Last updated on May 20th, 2023 at 08:30 am
ಕಾಸ್ರೋಡ್, ಕುಡ್ಲ, ಬೆಂಗ್ಳೂರ್‌ದ ನಡುಟು ನಡತೊಂದಿತ್ತಿನ ಮಾಮಲ್ಲ ಡ್ರಗ್ಸ್ ಜಾಲೊನು ಬೇಕಲ ಪೊಲೀಸೆರ್ ನಾಡ್‌ದ್, ಡ್ರಗ್ಸ್ ಸಪ್ಲೈ ಮಲ್ತೊಂದಿತ್ತಿನ ನೈಜೀರಿಯನ್ ಮೂಲೊದ ಜವನ್ದಿನ್ ಅರೆಸ್ಟ್ ಮಲ್ದೆರ್.
ನೈಜೀರಿಯಾದ ಲಾಗೋಸ್ ನಿವಾಸಿ, ಸ್ಟೂಡೆಂಟ್ ಪಾಸ್ ಪೋರ್ಟ್‌ಡ್ ಬೆಂಗ್ಳೂರ್‌ಗ್ ಬತ್ತ್‌ದ್ ಯಲಹಂಕಡ್ ದೆಂಗ್‌ತಪ್ಪಾದ್ ಕುಲ್ದಿತ್ತಿನ ಹಫ್ಸಾ ರಿಹಾನತ್ ಉಸ್ಮಾನ್ ಪನ್ಪಿ ಪೊಣ್ಣನ್ ಪೊಲೀಸೆರ್ ಅರೆಸ್ಟ್ ಮಲ್ದೆರ್. ಕರಿನ ಎಪ್ರಿಲ್ ತಿಂಗೊಲ್ಡು ಬೇಕಲ್‌ದಲ್ಪ ಬೆಂಗ್ಳೂರ್‌ರ್ದ್ ಬರೊಂದಿತ್ತಿನ ಸ್ವಿಫ್ಟ್ ಕಾರ್‌ಡ್ ಡ್ರಗ್ಸ್ ತಿಕ್ಕ್‌ದಿತ್ತ್ಂಡ್. ನಾಲ್ ಜನೊನು ಕೈದ್ ಮಲ್ತ್‌ದ್ ಜಡ್ತೆ ಮಲ್ತಿನದಗ, ಪ್ರಮುಖ ಆರೋಪಿ ಅಬುಬಕ್ಕರ್‌ಗ್ ನೈಜೀರಿಯನ್ ಜನೊಕುಲು ಡ್ರಗ್ಸ್ ಸಪ್ಲೈ ಮಲ್ತೊಂದಿತ್ತಿನ ಬೊಲ್ಪುಗ್ ಬೈದ್ಂಡ್.
ರಡ್ಡರೆ ವರ್ಸೊಡು ಕಾಸ್ರೋಡ್ ಜಿಲ್ಲೆದ ಸೀಮೆಡ್ 35 ಸರ್ತಿ ಡ್ರಗ್ಸ್ ಕೇಸ್‌ಲೆನ್ ಪೊಲೀಸೆರ್ ಪತ್ತ್‌ದಿತ್ತೆರ್. ಇಂಚಿಪ್ಪೊಗು ಬೇಕಲ್‌ಡ್ 153 ಗ್ರಾಮ್ ಎಂಡಿಎಂಎ ಡ್ರಗ್ಸ್ ತಿಕ್ಕಿನವು ಮಲ್ಲ ಮಟ್ಟ್‌ದವಾದಿತ್ತ್ಂಡ್. ಪತ್ತ್ ಗ್ರಾಮ್‌ರ್ದ್ ಎಚ್ಚ ಡ್ರಗ್ಸ್ ತಿಕ್ಕ್ಂಡ ಅವ್ವು ಕಮರ್ಶಿಯಲ್ ಪಂದ್ ಪೊಲೀಸೆರೆ ಲೆಕ್ಕ. ಪೊಲೀಸೆರೆ ಜಡ್ತೆಡ್ ಹಫ್ಸಾ ಕಲ್ವ ಸಿಮ್ ಗಲಸೊಂದಿತ್ತಿನ ತೆರಿದ್‌ಬೈದ್ಂಡ್. ಈ ಕಲ್ವ ಸಿಮ್‌ನ್ ವಾಟ್ಸಪ್‌ಗ್ ಮಾತ್ರ ಗಲಸೊಂದಿತ್ತಲ್.
ಆರೋಪಿ ಅಬುಬಕ್ಕರ್ ಪೇಟಿಎಂಡ್ ಕಾಸ್ ಕಡಪುಡ್ದ್, ಅವೆತ ಸ್ಕ್ರೀನ್‌ಶಾಟ್‌ನ್ ಆಲೆಗ್ ಕಡಪುಡೊಂದಿತ್ತೆ. ಅವೆರ್ದ್ ಬೊಕ್ಕನೇ, ಹಫ್ಸಾ ಆಲೆನ ಜನೊಕ್ಲೆಡ ಎಂಡಿಎಂಎ ಡ್ರಗ್ಸ್‌ನ್ ಕಡಪುಡ್ದ್ ಕೊರೊಂದಿತ್ತಲ್. ಆಲೆನ ಅಕೌಂಟ್‌ಗ್ ಪ್ರತಿ ತಿಂಗೊಲು 60 ರ್ದ್ 70 ಲಕ್ಷ ಕಾಸ್ ಬರೊಂದಿತ್ತಿನವು ಪೋಲೀಸೆರೆ ಗೇನೊಗು ಬೈದ್ಂಡ್. ಅಬುಬಕ್ಕರ್ ಒಂಜಿ ಲಕ್ಷ ರೂಪಾಯಿ ಪೇಟಿಎಂಡ್ ಕಡಪುಡ್ದಿನೆನ್ ಆಧಾರವಾದ್ ದೀವೊಂದು ಬೇಕಲ ಪೊಲೀಸೆರ್ ಆಲೆನ ಬೆರಿ ಬೂರ್ದಿತ್ತೆರ್. ಆಂಡ ರೂಬಿ ದೇವಿ ಪನ್ಪಿ ವಾಟ್ಸಾಪ್ ತೋಜಾವೊಂದಿತ್ತ್ಂಡಲಾ, ಅವೆಟ್ ಲೊಕೇಶನ್ ತೆರಿಯೊಂದಿತ್ತಿಜಿ.
ಯಲಹಂಕದ ಅಪಾರ್ಟೆಂಟ್ ಒಂಜೆಟ್ ಇತ್ತಿನ ಹಫ್ಸಾನ ಇಲ್ಲಗ್ ಪೊಲೀಸೆರ್ ದಾಳಿ ಮಲ್ತಿನದಗ, ಅಲ್ಪ ಒವ್ವೇ ಡ್ರಗ್ಸ್ದ ಗಂದಗಾಳಿ ಇಜ್ಜಂಡ್. ಜಡ್ತೆ ಮಲ್ತಾನಗ, ಆಲೆಡ ಪಾಸ್ ಪೋರ್ಟ್‌ಲಾ ಇಜ್ಜಿ, ಒಂಜಿ ವರ್ಸೊದ ಸ್ಟೂಡೆಂಟ್ ವೀಸಾಡ್ ನೈಜೀರಿಯಾರ್ದ್ ಬತ್ತಿನ ತೆರಿದ್ಂಡ್. ಒವ್ವೇ ಕಾಲೇಜ್ ಸ್ಟೂಡೆಂಟ್‌ಲಾ ಅತ್ತ್. ಪೊಲೀಸೆರ್ ಈ ಆಧಾರೊಡು ವಶೊಕು ಗೆತೊಂದೆರ್.
ಜಡ್ತೆಡ್, ಹಫ್ಸಾ ಸೇರ್ದ್ ನಾಲ್ ಜನ ನೈಜೀರಿಯನ್ನೆರೆ ಕೂಟ ಡ್ರಗ್ಸ್ ಸಪ್ಲೈ ಜಾಲೊಡು ಇಪ್ಪುನ ಪತ್ತೆಯಾತ್ಂಡ್. ಹಫ್ಸಾ ಬೆಂಗ್ಳೂರ್‌ದ ಮಲ್ಲ ಕೊಲಿಕ್ಕೆ ಆಂಡ, ಕುಡ ರಡ್ಡ್ ಜನ ದೆಲ್ಲಿಡುಲ್ಲೆರ್. ಕುಡೊರಿ ಗೋವಾಡ್ ಇತ್ತೊಂದು ಡ್ರಗ್ಸ್ದ ವೈವಾಟ್ ನಡಪಾವೊಂದುಲ್ಲೆರ್. ನಾಲ್ವರು ಪದುಕೆರೆಗ್ ಹಫ್ಸಾ ರೆಹಾನತ್ ಚೀಫ್ ಎಕ್ಸಿಕ್ಯುಟಿವ್ ರೀತಿ ಬೇಲೆ ಮಲ್ತೊಈದಿತ್ತಲ್ ಪಂದ್ ಕಾಸ್ರೋಡ್ ಎಸ್ಪಿ ವೈಭವ್ ಸಕ್ಸೇನಾ ತೆರಿಪಾದೆರ್.