ಈ ಸಲ ಗೆಂದಿನಕುಲು ವಿಧಾನಸಭೆಟ್ ತುಳುಟು ಪ್ರಮಾಣವಚನ ದೆತೊನುವೆರಾ? ವಸಂತ ಬಂಗೇರೆರ್ ತುಳುಟು ಪ್ರಮಾಣವಚನ ದೆಪ್ಪುನಗ ಆಯಿನ ಅವಮಾನ ದಾದ?

Last updated on May 20th, 2023 at 09:12 pm

ತುಳು ಭಾಷೆದ ಬಗೆಟ್ ಮೋಕೆ ಇತ್ತಿನಕುಲು ಪ್ರತೀ ಸಲ ಪೊಸ ವಿಧಾನಸಭೆ ಬನ್ನಗ ತುಳುನಾಡ್ ರ್ದ್ ಅಜತ್ ಬತ್ತಿನ ಶಾಸಕೆರ್ ತುಳುಟೇ ಪ್ರಮಾಣ ವಚನ ದೆತೊನುವೆರ್ ಪನ್ಪಿನ ಅಂಗಲಪ್ಪುಡು ಇಪ್ಪುವೆರ್. 2018 ಡು ಈ ದಿಸೆಟ್ ಒಂಜಿ ಟ್ವಿಟರ್ ಕ್ಯಾಂಪೇನ್ಲಾ ಮಲ್ದಿತ್ತೆರ್. ಆಂಡ ಉಂದೆಕ್ ಅದಗ ಗೆಂದ್ದ್ ಬೈದಿತ್ತಿನ ಶಾಸಕೆರೆ ಕೆಬಿ ಕೊರ್ತುಜೆರ್.

ಒವ್ವೇ ಡಿಮ್ಯಾಂಡ್ ದಾಂತೆ ತನ್ನ ಸ್ವ ಇಚ್ಛೆಡ್ ಅಪ್ಪೆಬಾಸೆದ ಮಿತ್ತ್ ಮೋಕೆಡ್ ತುಳುಟು ಪ್ರಮಾಣವಚನ ದೆತೊಂದಿನಾರ್ ಪನ್ಡ ಬೊಲ್ತೇರ್ದ ಶಾಸಕೆರಾದಿತ್ತಿನ ವಸಂತ ಬಂಗೇರ್ಲು. ಮೇರ್ 2013ಟ್ಟ್ ತುಳುಟು ಪ್ರಮಾಣವಚನ ದೆತೊನ್ನಗ ಅಪಗದ ಇಂಟೆರಿಮ್ ಸ್ಪೀಕರ್ ಆದಿತ್ತಿನ ಮಾಲೀಕಯ್ಯ ಗುತ್ತೇದಾರ್ ಮೇರ್ ತಡೆತ್, ತುಳುಕು ಸಂವಿಧಾನದ ಮಾನ್ಯತೆ ಇಜ್ಜಿ ಅಂಚಾದ್ ತುಳುಟು ದೆತೊನೊಡ್ಚಿ ಕನ್ನಡೊಡು ಪನ್ಲೆ ಪಂಡೆರ್. ಉಂದೆನ್ ಪ್ರತಿಭಟನೆ ಮಲ್ತಿನ ಸ್ವಾಭಿಮಾನಿ ವಸಂತ ಬಂಗೇರೆರ್ ಉಂದೆರ್ದ್ ದುಂಬುಲಾ ಯಾನ್ ತುಳುಟು ಪ್ರಮಾಣವಚನ ಮಲ್ದೆ, ಅಪಗ ಉಪ್ಪಂದಿನ ಅಡೆತಡೆ ಇತ್ತೆ ದಾಯೆಗ್ ಪನ್ದ್ ಪ್ರಶ್ನೆ ಮಲ್ದಿತ್ತೆರ್.

ಈ ನಡಕೆರ್ದ್ ಬೊಕ್ಕ ತುಳುವೆರ್ ಜಾಗೃತರಾದ್ ಪ್ರತೀ ಸಲ ಪೊಸ ಶಾಸಕೆರೆಗ್ ತುಳುಟು ಪ್ರಮಾಣವಚನ ದೆತೊನರೆ ಪನ್ಪೆರ್. ಉಂದೆನ್ ಕರಿನ ಸಲ ಏರ್ಲಾ ಕೆಬಿಕ್ ಪಾಡ್ದಿತ್ತಿಜೆರ್. ಈ ಸಲಲಾ ಕುಡ ತುಳುವೆರ್ ಶಾಸಕೆರೆಗೇ ತುಳುಟೇ ಪ್ರಮಾಣವಚನ ದೆತೊನರೆ ಪನೊಂದುಲ್ಲೆರ್. ತನ್ಕುಲೆನ್ ಓಟು ಪಾಡಿನಕಲೆನ, ತುಳುವೆರ್ನ ರುಣೊಟುಪ್ಪುನ ಶಾಸಕೆರ್ನಕುಲು ಈ ಸಲ ಆಂಡಲ ತುಳುವೆರೆ ಪಾತೆರೊನು ಕೆಬಿಕ್ ಕೊನೊಪೆರಾ ತೂವೊಡು.