Last updated on March 22nd, 2023 at 12:24 pm
ತುಳುನಾಡೊರ್ಮೆ 17-18 ನೇ ಶತಮಾನ ಮುಟ್ಟ ತುಳು ಬಾಸೆನ್ ಬರೆಯೆರೆ ಗಲಕೆ ಆತಿನ ಲಿಪಿ ಒಂಜೇ ಒಂಜಿ, ಅವ್ವು ತುಳು ಲಿಪಿ. ನಮಕ್ ಈತ್‌ನೇಟ ತಿಕ್ಕಿನ ತುಳು ಲಿಪಿತ ಶಾಸನೊಲೆಡ್ ಪಿರಾಕ್‌ದವು 9-10ನೇ ಶತಮಾನೊಗೂ ಸೇರ್ದಿನವು. ಒವ್ವೇ ಲಿಪಿ ಒರಾರ್ದ್ ಒರಾನೆ ಆಳ್ಮೆದ(ಶಾಸನ ಬರೆಪಾವುನ) ಲಿಪಿ ಆಪುಜಿ. ಅಂಚಾದ್ ಕಮ್ಮಿಡ್ 8- 9ನೇ ಶತಮಾನೊರ್ದಿಂಚಿ ತುಳುನಾಡ್‌ಡ್ ತುಳುಲಿಪಿತ ಗಲಕೆ ಇತ್ತ್ಂಡ್ ಪಂದ್ ಒವ್ವೇ ಸಂಶಯೊದಾಂತೆ ಪನೊಲಿ.
ಕಾಲಿ ಕೈರ್ದ್ ಕೈಕ್, ಅಮ್ಮೆರೆರ್ದ್ ಜೋಕುಲೆಗ್ ಪೋವೊಂದಿತ್ತಿನ ಇ ಲಿಪಿತ ಗೇನ, ಒರ್ಯೊರ್ಯನ ಕೈಟ್ ಒಂಜೊಂಜಿ ರಿತಿಟ್ ತಿರ್ಗೊಂದು ಬತ್ತ್ಂಡ್. ಮಲಯಾಲ ರಾಜ್ಯೊಗು ಪೋದು ಪೊಸ ಒರು ಪಡೆವೊಂದು ಮಲ್ಯಾಲಿ ಲಿಪಿ ಆಂಡ್, ಗಟ್ಟದ ಮಿತ್ತ್ ಪೋದು ಪೊಸ ಒರು ಪಡೆವೊಂದು ತಿಗಳಾರಿ ಲಿಪಿ ಆಂಡ್. ಪ್ರಿಂಟ್ ಮೀಡಿಯಾಗ್ ಎತ್ತುನೇಟ ಇಂಚಿನ ಲಿಪಿಕ್ಲೆನ ಬದಲಾವಣೆ ಉಂತುಜಿ ಒಂಜತ್ತ್ಂಡೊಂಜಿ ಕಡೆಟ್ ದಾದಾಂಡಲಾ ಎಲ್ಯ ಎಚ್ಚಿಕಮ್ಮಿಲಾವೊಂದುಪ್ಪುವ. ಆ ಕಾರಣೊರ್ದಾವರೆನೇ ಕೆಲವೊಂಜಿ ಅಕ್ಷರೊಲೆಗ್/ಸಬ್ದೊಲೆಗ್ ಒಂಜೆರ್ದ್ ಎಚ್ಚಿನ ಸಂಕೇತೊಲು ಉಂಡಾತ. ಅ, ಆ, ಎ, ಐ, ಔ, ಛ, ಟ, ಮ ಇಂಚ ಮಸ್ತ್ ಅಕ್ಷರೊಲೆಗ್ ಪಿರಾಕ್‌ಡ್ ಕಿನ್ಯ ಕಿನ್ಯ ವ್ಯತ್ಯಾಸೊಲಿತ್ತಿನ ಸಂಕೇತೊಲು ಉಲ್ಲ. ನೆನ್ನ್ ‘ಲಿಪಿ ಪ್ರಭೇದ’ ಪಂದ್ ಪನ್ಪೆರ್.
ಆಂಡ ಇಂಚಿಪ್ಪೊಗು ತುಳು ಲಿಪಿ ಯೂನಿಕೋಡ್‌ದ ಜಾಲ್‌ಡುಂತುದು ಅಲ್ತ ಬಾಕಿಲ್ ಬೊಟ್ಟುನಗ ಏಕರೂಪೊದ, ಮಾತೆರೆಗ್ ಒಗ್ಗುನಂಚಿನ ಲಿಪಿ ಸಂಕೇತೊಲೆನ್ ಗಲಸೊಡು ಪಂದ್ ತೋಜಿದ್ ಬೈದ್ಂಡ್. ಆ ಪ್ರಕಾರೊಡು ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ವಿದ್ವಾಂಸೆರೆನ ಒಟ್ಟು ಸೇರ್ದ್ ಕಾಲಕಾಲೊಡು ಈ ಬಗೆಟ್ ಇನಯೊಲೆನ್ ಮಲ್ತ್‌ದ್ ಇನಿಕಾನಗ ಒಂಜಿ ಅಕೇರಿದ* ವರ್ಣಮಾಲೆನ್ ಕೊರ್ತೆರ್.
ಒತ್ತಕ್ಷರೊಲೆಡ್ ಥ, ಯ, ರ, ಲ, ವ, ಷ ಈ 6 ಅಕ್ಷರೊಲೆಗ್ ಕೆಲ ಬಗೆತ ಒತ್ತುರೂಪೊಲು ಉಲ್ಲ. ಆಂಡ ಕಲ್ಪುನಕಲೆಗ್ ಸುಲಭ ಆವೊಡು ಪನ್ಪಿನ ದಿಟ್ಟಿಡ್ ಈ ಅಕ್ಷರೊಲೆಗ್ಲಾ ಬಾಕಿ ಅಕ್ಷರೊಲೆನ ಲೆಕ ಆ ಅಕ್ಷರೊನೇ ಎಲ್ಯೆ ಮಲ್ತ್‌ದ್ ತಿರ್ತ್‌ಡ್ ಅಕ್ಷರೊದ ಬಲತ ಮರ್ಗಿಲ್ ಕಡಪಂದಿಲೆಕ ಬರೆಪುನ ಒತ್ತಕ್ಷರೊನು ಅಕಾಡೆಮಿ ಯೂನಿಕೋಡ್‌ದ ಜಾಲ್‌ಗ್ ಕಡಪುಡ್ದ್ ಕೊರ್ತುಂಡು.
ಮಾತ ತುಳುವೆರ್ ಆಯಿನಾತ್ ಏಕರೂಪೊದ, ಇಂಚಿಪ್ಪೊಗು ಆತಿನ ಪೊಸ ಪಗತೆಲೆನ್ ತುಳುಲಿಪಿ ಗಲಸ್‌ನಗ ಗಲಸೊಡು ಪಂಡ್‌ದ್ ಯೂನಿಕೋಡ್ ಕಂಸೋರ್ಷಿಯಮ್‌ಗ್ ಅಕಾಡೆಮಿದ ಕಡೆರ್ದ್ ತುಳು ಲಿಪಿತ ಪ್ರತಿನಿಧಿಲಾಯಿನ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಪದುಕೆರ್ ಡಾ. ಆಕಾಶ್‌ರಾಜ್ ಜೈನ್ ಕೇಂಡೊಂದೆರ್.
