Last updated on June 11th, 2023 at 07:27 am
ಡ್ರಗ್ಸ್ ಜಾಲೊನು ಅಂಕೆಗ್ ಕನಪುನ ಕಾರ್ಯಾಚರಣೆ ದುಂಬರಿತ್‌ದ್, ಎಂ.ಡಿ.ಎಂ.ಎ. ಸಿಂಥೆಟಿಕ್ ಡ್ರಗ್ ಇತ್ತಿನ ರಡ್ಡ್ ಜನೊನು ಅಂಚೆನೇ ಅಕಲೆಡಿತ್ತಿನ ಲಕ್ಷಾಂತರ ರೂಪಾಯಿ ಮೌಲ್ಯೊದ ಮಾದಕ ಸೊತ್ತುಲೆನ್ ಸಿಸಿಬಿ ಪೊಲೀಸೆರ್ ವಶೊಕು ಗೆತೊಂದೆರ್.
ಮಾದಕ ಸೊತ್ತಾಯಿನ Methylene dioxy methamphetamine (MDMA) ನ್ ಕಾರ್‌ಡ್ ದೀವೊಂದು ಮಾರೊಂದಿತ್ತಿನ ರಡ್ಡ್ ಜನಲಾ ಊರುದಕುಲೇ. ಒರಿ ಬಂಟ್ವಾಳ ತಾಲೂಕ್‌ದ ಪುದು ಗ್ರಾಮೊದ ಅಮ್ಮೆಮಾರ್‌ದ ಮಹಮ್ಮದ್ ಆಶ್ರಫ್ ಯಾನೆ ಚೋಟಾ ಆಶ್ರಫ್(43), ಕುಡೊರಿ ಕುಡ್ಲದ ಪೆರ್ಮನ್ನೂರ್‌ದ ಪಿಲಾರ್ ದಾರಂದಬಾಕಿಲ್‌ದ ದಾವೂದ್ ಫರ್ವೆಝ್ (36).
ರಡ್ಡ್ ಜನೊತ ಮಿತ್ತ್‌ಲಾ ಬೇತೆ ಬೇತೆ ಸ್ಟೇಷನ್‌ಡ್ ಆಜಿ ಆಜಿ ಕೇಸ್‌ಲು ಉಲ್ಲ. ಕುಡ್ಲದ ಪೊಲೀಸ್ ಕಮಿಷನರ್ ಕಚೇರಿ ಒಂಚೆನೇ ಎಸ್‌ಪಿ ಕಚೇರಿದ ಬರಿಟೇ ಇಪ್ಪುನ ನೆಹರೂ ಮೈದಾನೊಡು ಈ ರಡ್ಡ್ ಜನೊನು ವಶೊಕು ಗತೊಂದ್ಂಡು. ಮೊಕಲೆನ ಕೈರ್ದ್ ಒಟ್ಟು 55.5 ಗ್ರಾಂ ತೂಕೊದ 2,77,500 ರೂ. ಮೌಲ್ಯೊದ ಎಂಡಿಎಂಎ ಡ್ರಗ್, ರಡ್ಡ್ ಮೊಬೈಲ್ ಫೋನ್‌ಲು, 3230 ರೂ ಪಣವು, ಮಾರುತಿ ಬೆಲೆನೊ ಕಾರ್, ಡಿಜಿಟಲ್ ವೇಯಿಂಗ್ ಸ್ಕೇಲ್‌ನ್ ಪೊಲೀಸೆರ್ ವಶೊಕು ಗೆತೊಂದೆರ್.
ಈ ಮಾತಾ ಸೊತ್ತುಲೆನ ಒಟ್ಟು ಮೌಲ್ಯೊ 13ಲಕ್ಷ ರೂಪಾಯಿ ಕರಿವು ಪಂದ್ ಅಂದಾಜಿ ಮಲ್ದೆರ್. ಈ ಬಗ್ಗೆ ಆರೋಪಿಲೆನ ವಿರುದ್ಧ ತೆಂಕಾಯಿ ಕುಡ್ಲ ಪೊಲೀಸ್ ಸ್ಟೇಷನ್‌ಡ್ ಪ್ರಕರಣ ದಾಕಲಾತ್ಂಡ್.
ಡ್ರಗ್ಸ್ ಮಾರುನ ಜಾಲೊನು ಪತ್ತುನ ಕಜ್ಜೊಡು ಸಿಸಿಬಿ ಘಟಕೊದ ಎಸಿಪಿ ಪಿ. ಎ. ಹೆಗಡೆ, ಪೊಲೀಸ್ ನಿರೀಕ್ಷಕೆರಾಯಿನ ಶ್ಯಾಮ್ ಸುಂದರ್ ಹೆಚ್. ಎಂ., ಪಿಎಸ್ಐ ಸುದೀಪ್ ಎಂ. ವಿ. ಅಂಚೆನೇ ಸಿಸಿಬಿ ಸಿಬ್ಬಂದಿನಕುಲು ಇತ್ತೆರ್.