Last updated on April 24th, 2023 at 12:50 pm
ಪುತ್ತೂರು: ಪುತ್ತೂರು ತಾಲೂಕ್‌ದ ಪಾಣಾಜೆ ಗ್ರಾಮ ಪಂಚಾಯಿತಿದ ಗುರ್ಕಾರ್ದಿ ಭಾರತಿ ಪನ್ಪಿನಾರ್ ಖಾಸಗಿಯಾದ್ ದ್ವಿತೀಯ ಪಿಯುಸಿ ಪರೀಕ್ಷೆ ಬರೆದ್ ಪಾಸ್ ಆತೆರ್. 38 ವರ್ಸ ಪ್ರಾಯ ಆತಿನ ಮೇರ್ ಕಲಾ ವಿಭಾಗೊಡು 421 ಮಾರ್ಕ್ ದೆತೊಂದ್ ಫಸ್ಟ್ ಕ್ಲಾಸ್‌ಡ್ ಪಾಸ್ ಆತೆರ್.
23 ವರ್ಸೊಗು ದುಂಬು ಎಣ್ಮನೇ ಕ್ಲಾಸ್ ಪಾಸ್ ಮಲ್ತಿ ಬೊಕ್ಕ ಅಮ್ಮೆರ್ ತೀರಿನೇ ಪಣವುದ ಬಂಙೊರ್ದಾವರ ಕಲ್ಪಟಿಗೆನ್ ಭಾರತಿ ಉಂತದೇ ಬುಡ್ದಿತ್ತೆರ್
ಕಾಸ್ರೋಡ್ ಬದಿಯಡ್ಕ ಚಾಂಗುಳಿ ವೆಂಕಟ್ರಮಣ ಭಟ್ರೆನ್ ಮದಿಮೆ ಆದ್ ಪಾಣಾಜೆಡ್ ಇಪ್ಪುನ ಮೇರ್ ರಡ್ಡ್ ವರ್ಸೊಗು ಪಿರ ನಡತಿನ ಗ್ರಾಮ ಪಂಚಾಯಿತಿ ಎಲೆಕ್ಷನ್‌ಡ್ ಬಿಜೆಪಿ ತಾಂಗ್‌ದ ಅಭ್ಯರ್ಥಿಯಾದ್ ಸ್ಪರ್ಧೆ ಮಲ್ತ್ ಗೆಂದ್‌ದಿತ್ತೆರ್.
2021-22ನೇ ಸಾಲ್‌ಡ್ ಎಸ್ಸೆಸ್ಸೆಲ್ಸಿ ಪರೀಕ್ಷೆನ್ ಪುತ್ತೂರ್‌ದ ನೆಲ್ಲಿಕಟ್ಟೆ ಕೋಟ ಶಿವರಾಮ ಕಾರಂತ ಪ್ರೌಢಶಾಲೆಡ್ ಖಾಸಗಿಯಾದ್ ಬರೆದ್ ಶೇ 54 ಅಂಕೊ ಗೆತೊಂದಿತ್ತೆರ್. ಇತ್ತೆ ಪುತ್ತೂರು ತಾಲ್ಲೂಕ್‌ದ ಕೊಂಬೆಟ್ಟು ಸರ್ಕಾರಿ ಪದವಿಪೂರ್ವ ಕಾಲೇಜಿಡ್ ಖಾಸಗಿಯಾದ್ ದ್ವಿತೀಯ ಪಿಯುಸಿ ಪರೀಕ್ಷೆ ಬರೆದ್ ಪ್ರಥಮ ಶ್ರೇಣಿಡ್ ಪಾಸ್ ಆದ್ ಕಲ್ಪುನೆಕ್ ಪ್ರಾಯ ಅಡ್ಡ ಬರ್ಪುಜಿ ಪನ್ಪುನೆನ್ ತೋಜಾದ್ ಕೊರ್ತೆರ್
ಕಂಡನೆ ವೆಂಕಟ್ರಮಣ ಭಟ್ರ್, ಮಗಲರ್ಲಾಯಿನ ಅದಿತಿ (8ನೇ ಕ್ಲಾಸ್) ಬೊಕ್ಕ ಅನಘಾ (6ನೇ ಕ್ಲಾಸ್) ನಕ್ಲೊಟ್ಟು ಜೀವನ ನಡಪಾವೊಂದುಪ್ಪುನ ಮೇರ್ ಪದವಿ ಶಿಕ್ಷಣ ಕಲ್ಪೊಡು ಪನ್ಪಿನ ಅಂಗಲಪ್ಪುಲಾ ದೀವೊಂದೆರ್.