Last updated on May 6th, 2023 at 05:58 pm
ಈ ಸರ್ತಿದ ಹಜ್‌ ಯಾತ್ರೆಗ್ ಕುಡ್ಲ ವಿಮಾನ ಉಂತಡೆರ್ದ್ ನೇರ ಪ್ರಯಾಣೊದ ಅವಕಾಶೊನು ಕ್ಯಾನ್ಸಲ್ ಮಲ್ದ್ಂಡ್.
ಕೋವಿಡ್‌ ಸಾಂಕ್ರಾಮಿಕೊರ್ದು ಬೊಕ್ಕ ಕುಡ ಕುಡ್ಲ ವಿಮಾನ ಉಂತಡೆರ್ದ್ ಹಜ್‌ ಯಾತ್ರೆಗ್ ಪೋಯೆರ ಯಾತ್ರಿಲೆಗ್ ಅವಕಾಶ ಕೊರ್ದಿತ್ತ್ಂಡ್. ಹಜ್‌ ಯಾತ್ರೆಗ್ ಅರ್ಜಿ ಪಾಡ್ನಗಲಾ ಯಾತ್ರಿಲೆಗ್ ತನ್ಕುಲೆ ಅನುಕೂಲೊಗು ಬೋಡಾಪಿನಂಚ ವಿಮಾನ ಬರ್ತುನ ಕೇಂದ್ರೊನು ಆಯ್ಕೆ ಮನ್ತೊನೆರ ಅವಕಾಶ ಕೊರ್ದಿತ್ತ್ಂಡ್. ಆಂಡ, ಭಾರತೀಯ ಹಜ್‌ ಸಮಿತಿ ದೇಶೊದ ಕೆಲ ರಾಜ್ಯೊಲೆನ ವಿಮಾನ ಬರ್ತುನ ಕೇಂದ್ರೊಲೆನ್ (ಎಂಬಾರ್ಕೇಶನ್‌ ಸೆಂಟರ್‌) ಕ್ಯಾನ್ಸಲ್ ಮಲ್ದ್ಂಡ್, ಉ್ಂದೆಟ್ ಕುಡ್ಲ ವಿಮಾನ ಉಂತಡೆಲಾ ಸೇರ್ದ್ಂಡ್.
ರಾಜ್ಯೊದ ಹಜ್‌ ಯಾತ್ರಿಲು ಬೆಂಗಳೂರು, ಕುಡ್ಲ, ಗೋವಾ ಬೊಕ್ಕ ಹೈದರಾಬಾದ್‌ ಮುಕೇನ ಹಜ್‌ ಯಾತ್ರೆಗ್ ಪೋವೊಂದಿತ್ತೆರ್. ಇತ್ತೆ ಕುಡ್ಲ ಎಂಬಾರ್ಕೇಶನ್‌ ಪಾಯಿಂಟ್‌ ಕ್ಯಾನ್ಸಲ್ ಮಲ್ದಿನೆರ್ದಾವರ ಕುಡ್ಲ, ಒಡಿಪು, ಚಿಕ್ಕಮಗಳೂರು, ಕೊಡಗು ಬೊಕ್ಕ ಹಾಸನ ಜಿಲ್ಲೆದ ಯಾತ್ರಿಲು ತೊಂದರೆಗೆ ತಿಕ್ಕ್‌ದ್ ಬೂರೊಂದೆರ್. ಭಾರತೀಯ ಹಜ್‌ ಸಮಿತಿ ಈ ಐನ್ ಜಿಲ್ಲೆಲೆನ ಯಾತ್ರಿಲೆಗ್ ಕೇರಳದ ಕಣ್ಣೂರು, ಕೊಚ್ಚಿ, ಬೆಂಗಳೂರು ಬೊಕ್ಕ ಚೆನ್ನೈ ಈ ಎಂಬಾರ್ಕೇಶನ್‌ ಪಾಯಿಂಟ್‌‌ಗ್ ಪೋವರೆ ಪನೊಂದುಂಡು.
ಕರಿನ ವರ್ಷ ಕೋವಿಡ್‌ ನೆವನೊರ್ದಾವರ ಕುಡ್ಲರ್ದ್ ನೇರವಾದ್ ಹಜ್‌ ಯಾತ್ರೆಗ್ ಅವಕಾಶ ಇಜ್ಜಂಡ್. ಈ ಸರ್ತಿ ಕುಡ್ಲರ್ದ್ ನೇರವಾದ್ ಯಾತ್ರೆ ಪಿದಡೆರ ಅವಕಾಶ ಕೊರ್ಪುನಂಚ ಅ. ಭಾ. ಹಜ್‌ ಸಮಿತಿನ್ ಮಾತ ಬಿನ್ನೈತಿತ್ತೆರ್. ಆಂಡ ಯಾತ್ರಿಲು ಪಿದಡುನ ಜಾಗೆಲೆನ ಪಟ್ಟಿರ್ದ್ ಕುಡ್ಲನ್ ಸಮಿತಿ ಬುಡ್ತ್ಂಡ್ ಪಂದ್ ತೆರಿದ್‌ಬೈದ್ಂಡ್.
ಕುಡ್ಲ ಜಿಲ್ಲೆದ ಜನೊಕುಲು ಅಂಚೆನೇ ಚಿಕ್ಕಮಗಳೂರು, ಒಡಿಪು, ಹಾಸನ, ಕೊಡಗು ಜಿಲ್ಲೆದಕುಲ್ಲಾ ಕುಡ್ಲ ವಿಮಾನ ಉಂತಡೆರ್ದೇ ಯಾತ್ರೆ ಮಲ್ತೊಂದಿತ್ತೆರ್. ಈ ಸರ್ತಿ ಬೆಂಗಳೂರುಗ್ ಅತ್ತ್ಂಡ ಕಣ್ಣೂರ್‌ಡೆ ಆದ್ ಯಾತ್ರೆ ಪಿದಡೊಡಾಪುನೆರ್ದಾವರ ಜಿಲ್ಲೆದ ಯಾತ್ರಿಲೆಗ್ ಮಸ್ತ್ ತೊಂದರೆ ಆವರೆ ಉಂಡು ಪಂದ್ ಜಿಲ್ಲಾ ಹಜ್‌ ನಿರ್ವಹಣ ಸಮಿತಿದ ಕಾರ್ಯಂತೆರ್ ಹನೀಫ್ ತೆರಿಪಾಯೆರ್.