Last updated on May 31st, 2023 at 09:14 pm
ಬನ್ನಾರ ಚಾವಡಿಡ್ ಉಲ್ಲೇರ್ ಆರ್ ಪಾಂಗೊಲ್ಲ ಬನ್ನಾರ್, ಬನ್ನಾರೆ ಬೂಡುಡು ತೊಟ್ಟಿಲ ಬಾಲೆಗ್ ಕಿದೆತ ಕೈಕಂಜಿಗ್ ಮಲ್ಲ ಆಪತ್ತ್ ಬೈದ್ಂಡ್‌ಗೆಯೇ, ರಾಮ ರಾಮ ಕಾಲನೇ ಉಲೋಉಲೋ ವಿದಿಯೇ ಪಂಡೇರ್ ಪಾಂಗೊಲ್ಲ ಬನ್ನಾರ್. ದಾನೆ ಮಲ್ಪುನು ಪನ್ದ್ ಗೆರೆತೆರ್ ಬನ್ನಾರ್, ಒಕ್ಕಗ್ ಕೈ ಕೊರಿಯೆರ್ ಬನ್ನಾರ್ ಒಕ್ಕದ ಬೊಳ್ಳಿನೂಲು ದೆತ್ತೆರ್ ಬನ್ನಾರ್
ಮುಡಿಪು ದೀಯೆರ್ ಬನ್ನಾರ್, ಈಡ್ ಕಟ್ಟಿಯೆರ್ ಬನ್ನಾರ್
ಪೆತ್ತ ಕೈಕಂಜಿ ತೊಟ್ಟಿಲ ಬಾಲೆಗ್ ಗುಣ ಆವಡ್ ಪಂಡೇರ್ ಬನ್ನಾರ್.
ಮನದಾನಿ ಕಾಲ್ತೆಗ್, ನೋಟ ತೂವೊಡು ನಿಮಿತ್ತ ತೆರಿಯೊಡು ಪಂಡೆರ್ ಬನ್ನಾರ್, ಬಲ್ಯಾಯನ ಇಲ್ಲಗ್ ಬತ್ತೇರೋ. ಯಾಪಲಾ ಬರಂದಿ ಉಲ್ಲಾಯೆ ಇನಿ ದಾನೆ ಬತ್ತರ್ಂಡ್ ಕೇಂಡೆನೊ ಬೆರಮನೆ. ಪುಂಡಿತ್ತ್ ದೀವೊಡು ಕಂಡಿತ್ತ್ ಪನೊಡು ಪಂಡೆರೊ ಬನ್ನಾರ್. ಪುಂಡಿತ್ತ್ ದೀದ್ ತೂಯಿನ ಬೆರಮನೆ ಓ ಉಲ್ಲಯ ಕೇನ್ಲೆ ಉಲ್ಲಯ ಪಂಡೆನೊ, ಮಾಮಲ್ಲ ದೈವ ಒಂಜಿ ಪಾಂಗೊಲ್ಲ ಬನ್ನಾರೆ ಚಾವಡಿಗ್ ಬೈದ್ಂಡೊ, ಆ ದೈವೊಗು ಸಿರಿಸಿಂಗಾರದ ಬೋಗ ಆವೊಡು ಬಾಕ್ಯಾರ್ ಜತ್ತ್ ಬಲಿನೇಮ ಆವೊಡು, ಗಗ್ಗರದ ಎಚ್ಚಿ ಆವೊಡು ಪಂಡೆನೋ ಬಲ್ಯಾಯೆ. ಬನ್ನಾರ ಬೂಡುಗು ಪಂಜಿಲ ಜುಮಾದಿ ದಿಟ್ಟಿ ದೀತೆ ಬನ್ನಾರೆ. ಉಂದೆನ್ ಕೇಂಡಿನ ಬನ್ನಾರ್, ಬಲ್ಯಾಯ ಕೊಟ್ಯರ್ದ್ ಬೂಡುಗು ಬತ್ತೆರ್, ನಿರೆಕರೆನ್ ಲೆತ್ತೆರೊ. ಲೆತ್ತಿ ಗಲಿಗೆಡ್ ಬತ್ತಿ ನಿರೆಕರೆ ದಾನೆ ಲೆತ್ತರ್ ಉಲ್ಲಾಯ ಪಂಡೆರ್. ಪಾಂಗೊಲ್ಲ ಬನ್ನಾರ್ ಪಂಡೆರ್ ನಿಕುಲು ಊರು ಜಪ್ಪೊಡು, ಕಟ್ಟಿ ಇಲ್ಲ್, ದೆತ್ತಿ ಬಾಕಿಲ್ ಬುಡ್ರೆ ಬಲ್ಲಿ, ಇಲ್ಲಗೊಂಜಿ ಸಿರಿ, ಇಲ್ಲಗೊಂಜಿ ಬೊಂಡ ಕನೊಡು ಪಂಡೆರೊ ಬನ್ನಾರ್. ಉಂದೆನ್ ಕೇನಿ ನಿರೆಕರೆತ ಮಂದೆ ಊರು ಜತ್ತೆರೊ, ಕಟ್ಟಿ ಇಲ್ಲ್ ದೆತ್ತಿ ಬಾಕಿಲ್ ಬುಡಂದೆ ಇಲ್ಲಗೊಂಜಿ ಸಿರಿ, ಇಲ್ಲಗೊಂಜಿ ಬೊಂಡ ಬುಡಂದೆ ಕನತೆರೊ. ದುಂಬು ಪೋನಗ ತಿಕ್ಕುಂಡು ಗುಡ್ಡೆದ ಆಲಿಬಾಲಿನಾಯಕನ ಇಲ್ಲ್. ಓಲಪ್ಪ ನಾಯಕಾ ಕೇನ್ಲಾ ಪಂಡ್ಂಡ್ ನಿರೆಕರೆ. ಬನ್ನಾರೆ ಚಾವಡಿಗ್ ಪೊಸ ಬೂತ ಒಂಜಿ ಬೈದ್ಂಡ್ ಒಂಜಾಂಡ ಸಿರಿ ಒಂಜಾಂಡ ಬೊಂಡ ಕೊರೊಡು ಪಂಡ್ ಜನಮಂದೆ. ಉಂದೆನ್ ಕೇಂಡಿನ ಆಲಿಬಾಲ್ ನಾಯ್ಗೆರ್ ಪಂಡೆರ್, ಸಿರಿ ಪಂಡ ಸಿರಿಕೇದಯಿದ ಒಲಿ ಕೊರುವೆ, ಬೊಂಡ ಬೋಡಾಂಡ ಗುಡ್ಡೆದ ಕಾಯರ್ದ ಲತ್ತ್ ಬೀಜ ಕೊರ್ವೇಂಡೆರ್, ಬನ್ನಾರೆ ಚಾವಡಿಗ್ ಕಾಡ್‌ದ ಕಾಡ್‌ಬೂತೊಲೆಗ್ ಉಪ್ಪಡ್ ಪಂಡೇರ್. ಉಂದೇನ್ ಕೇಂಡಿನ ನಿರೆಕರೆತ ಮಂದೆ ಬನ್ನಾರೆ ಚಾವಡಿಗ್ ಪೋಯೆರ್, ಕಟ್ಟಿ ಇಲ್ಲ್ ದೆತ್ತಿ ಬಾಕಿಲ್‌ರ್ದ್ ಸಿರಿಬೊಂಡ ಕನಯನೊ ಬನ್ನಾರೆ ಆಲಿ ಬಾಲಿ ನಾಯ್ಗೆ ಕೊರ್ಜೆ. ಬನ್ನಾರೆ ಚಾವಡಿಗ್ ಬೋಡಾಂಡ ಕೇದಯಿದ ಒಲಿ, ಕಾಯರ್ದ ಕಾಯಿ ಕೊರ್ಪೆ ಪನ್ದ್ ಪಂಡೆನೊ. ಆಲಿಬಾಲಿ ನಾಯ್ಗೆ ಕೊರ್ಜಿಡ ಪೋವಡ್, ಬನ್ನಾರೆ ಚಾವಡಿಡ್ ಮಲ್ಲ ಬೂತ ಒಂಜಿ ಉಂಡುಡ ಅವ್ ಕಾಣಿಗೆ ಕೊರ್ಪಾವು ಪನ್ದ್ ಪಂಡೆರೊ ಪಾಂಗೊಲ್ಲ ಬನ್ನಾರ್.
