Last updated on April 20th, 2023 at 08:01 am
ಕೋಟ: ಸಾರ್‌ಗ್ ಕುಪ್ಪಿದ ಚೂರುಲೆನ್ ಪಾಡ್ದ್ ಜವನೆ ಒರಿ ಸಂಬಂಧಿಲೆನ್ ಕೆರ್ಯೆರ ತೂತಿನ ನಡಕೆ ಕೋಟ ಪೊಲೀಸ್ ಸ್ಟೇಷನ್ ಸೀಮೆಡ್ ನಡತ್‌ದ್ಂಡ್. ಇತ್ತೆ ಪೋಲೀಸೆರ್ ಈ ಜವನನ್ ಅರೆಸ್ಟ್ ಮಲ್ದೆರ್.
ಕೋಟತಟ್ಟು ಪಡುಕೆರೆ ನಿವಾಸಿ ವಿಜೇಂದ್ರೆ (28) ಅರೆಸ್ಟ್ ಆತಿನ ಆರೋಪಿ.
ಮಾ.12ತಾನಿ ಗೀತಾ ಪನ್ಪಿನಾರ್ನ ಇಲ್ಲದಕುಲು ವನಸ್ ಮನ್ಪುನಗ ಉನ್ಪುಡು ಅಂಚೆನೇ ಸಾರ್‌ಡ್ ಕುಪ್ಪಿದ ಚೂರುಲು ತಿಕ್ಕ್‌ದ. ಮಾರ್ಚ್15 ಬೊಕ್ಕ 18ತಾನಿ ರಾತ್ರೆ ವನಸ್ ಮನ್ಪುನಗ ಪಿರ ಉನ್ಪುಡು ಕುಪ್ಪಿದ ಚೂರುಲು ತಿಕ್ಕ್‌ದ. ಈ ಮೂಜಿ ದಿನೊಲಾ ವಿಜೇಂದ್ರೆ ಪನ್ಪಿನಾಯೆ ಗೀತಾರೆನ ಇಲ್ಲಡೆ ಬತ್ತಿತ್ತೆ.
ಈ ಬಗ್ಗೆ ವಿಜೇಂದ್ರನ ಮಿತ್ತ್ ಸಂಶಯ ಬತ್ತಿನೇ ಗೀತಾನ ಇಲ್ಲದಕುಲು ಅಟಿಲ್‌ದ ಅದೆಟ್ ಮೊಬೈಲ್‌ಡ್ ಕ್ಯಾಮೆರಾಓಪನ್ ಮಲ್ತ್ ದೆಂಗದ್ ದೀದ್ ರೆಕಾರ್ಡ್ ಮಲ್ತಿತ್ತೆರ್. ವಿಜೇಂದ್ರೆ ಎ.17 ಕ್ ಬಯ್ಯನಗ ಗೀತಾ ರೆನ ಇಲ್ಲಗ್ ಬತ್ತ್‌ದ್, ನೀರ್ ಪರ್ಪಿನ ನೆವನೊಡು ಅಟಿಲ್‌ದಿಲ್ಲಗ್ ಪೋದು ಸಾರ್‌ಗ್ ಕುಪ್ಪಿದ ಚೂರುಲೆನ್ ಪಾಡ್ದೆ. ಉ್ಂದು ಮಾತ ದೆಂಗದ್ ದೀದಿತ್ತಿನ ಮೊಬೈಲ್‌ಡ್ ರೆಕಾರ್ಡ್ ಆತ್ಂಡ್.
ಈ ಬಗ್ಗೆ ಕೋಟ ಪೊಲೀಸ್ ಸ್ಟೇಷನ್‌ಡ್ ಕೊಲೆಯತ್ನ ಪ್ರಕರಣ ದಾಕಲಾತ್ಂಡ್. ಇತ್ತೆ ಆರೋಪಿನ್ ಅರೆಸ್ಟ್ ಮಲ್ತ್‌ದ್ ಪೊಲೀಸೆರ್ ಎಚ್ಚಿನ ಜಡ್ತೆ ಮಲ್ತೊಂದುಲ್ಲೆರ್.