Last updated on May 29th, 2023 at 04:43 pm
ಕರಿನ ಬಿಜೆಪಿ ಸರಕಾರ ಅಕೇರಿಗ್ ತುಳು ಭಾಷೆನ್ ಅಧಿಕೃತ ಮಲ್ಪುನೆತ್ತ ಬಗೆಟ್ ವರದಿ ಕೇನ್ದಿತ್ತ್ಂಡ್. ಈ ವರದಿಗ್ ಆಳ್ವಾಸ್‌ದ ಮೋಹನ್ ಆಳ್ವೆರೆನ ನೇತೃತ್ವದ ಸಮಿತಿಲಾ ಮಲ್ದಿತ್ತ್ಂಡ್. ಈ ಸಮಿತಿ ವರದಿ ಮಲ್ತ್ ಕೊರ್ದು ಒಂತೆ ದಿನೊಟೇ ಓಟು ಬತ್ತ್ಂಡ್ ಅಂಚೆನೆ ಬಿಜೆಪಿ ಸರಕಾರಲಾ ಮಗ್‌ರ್ಂಡ್. ಸರಕಾರೊಡು ಇತ್ತಿನಕಲೆಗ್ ಇಚ್ಛಾಶಕ್ತಿದಾಂತಿನ ತುಳುವೆರೆಗ್ ಸಾಕ್ಷಿಯಾದ್ ತೆರಿಂಡಲ ಎಚ್ಚಿನಕುಲು ನಮಕ್ ದಾಯೆಗ್ ಅವ್ ಪನ್ದ್ ಬಾಯಿಗ್ ತರ್ಕೋಲ್ ಪಾಡ್ದ್ ಕುಲ್ದಿನವು ತೋಜೊಂದುಂಡು.
ಈ ದಿಸೆಟ್ ಅಖಿಲ ಭಾರತ ತುಳು ಒಕ್ಕೂಟ ಬೊಕ್ಕ ತುಳುಕೂಟ ಬೆದ್ರದ ಒಟ್ಟು ಸೇರಿಗೆಡ್ ಎಪ್ರೀಲ್ 8 ತಾರೀಕ್‌ಗ್ ತುಳು ಮಹಾಕೂಟ ನಡದಿತ್ತ್ಂಡ್. ಈ ಲೇಸ್‌ದ ಗುರ್ಕಾರ್ಮೆಡ್ ಇತ್ತಿನ ಮೋಹನ್ ಆಳ್ವೆರ್ ಬಿಜೆಪಿ ಸರಕಾರದ ಸೂಚನೆದ ಲೆಕ್ಕೊಡು 15 ದಿನೊಟು ತುಳುನು ಅಧಿಕೃತ ಮಲ್ಪರೆ ಬೋಡಾಪಿನ ಮಾತಾ ವರದಿನ್ ತುಳುವೆರೆ ಸಹಕಾರೊಡು ರಾಜ್ಯ ಸರಕಾರಗ್ ಕೊರ್ತುಂಡು. ಸರಕಾರ ಒವ್ವೇ ಕ್ರಮ ದೆತೊನಿಜಿ, ಓಟು ಕರಿದ್ ಒವ್ವೇ ಸರಕಾರ ಬತ್ತ್ಂಡಲಾ ಎಂಕುಲು ಒಂಜಿ ತಿಂಗೊಲ್ದ ಗಡು ದೀಪ, ಬೊಕ್ಕ ಮಾತಾ ಬಗೆತ ಪೊರುಂಬಾಟೊಗು ನಮ ತಯಾರಾದುಪ್ಪೊಡು ಪನ್ದ್ ಪನ್ದಿತ್ತೆರ್. ಈ ಪೊರ್ತುಡು ತುಳುನಾಡ್‌ದ ಎಚ್ಚಿನ ತುಳು ಸಂಘಟನೆಲು ಬೈದಿತ್ತ್ಂಡ್.
ಓಟು ಕರಿಂಡ್ ಪೊಸ ಸರಕಾರ ಬತ್ತ್ಂಡ್, ಪೊಸ ಸರಕಾರ ಬತ್ತ್ 15 ದಿನ ಆವರೆ ಆಂಡ್, ಆಂಡ ನನಲ ತುಳುವೆರ್ ಮಲ್ಲ ಮಟ್ಟ್‌ದ್ ಲಕ್ಕ್‌ದಿಜೆರ್. ಸರಕಾರ ಬದಲಾತ್ಂಡ್, ದುಂಬುದಕುಲು ಪೂರಾ ತೆರಿದ್‌ಲಾ ದಾಲಾ ಮಲ್ದಿಜೆರ್. ಆಡಳಿತ ಪಕ್ಷೊಡು ಉಪ್ಪುನಗ ಪಾತೆರಂದಿನಕುಲು ವಿರೋಧ ಪಕ್ಷೊಗು ಪೋಯಿಬೊಕ್ಕ ಪಾತೆರುನ ನೆವನ ಆಂಡಲಾ ಉಪ್ಪು. ಆಂಡಲ ತುಳು ಸಂಘಟನೆದ ಒಕ್ಕೂಟೊಲು ಈ ದಿಸೆಟ್ ಒರ್ಮೆಡ್ ಒಂಜಿ ಮಲ್ಲ ಪ್ರತಿಭಟನೆಗ್ ಲಕ್ಕೊಡು, ತುಳುವೆರೆ ಸ್ವಾಭಿಮಾನೊನು ಲಕ್ಕಾವೊಡು ಬೊಕ್ಕ ಮಾತೆರ್ ಒಂಜಾದ್ ತುಳುಕು ಮಾನಾದಿಗೆದ ಮಲ್ಲ ದುನಿಪು ದೆರ್ಪೊಡು.