ಬಾಕ್ಯಾರ್‌ಗ್ ಬಂಡಾರ ಜತ್ತ್ಂಡ್‌ಯೇ, ಬಾಕ್ಯಾರ ನಡುಕಂಡೊಡು ದೈವ ನಿಲೆಯಾಂಡ್‌ಯೇ, ಅತ್ತರದ ನೈವೇದ್ಯ ಒಂತೆ ಉಂತಾಲೆ ಪನ್ಂಡ್ ದೈವ ಜುಮಾದಿ, ಎಂಕೊಂಜಿ ಗಲಿಗೆದ ಪೊರ್ತು ಬೋಡು ಪನ್ಂಡ್ ದೈವ ಜುಮಾದಿ. ಪಾಂಗೊಲ್ಲ ಬನ್ನಾರೆ ಒರು ದೆತೊಂಡು ದೈವ ಜುಮಾದಿ, ಗುಡ್ಡೆದ ನಾಯಕನ ಇಲ್ಲಗ್ ಬತ್ತ್ಂಡ್ ಜುಮಾದಿ. ಗುಡ್ಡೆದ ಆಲಿಬಾಲಿ ನಾಯಕನ ಇಲ್ಲಡ್ ಜೆಯಿದೊಲು ಆಲ್ ಮಾನಿ ಬಾಲೆ. ಪಾಂಗೊಲ್ಲ ಬನ್ನಾರೆ ಒರುಟು ನಡೀರ ಜಾಮಂದ ಪೊರ್ತುಡು ಬತ್ತ್ , ಮಾನಿ! ಓ ಮಾನಿ! ಪನ್ದ್ ಲೆತ್ತ್ಂಡೇ ದೈವ ಜುಮಾದಿ. ಓ ಉಲ್ಲಾಯ! ಈರ್ ದಾನೆ ಮೂಲು? ಈ ನಡೀರ್‌ಡ್ ದಾಯೆಗ್ ಎನನ್ ಲೆತ್ತರ್? ಕೇಂಡೊಲಾ ಮಾನಿಬಾಲೆ. ಒಂಜಾತ್ ಅರ್ಲುನ ಕೆಂಡ ಕೊರು ಮಾನಿ, ಲಕ್ಕ್‌ದ್ ಬಲ ಪನ್ದ್ ಪಂಡೆರೊ ಬನ್ನಾರ್. ಮೂಜಿ ದಿನತ ಪೆದ್ಮೆದ್ ಯಾನ್ ಬನ್ನಾರ್, ಮೂಜಿ ದಿನ ಆಂಡ್ ಪೆದ್ದ್‌ದ್, ಯಾನ್ ದಾದ ಗೆಂಡ ಕೊರುವೆ ಪಂಡೆಲೊ ಮಾನಿ ಆಲ್ ಮಾನಿಬಾಲೆ. ಎನಡ ಏಲ್ ಜನ ಪೆದ್ಮೆದಿ ತಾಂಕುನಕುಲು ಉಲ್ಲೆರ್ ಬನ್ನಾರೆ ಅಕಲೆನ್ ಲಕ್ಕಾವೆ ಪಂಡೆಲೊ ಮಾನಿ ಬಾಲೆ. ಪಗೆಲ್‌ಡ್ ನಿನ್ನ ಚಾಕಿರಿ ಮಲ್ತ್ ಬೊಡಿದೆರ್ ಅಕುಲು, ಅಕಲೆನ್ ಲಕ್ಕಾವೊಡ್ಚಿ ಪಂಡೆರೊ ಬನ್ನಾರೆ. ಎನ್ನ ಪಲಯೆ ಉಲ್ಲೆ ಆರೆನ್ ಲಕ್ಕಾವೆ ಪಂಡೆಲೊ ಮಾಣಿಬಾಲೆ. ಕಾಲ್ತೆರ್ದ್ ಬಯ್ಯಮುಟ್ಟ ತಾರಿ ಮರ ಮೂರ್ದು ಸೊಂದುಂದು