Last updated on April 15th, 2023 at 02:21 pm
ಭೂತಾಳಪಾಂಡ್ಯನ ಕಟ್ಟ್ ಕಟ್ಲೆಲು ಪನ್ಪಿನ ತುಳು ಅನುವಾದ ಕೃತಿ ಇನಿ ಬುಡುಗಡೆ ಆವರೆ ಉಂಡು. ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್ ಪನ್ಪಿನ ಸಂಸ್ಥೆ ಈ ಕಜ್ಜೊನು ಮಲ್ದ್ಂಡ್. ತುಳುವೆರೆ 14 ಕಟ್ಟ್ ಬೊಕ್ಕ 16 ಕಟ್ಟಲೆಲೆನ ಬಗೆಟ್ ಈ ಬೂಕು ತೆರಿಪಾವುಂಡು ಅಂಚೆನೆ ಭೂತಾಳಪಾಂಡ್ಯನ ಚರಿತ್ರೆಲಾ ಉಂಡು ಪನ್ದ್ ತೆರಿದ್ ಬೈದ್ಂಡ್.
ಸಂಸ್ಕೃತ ಬೊಕ್ಕ ಕನ್ನಡ ಭಾಷೆಲೆಡ್ ಈ ಕೃತಿ ಇತ್ತೆ ಉಂಡು ಅವೆನ್ ತುಳುಕು ಅನುವಾದ ಮಲ್ತ್ ತುಳು ಬೊಕ್ಕ ಕನ್ನಡ ಲಿಪಿಟ್ ಇ-ಬುಕ್ ಮಲ್ದೆರ್. ಪುಣ್ಣಮೆ ಪ್ರಕಾಶನ ಪನ್ಪಿನ ಪುದರ್‌ದ ಅಂಗಸಂಸ್ಥೆದ ಅಡಿಟ್ ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್ ದಕುಲು ಈ ಬೂಕು ಬುಡೊಂದುಲ್ಲೆರ್. ತುಳುಪೀಡಿಯಾ ವೆಬ್ಸೈಟ್‌ಡ್ ಈ ಬೂಕು ತಿಕ್ಕುಂಡು. ತುಳು ಲಿಪಿ ಕಲ್ಪುನ ಪುಸ್ತಕ “ಜೀಟಿಗೆ”ನ್ಲಾ ಈ ಕೂಟೊದಕುಲೇ ಮೊಡೆತೆರ್.
ಭೂತಾಳಪಾಂಡ್ಯನ ಕಟ್ಟ್ ಕಟ್ಲೆಲು ಪೂರಾ ಇತ್ತೆದ ಕಾಲೊಗು ಪ್ರಸ್ತುತ ಅತ್ತ್. ದುಂಬುದ ಕಾಲೊಡು ಜಾತಿ ನೀತಿಲೆನ ಮಿತ್ತ್ ದಡೀತ ವ್ಯವಸ್ಥೆ ಉಪ್ಪುನಗ ಅವ್ ನಡತೊಂದಿತ್ತ್ಂಡ್. ಇತ್ತೆ ಸಂವಿಧಾನಾತ್ಮಕವಾದ್ ನಮಕ್ ತಿಕ್ಕಿನ ಸ್ವಾತಂತ್ರ್ಯ ಉಂಡು. ಮಿತ್ತ್ ತಿರ್ತ್ ಮಲ್ಲ ಎಲ್ಯ ಪನ್ಪಿನ ಒವ್ವೇ ತಾರತಮ್ಯ ದಾಂತೆ ಬದ್ಕುನ ಹಕ್ಕ್ ಮಾತೆರೆಗ್ಲಾ ಉಂಡು. ಅಂಚಾದಿಪ್ಪುನಗ ಭೂತಾಳಪಾಂಡ್ಯನ ಕಟ್ಟ್ ಕಟ್ಲೆಲೆಡ್ ಬರ್ಪಿ ವಿಷಯೊಲೆನ್ ಕಾಲಿ ಅಧ್ಯಯನ ಬೊಕ್ಕ ದಾಖಲೀಕರಣದ ದಿಟ್ಟಿಡ್ ಮಾತ್ರ ತೂವೊಡು ಅತ್ತಂದೆ ಅವ್ ಇತ್ತೆದ ಸಾಮಾಜಿಕ ವ್ಯವಸ್ಥೆನ್ ಪ್ರತಿನಿಧಿಪುಜಿ ಪಂದ್ ಬೂಕು ತರ್ಜುಮೆ ಮಲ್ದಿನ ತುಳು ಸಾಂಸ್ಕೃತಿಕ ಸಂಶೋಧನಾ ಪ್ರತಿಷ್ಠಾನೊದ ಗುರ್ಕಾರ್ಲು ಮಹಿ ಮುಲ್ಕಿ ಪಂಡೆರ್.
ತುಳುಟು ನನಲಾತ್ ಮೂಲ ಸಾಹಿತ್ಯೊಲು, ಅನುವಾದ ಸಾಹಿತ್ಯೊಲೆನ ಒಟ್ಟುಗು ಬೇತೆ ಬೇತೆ ಸಾಹಿತ್ಯ ಪ್ರಕಾರೊಲು ಬರೊಡು. ತುಳು ಸಾಹಿತ್ಯಲೌಕೊಡು ನನಲಾತ್ ಎಡ್ಡೇನ ಬೆನ್ನಿಲಾವೊಡು. ಪುಣ್ಣಮೆ ಪ್ರಕಾಶನೊರ್ದ್ ದುಂಬಗ್ ನನಲಾತ್ ಸಾಹಿತ್ಯಾತ್ಮಕ ಬೇಲೆಲು ನಡಪರೆಗುಲ್ಲ ಪಂದ್ ಪುಣ್ಣಮೆ ಪ್ರಕಾಶನೊದ ಸಂಚಾಲಕೆರ್ ನಿಶ್ಚಿತ್ ಜಿ ರಾಮಕುಂಜ ಪಂಡೆರ್.
ಭೂತಾಳಪಾಂಡ್ಯನ ಕಟ್ಟ್ ಕಟ್ಲೆಲೆನ ಇ-ಬುಕ್ ಓದರೆ/ಡೌನ್ಲೋಡ್ ಮಲ್ಪರೆ