Last updated on August 15th, 2023 at 06:40 pm
ತುಳುವಪ್ಪೆನಾತ್ ನತದೃಷ್ಟ ಭಾಷೆ ಉಪ್ಪಂದ್ ಈ ಜಗತ್ತ್‌ಡ್. ಪುಟ್ಟರೆ, ಬುಲೆಯರೆ ತುಳುನು ಗಲಸಿನ ಮಸ್ತ್ ಜನ ಚೂರು ಅಡಿಲಕ್ಕಿನೇ ಬರಿತ ನಿರೆಕರೆತ ಭಾಷೆಲೆಗ್ ತಿಪ್ಪಿ ಪತ್ತ್‌ದ್ ತುಳುನು ಮದತಿನ ಉದಾರ್ಮೆ ಮಸ್ತ್ ಉಂಡು. ಪುಟ್ಟುನಗ ನಾಲಯಿ ಉಡೆರ್ದ್ ಸುರುಟು ಬತ್ತಿನ ಬಾಸೆ ತುಳು ಆಂಡಲಾ ಮಸ್ತ್ ಜನ ಅವೆಕ್ ಕೊರ್ಪಿನ ಮರ್ಯಾದಿ ಕಡೇತವು. ಉಂದು ದಾಯೆಗ್ ಇಂಚ ಆಂಡ್ ಪನ್ದ್ ತೂನಗ ತೆರಿಯುನು ವ್ಯವಸ್ಥಿತವಾದ್ ರಾಜ್ಯ ಸರಕಾರ, ತುಳುನಾಡ್‌ದ ಕೆಲವು ಸಾಹಿತಿಲೆನ ಬರವು ತುಳುವೆರೆನ ಮಂಡೆ ತಿರ್ಗಾದ್ ತುಳು ಪಂಡನೇ ತಿರ್ತ್, ಬೇತೆ ಬಾಸೆ ಮಿತ್ತ್ ಪನ್ಪಿಲೆಕ್ಕ ಮಲ್ತ್ ಪಾಡಿನವು. ಮಸ್ತ್ ಜನಕ್ ತುಳುವೆರೆನ ಸಂಸ್ಕೃತಿ ಬೋಡು, ತುಳುನಾಡ್‌ದ ದೇವಲ್ಯೊಲು ಬೋಡು, ಪಿಲಿಯೇಸ, ಕೋಲ, ಆಟ, ಕಂಬುಲ ಪೂರಾ ಬೋಡು ಆಂಡ ತುಳು ಬಾಸೆ ಬೊಡ್ಚಿ. ಪೆರ್ಮೆಡ್ ನಾಲ್ ಜನ ಉಪ್ಪುನಲ್ಪ ಯಾನ್ ತುಳುವೆ ಪನ್ದ್ ದೈರ್ಯೊಡು ಪನ್ಪಿನ ತಂಕಲಾ ದಾಂತಿನ ಬಾಲೆಲ್ಲೆನ್ ಪುಟ್ಟು ಪಾಡಿನ ತುಳುವಪ್ಪೆನ್ ನತದೃಷ್ಟೆ ಪನಂದೆ ಬೇತೆ ದಾದ ಪನ್ಪಿನಿ? ಬರಿತಿಲ್ಲದಕುಲು ಏತ್ ದಿನ ತಮ್ಮನ ಪಾಡೆರ್? ಅಕಲೆನ ಮಡೆ ಇರೆಕ್ ಎಕ್ಕಲೊಂದು ಎಕ್ಕಲೊಂದು ತುಳುವೆರ್ ತನ್ಕುಲೆನ ಅಸ್ಥಿತ್ವೊನೇ ಮದತೆರ್. ಪನವುಗಾ, ಪುರಸ್ಕಾರೊಗಾ, ಪುದರ್‌ಗಾ ಬೇತೆ ಬಾಸೆನ್ ಮಂಡೆಡ್ ತುಂಬೊನಿನಕುಲು ತುಳುನು ಕಾರ್‌ದ ಅಡಿಕ್ ಪಾಡ್‌ದ್ ದೊಂಕಿನ ಮಾತ್ರ ಎರೆಗ್ಲಾ ತೋಜಂದ್. ಅಪ್ಪೆ ಪರಕುಂಟು ಪಾಡೊಂದು ಬಂಜಿಗ್ ದಾಂತೆ ಸೈತ್ಂಡಲಾ ಮಲ್ಲೆಜ್ಜಿ ಮಾಮಿಗ್ ಮಾತ್ರ ದಂಡಿಗೆಡೇ ಕೊನೊಡು ಪನ್ಪಿ ಜೋಕುಲೆನ್ ಪೆದ್ದುನೆರ್ದ್ ತುಳುವಪ್ಪೆ ಗೊಡ್ಡು ಆದಿತ್ತ್ಂಡ ಏತೋ ಎಡ್ಡೆ ಇತ್ತ್ಂಡ್. ಕೆಲವು ಬೇತೆ ಬಾಸೆದಕುಲು ಬೊಕ್ಕ ಮುಲ್ಪದ ಅಧಿಕಾರೊಗು ಬಯಕಿನ ಕೆಲವು ಮುಂಡಾಸ್‌ದಕುಲು ಒಟ್ಟು ಸೇರ್ದ್ 1956ಟ್ಟ್ ತುಳುನಾಡ್‌ನ್ ತನ್ಕುಲೆ ಮಲ್ಲಾದಿಗೆಗ್ ಬೇತೆಕಲೆಗ್ ಮಾರಿಯೆರ್. ನಿಕಲೆನ ಜಾಗೆ ಮಾರೊರ್ದುಂಬು ಆ ಜಾಗೆದಾಯನ ಮಾತಾ ಜೋಕುಲೆನ ಸೈನ್ ಆವೊಡು, ಆಂಡ ತುಳುನಾಡ್ ಮಾರೊರ್ದುಂಬು ಮೊಕುಲು ಮಾತಾ ತುಳುವೆರೆಡ ಕೇನ್ದೆರಾ? ಆನಿ ತುಳುನಾಡ್‌ನ್ ಮಾರಿನಿ ಮಾತ್ರ ಅತ್ತ್, ತುಳುವೆರೆ ಸ್ವಾಭಿಮಾನ, ಅಸ್ಥಿತ್ವ, ಭಾಷೆ, ಸಂಸ್ಕೃತಿನಿ ಮಾರಿನಿ.
ತುಳುವಪ್ಪೆನ ಮಟ್ಟೆಲ್‌ಡ್ ಪುಟ್ಟಿನ ಪಕ್ಕಿಲು ರೆಂಕೆ ಬಲತಿನೇ ಕಾರಿ ಬುಡ್ದ್ ತಾನ್ ಒಲ್ತು ಬತ್ತ ಪನ್ದ್ ಮದತ್ ಯಾನ್ ತುಳುವೆ ಅತ್ತ್ ಪನ್ದ್ ಪನ್ತಿನಲಾ ಉಂಡು. ಪಬ್ಲಿಸಿಟಿಗಾದ್ ಅಪ್ಪೆನೇ ದಂಟಿನಕಲೆನ್ಲಾ ಅಕಲೆನ್ ಅಲ್ಪ ಗೆನ್ಪಂದೆ ಕುಡ ಬಚ್ಚಿದ್ ತುಳುವ ಮಟ್ಟೆಲ್‌ಗ್ ಬತ್ತಿನಪಗ ಅರಾದ್ ಪತ್ತ್‌ದ್ ಗೆಂದಾವುನು ಉಂದೇ ಮುಗ್ದೆರ್ ತುಳುವೆರ್. ಪಕ್ಕಿ ಕಾರಿ ಬುಡ್ದ್ ಏತೇ ಮಿತ್ತ್ ರಾಂಡಲ ಕಡೆಕ್ ನೆಲಕೇ ಬೂರೊಡು, ತಾಂಗ್ ದಾಂತೆ ಆಕಾಸೊಡು ಗೂಡು ಕಟ್ಟರೆ ಆಪುಜಿ ಅತೇ? ಆಂಡ ತುಳುವೆರೇ! ಆ ತಾಂಗ್ ಬಚ್ಚಿದ್ಂಡ್, ಉದಲ್ ಪತ್ತೊಂದುಂಡು. ಇಂಚೆನೆ ಆಂಡ ಒಂಜತ್ತ್ ಒಂಜಿ ದಿನ ತಾಗ್ ತುರಿದ್ ಬೂರುಂಡು. ಪಕ್ಕಿ ಆಕಾಸೊಡೇ ಒರಿಯುಂಡು, ಅಪ್ಪೆ ಜಕ್ಕೆಲ ಕಾರಿ ಮಣ್ಣ್ ಸೇರುಂಡು. ತುಳು ಮದಪಡೆ, ತುಳುಕು ಯಾಪಲಾ ಅನ್ಯಾಯ ಮಲ್ಪಡೆ. ತುಳುವೆ ಆದ್ ಪುಟ್ಟಿನಕುಲು ತುಳುವೆ ಆದ್ ಸೈಲೆ.