ಜೆಯಿದೆ ಆಯನ ಲಕ್ಕಾವಡ ಮಾನಿ, ಈಯೇ ಲಕ್ಕ್‌ದ್ ಒಂತೆ ಕೆಂಡ ಕೊರು ಪಂಡೆರೊ ಬನ್ನಾರ್. ಲಕ್ಕ್‌ದ್ ಕುಲ್ಲಿಯೊಲು ಮಾನಿಬಾಲೆ, ಬೊಲ್ಲಿ ಗೆಜ್ಜತ್ತಿ ಪತಿಯೊಲು, ಪನ್ನೆತತ್ರ ಕೈಟ್ ಪತೊನಿಯೊಲು, ದೂಪಕಲಸೊಡು ಉರಿಗೆಂಡ ದೆತ್ತೊಲೊ ಬಾಲೆಮಾನಿ. ಇಲ್ಲದ ತಡ್ಯಡ್ ಉಂತಿಯೊಲೊ ಮಾನಿ, ತತ್ರೊನು ಮೋನೆಗ್ ಅಡ್ಡ ಪತ್ತಿಯೊಲು, ಒಂಜಿ ಕಾರ್ ತಡ್ಯೊಗು ದೀಯೊಲು, ಬಲತ ಕೈಟ್ ಕೆಂಡೊನು ಉಲ್ಲಾಯೊಗು ನೀಟಾಯೊಲಾ ಮಾನಿ. ಉಂದು ನಟ್ಟ ನಡೀರ್ ಮಾನಿ, ತಡ್ಯೊಡು ಉಂತುದು ಪಲಯನ ಪೊಲಿ ಕಲೆಯಡ, ರಡ್ಡ್ ಕಾರ್ಲಾ ಪಿದಯಿ ದೀಲ ಪಂಡೆರೊ ಪಾಂಗೊಲ್ಲ ಬನ್ನಾರ್. ರಡ್ಡ್ ಕಾರ್ ಪಿದಯಿ ದೀಯೊಲೊ ಮಾನಿ ಕೆಂಡ ಕೊರಿಯೊಲೊ, ಕೆಂಡೊನು ದತ್ತ ಕೈಟ್ ದೆತೊಂಡೆರೊ, ಬಲತ ಕೈಟ್ ಮಾನಿನ್ ಪತ್ತಿಯೊರೊ, ಮಾನಿನ್ ಮಾಯ ಮಲ್ತೆರೊ. ಉಲೊ ಉಲೊ ಪಂಡೊಲೊ ಮಾನಿ, ಒಂಜಿ ಸಿರಿ ಬೊಂಡೊಗು ಈ ಗತಿಯಾ ಪಂಡೊಲ್ ಮಾನಿ, ಆ ಜುಮಾದಿಗ್ ಎನನ್ ಎನ್ನ ಪಲಯೆ ಕೈ ದೆರ್ತ್ ಕೊರಿಯೊನೊ ಪಂಡಲ್ ಮಾನಿ. ಎನನ್ ಮಾಯ ಮಲ್ತರೊ ಉಲ್ಲಾಯ ಎನ್ನೊಂಜಿ ಪಾತೆರ ಕೇನ್ಲೆ ಎನ್ನ ಬಾಲೆನ್ಲಾ ಮಾಯ ಮಲ್ಪುಲೆ ಪಂಡೊಲೊ ಮಾನಿ. ಕಂಡಿಗ್ ಕೈ ಪಾಡಿಯೆನೊ ಜುಮಾದಿ ಪಾಲೆದ ಬಾಲೆನ್ ದೆತ್ತೊನೊ ಜುಮಾದಿ, ಬಾಲೆನ್ಲಾ ಮಾಯ ಮಲ್ತ್, ಬನ್ನಾರೆ ಚಾವಡಿಗ್ ಬತ್ತೆನೊ ಜುಮಾದಿ. ಬನ್ನಾರೆ ಬಕ್ಯಾರ್‌ಡ್ ಬಲಿನೇಮ ನಡತ್ಂಡ್.
