Last updated on April 28th, 2023 at 06:01 pm
ಕರಿನ ಕೆಲ ದಿನೊರ್ದಿಂಚಿ ಬಿಳಿನೆಲೆತ ಚೇರ್ ಬೊಕ್ಕ ಎರ್ಮಾಯಿಲ್ ಪ್ರದೇಶೊಡು ಸುಬ್ರಹ್ಮಣ್ಯ-ಗುಂಡ್ಯ ಪೆರ್ಸಾದಿಡ್ ತೋಜಿದ್‌ಬರೊಂದಿತ್ತಿನ ಆನ್ ಕಾಡಾನೆ ಕಡೆಕ್ಲಾ ತನ್ನ ಪೆರಣ ಬುಡ್ತ್ಂಡ್. ಕೋಡೆ ಕೊಂಬಾರ್‌ದ ಕೆಂಜಾಳ ಬಗ್ಪುಣಿದಲ್ತ ತಾರ್‌ದ ನೀರ್‌ಡ್ ಉಸಾರ್‌ತತ್ತಿನ ಸ್ಥಿತಿಟ್ ಇತ್ತಿನ ಕಾಡಾನೆ ಕೋಡೆ ರಾತ್ರೆ ತೀರ್ದ್ಂಡ್. ಸುಮಾರ್ 50 ವರ್ಸ ಪ್ರಾಯೊದ ಈ ಕಾಡಾನೆ ಬಗ್ಪುಣಿದಲ್ಪ ಬಚ್ಚಿದ್ ನಿತ್ರಾಣೊರ್ದಾವರ ಮಿತ್ತ್ ಬರ್ಯೆರಾವಂದೆ ತಾರ್‌ಡೇ ಒರಿದಿತ್ತ್ಂಡ್. ಆನೆಗ್ ಮರ್ದ್ ಮನ್ಪುನ ಉದ್ದೇಶೊಡು ಕಡಬದ ಪಶು ವೈದ್ಯಾಧಿಕಾರಿ ಡಾ. ಅಜಿತ್‌ ಬೊಕ್ಕ ಹುಣಸೂರುದ ಅರಣ್ಯ ಇಲಾಖೆದ ಪಶು ಬೈದ್ಯೆ ಡಾ. ಮುಜೀಬ್‌‌ರೆನ್ ಲೆಪುಡಾದಿತ್ತೆರ್.
ಆನೆದ ಪರೀಕ್ಷೆ ಮಲ್ತಿನ ಬೈದ್ಯೆರ್ ಆನೆಗ್ ಸುಮಾರ್ 50 ವರ್ಸ ಪ್ರಾಯ ಆತ್ಂಡ್, ಬಾಯಿಡ್ಲಾ ದಾದನೋ ಗಡಿ ಆತಿಲೆಕ ಉಂಡು ಪಂದ್ ಪಂದಿತ್ತೆರ್. ಅಂಚಾದ್ ಅ ವೆಕ್ ದಾಲ ತಿನ್ರೆಲಾ ಆವೊಂದಿಜ್ಜಿ. ಮರ್ದ್ ಮನ್ಪೊಡಾಂಡ ಅರಿವಳಿಕೆ ಕೊರ್ದು ಯತಿ ತಪ್ಪಾವೊಡು. ಆಂಡ ಆನೆ ಅರಿವಳಿಕೆದ ಮರ್ದ್‌ನ್ ತಡೆವೊನರೆ ಆವಂದಿನಾತ್ ತ್ರಾಣದಾಂತೆ ಪೋದಿತ್ತ್ಂಡ್. ಓಲ್ಲಾ ಅರಿವಳಿಕೆ ಕೊರ್ಪುಂಡಲಾ ಆನೆ ಸೈತ್‌ದು ಪಂದ್ ಪಂಡೆರ್.
ಆಂಡ ಬಯ್ಯದ ಪೊರ್ತುಗಾನಗ ಆ ಕಾಡಾನೆ ಎಂಚಾಂಡಲಾ ಮಲ್ತ್‌ದ್ ತಾರ್‌ರ್ದ್ ಲಕ್ಕ್‌ದ್ ಕಾಡ್‌ಗ್ ಪೋದಿತ್ತ್ಂಡ್. ಆಂಡ ಇನಿ ಕಾಂಡೆ ಬಗ್ಪುಣಿದಲ್ಪ ಮಣ್ಣ್‌ದ ತಾದಿ ಬರಿಟ್ ಆನೆದ ಪುನ ತಿಕ್ಕ್‌ದ್ಂಡ್.