ಬುಡ್ದ್ ಒರಿನ ಮೂಜಿ ಜನೊನು ಒಪ್ಪ ಲೆಸೊಂದು ಪೋತಲ್.
ನೆರ್ದಾವರ ಪಿಸ್ರೇರ್ದಿತ್ತಿ ನೀರಜ್, ಮುಕೇಶನ ಮಿತ್ತ್ ಕಿಡ್ನಾಪ್ ಕೇಸ್‌ಲಾ ಪಾಡ್ದಿತ್ತೆ. ಈ ನಡುಟ್ ನೀರಜ್‌ಗ್ ಮುಕೇಶನ ಬೊಡೆದಿ ರೂಬೀದೇವಿನ ಫೋನ್ ನಂಬರ್ ತಿಕ್ಕ್‌ದ್ಂಡ್. ಮೊಬೈಲ್‌ಡೇ ಪಾತೆರೊಂದು ಪಾತೆರೊಂದು ರಡ್ಡ್ ಜನೊತ ನಡುಟ್ ಮೋಕೆ ಅರ್ಲ್‌ದ್ಂಡ್. ನನಲಾ ದುಂಬರಿದ್ ಈ ಜೋಡಿ ಕರಿನ ಫೆಬ್ರವರಿ 18 ಗ್ ಮದಿಮೆ ಆಯೆರ್.