ಆಲಿಬಾಲಿ ನಾಯಕೆ ಒರಾನೆ ಲಕ್ಕಿಯೊನೊ, ಮಾನಿ! ಓ ಮಾನಿ ಪನ್ದ್ ಲೆತ್ತೆನೊ ಆಲಿಬಾಲಿ ನಾಯಕೆ. ಒರಿವಾರ ಲೆಪ್ಪುಗು ಮೀವರಿರ್ದ್ ಓ ಕೊರಿಯೊಲೊ ಮಾನಿ. ದಿಡ್ಕ ಲಕ್ಕಿಯೆ ನಾಯಕೆ ಪಿದಯಿ ಬಲ್ತೆನೊ ನಾಯಕೆ, ಮಾನಿ ಮಾನಿ ಪನ್ದ್ ಲೆತ್ತೆನೊ, ತೇವುದ ಪುಂಡೆಲ್ಡ್ ಓ ಕೊರಿಯೊಲು ಮಾನಿ, ಅಡೆಗ್ ಬಲ್ತೊನೊ ಆಲಿಬಾಲಿ ನಾಯಕೆ ಓಲುಲ್ಲ ಮಗ ಮಾನಿ ಪನ್ದ್ ಕಣ್ಣನೀರ್ ಪಾಡುವೆನೊ ಆಲಿಬಾಲಿ ನಾಯಕೆ. ತೋಡುದ ಪುಡೆರ್ದ್ ಓ ಕೊರುವೊಲು ಮಾನಿ, ಓ ಪಲಯಾ ಓ ಪಲಯಾ ಪನ್ದ್ ಲೆತ್ತಲೊ ಮಾನಿ, ಒಂಜಿ ಸಿರಿ ಬೊಂಡೊಗು ಎನನ್ ದೈವೊಗು ಕಟ್ಟಿಯನಾ ಪಲಯ ಪನ್ದ್ ಕೇಂಡಲೊ ಮಾನಿ. ಉಂದೆನ್ ಕೇನ್ದ್ ಕಡೆಕಣ್ಣ್‌ಡ್ ಕೊಡಿದುಕ್ಕ ಬುಡಿಯೊನೊ ಆಲಿಬಾಲಿ ನಾಯಕೆ. ಕೈಲ್ ಕೈಲ್ ಬೊಂಡ ದೆಪ್ಪಾವೆ, ಕಟ್ಟ ಕಟ್ಟ ಸಿರಿ ಕಡ್ಪಾವೆ, ಬನ್ನಾರೆ ಚಾವಡಿಗ್ ಬಲ್ತೆನೊ ನಾಯಗೆ. ಕೈಲ್ ಕೈಲ್ ಬೊಂಡ ಕನತೆ, ಕಟ್ಟ ಕಟ್ಟ ಸಿರಿ ಕನತೆ ಬನ್ನಾರೆ ಪಂಡೆನೊ ನಾಯಗೆ. ಸಿರಿ ಪಂಡ ಕೇದಯಿದ ಒಲಿ ಅತ್ತೊ, ಬೊಂಡ ಪಂಡ ಕಾಯರ್ದ ಕಾಯಿ ಅತ್ತೊ ಪಂಡೆನೊ ಬನ್ನಾರ್, ಆಯ್ಯೊ ಬನ್ನಾರೆ ದಮ್ಮಯ್ಯ ದಕ್ಕಯ್ಯ ಪಾಡುವೆನೊ ನಾಯಗೆ. ಈ ದಾಯೆ ದಮ್ಮಯ್ಯ ದಕ್ಕಯ್ಯ ಪಾಡುವ ಪಲಯಾ ಪಂಡೊಲಾ ಮಾಯಂದ ಮಾನಿಬಾಲೆ, ಇರೆನ ಬಂಜಿಗ್ ತೂ ಪಾಡಿನಂಗೆ ಪಲಯಾ ಆರೆನ ಬಂಜಿಗ್ಲಾ ತೂ ಪಾಡುವೆ ಪಂಡೆಲೊ ಮಾಯದಾಲ್ ಮಾನಿ ಬಾಲೆ. ಬನ್ನಾರೆ ಮರ್ಮಲ್ ಪಜ್ಜಿ ಪೆದ್ಮೆದಿನ್ ತೂಪೊಲಾ ಮಾಯದಾಲ್ ಮಾನಿ ಬಾಲೆ, ಅಲೆನ ಪಜೆಟ್ ಕುಲ್ಲುವೊಲಾ ಮಾಯಂದಾಲ್ ಮಾನಿ, ಪೆದ್ದ್‌ದ್ ಏತ್ ದಿನ ಆಂಡ್ ಪನ್ದೇ ಕೇಂಡೊಲಾ ಅಲೆನ್ ಮಾಯ ಮಲ್ತೊಲಾ ಮಾಯಂದಾಲ್ ಮಾನಿಬಾಲೆ. ಕೆದುತ ಕರೆಟ್ ಅಲೆನ್ ಉಂತಾವೊಲಾ ಮಾನಿಬಾಲೆ. ಬೂಡುದ ಉಲಅದೆ ಪೂರಾ ನಾಡಿಯೊರೊ ಪಾಂಗೊಲ್ಲ ಬನ್ನಾರ್, ಮರ್ಮಲ್ ತೋಜಿಜೊಲಾ, ಮರ್ಮಲೆನ್ ಲೆತ್ತೆರೊ ಬನ್ನಾರ್. ಕೆದುತ ಕರೆಟ್ ಓಕೊರಿಯಲೊ ಮರ್ಮಾಲ್, ಅಲೆನ್ ನೀರ್ದ ಕೋರಿದ ಒರುಟು ಮಾಯ ಮಲ್ತೊಲಾ ಮಾನಿಬಾಲೆ. ಕೆದುತ ಕರೆಟ್ ನೀರ್ಕೊರಿಯಾದ್ ಉಂತುದೊಲಾ ಮರ್ಮಲ್. ಒಂಜಿ ಸಿರಿಕ್ ಒಂಜಿ ಬೊಂಡೊಗು ಎನ್ನ ಚಾವಡಿಗ್ ಬತ್ತೊಲೊ ಮಾನಿಬಾಲೆ ಪಂಡೆರೊ ಪಾಂಗೊಲ್ಲ ಬನ್ನಾರ್. ಎನ್ನ ಮರ್ಮಲೆನ್ ಮಾಯ ಮಲ್ತ್ ತನ್ನೊಟ್ಟುಗು ಕನತೊಲೊ ಪಂಡೆರ್ ಬನ್ನಾರ್ ಕಡೆ ಕಣ್ಣ್‌ಡ್ ಕೊಡಿದುಕ್ಕ ಬುಡಿಯೊರೊ. ಬನ್ನಾರೆ ಚಾವಡಿ ಪೊಗ್ಗಿಯೊಲೊ, ದೈವ ಆದ್ ಜುಮಾದಿನ ಕೈತಲ್ ನಿಲೆಯಾಯೊಲೊ ಮಾನಿಬಾಲೆ. ತೊಟ್ಟಿಲ ಬಾಲೆನ್, ಪೆದ್ಮೆದ್ ಪೊಣ್ಣನ್ ಕಾಪುನ ದೈವ ಆಯಲೊ ಮಾನಿಬಾಲೆ. ಮಾಯಂದಾಲ್ ಆದ್ ಮೈಂದಾಲ್ ಆದ್ ತುಳುನಾಡೊರ್ಮೆ ಪಸರಿಯೊಲೊ ಮಾನಿಬಾಲೆ.