Last updated on August 15th, 2023 at 06:42 pm
ಅಪ್ರಾಪ್ತ ಪೊಣ್ಣನ ರೇಪ್ ಪ್ರಕರಣೊದ ಪೊಟ್ಟು ಜಡ್ತೆರ್ದಾವರ ತಿಂಗೊಳುಗಟ್ಟ್ಲೆ ಕರ್ಪಿಲ್ಲ್‌ಡಿತ್ತಿನ ರಡ್ಡ್ ಜನೊಕು ತನ್ಕುಲೆ ಕಿಸೆರ್ದ್ 5 ಲಕ್ಷ ರೂಪಾಯಿ ಪರಿಹಾರ ಕೊರೊಡು ಪಂದ್ ಕುಡ್ಲ ಮಹಿಳಾ ಪೊಲೀಸ್ ಠಾಣೆ ಇನ್ಸ್‌ಪೆಕ್ಟರ್ ಎಸಿ ಲೋಕೇಶ್ ಬೊಕ್ಕ ಅರೆನ ಕೂಟೊಗು ಪೋಕ್ಸೋ ನ್ಯಾಯಂತಡೆ ಆದೇಶ ಕೊರ್ತುಂಡು.
ಚಾರ್ಜ್‌ಶೀಟ್‌ಡ್ ಪುದರಿತ್ತಿನ ಒರಿಯೇ ಒರಿ ಜನ, ಸಂತ್ರಸ್ತೆನ ಪೊಪ್ಪನ್ ಬುಡ್ನಗ, ಹೆಚ್ಚುವರಿ ಜಿಲ್ಲಾ ಬೊಕ್ಕ ಸೆಷನ್ಸ್ ನ್ಯಾಯಂತಡೆದದ ನ್ಯಾಯಾಧೀಶೆ ಕೆ.ಎಂ.ರಾಧಾಕೃಷ್ಣ ಮೇರ್ ಪೊಲೀಸ್ ಜಡ್ತೆಡ್ ಮಸ್ತ್ ಗಾತಿದ ಲೋಪಲೆನ್ ನಾಡ್‌ಪತ್ತ್‌ದೆರ್. ಮುಖ್ಯವಾದ್ ಪೊಲೀಸೆರ್ ಡಿಎನ್ಎ ವರದಿ ತಿಕ್ಕುನ ದುಂಬೇ ಪ್ರಕರಣೊಡು ಒರಿನ ಮೂಜಿ ಜನ ಆರೋಪಿಲೆಗ್ ಕ್ಲೀನ್ ಚಿಟ್ ಕೊರ್ತೆರ್.
ಸಂತ್ರಸ್ತೆ ನೆಕ್ಕ್ ದುಂಬು ಅತ್ಯಾಚಾರ ಆರೋಪ ಮಲ್ದಿತ್ತಿನ ಸಂದೇಶ್‌ನ್ ಐಒ ಬಾರಿ ಮಂಡೆಕರ್ಚಿ ಮಲ್ತ್‌ದ್ ನಿರ್ಲಕ್ಷ್ಯ ಮಲ್ದೆರ್ಂದ್ ಆದೇಶೊಡು ಪನ್ತೆರ್. ಡಿಎನ್ಎ ಪರೀಕ್ಷೆಗ್ ಆಯನ ನೆತ್ತೆರ್‌ದ ಮಾದರಿನ್ ಗೆತೊನಂದೆ, ಆಯನ್ ಕೇಸ್‌ರ್ದ್ ದೂರ ದೀಪುನ ಉದ್ದೇಶೊನು ತೂಪಾವುಂಡು. ಸಂತ್ರಸ್ತೆ ತನ್ನ ಅಮ್ಮೆನೇ ಮಲ್ದಿನ ಪಂದ್ ಆರೋಪ ಮನ್ಪುನೆಕ್ ದುಂಬು ತನ್ನ ಹೇಳಿಕೆನ್ ಮಸ್ತ್ ಸರ್ತಿ ಪಗತ್‌ದಲ್.
ವಿಚಾರಣೆದ ಕಡೆಟ್, ನ್ಯಾಯಂತಡೆ ಡಿಎನ್ಎ ವರದಿನ್ ಗೆತೊಂದುಂಡು. ಡಿಎನ್ಎ ತಜ್ಞೆರ ಪ್ರಕಾರ, ಸಂತ್ರಸ್ತೆನ ಅಮ್ಮೆ ಸೇರ್ದ್ ಎಫ್‌ಐಆರ್‌ಡ್ ಪಂತಿನ ಮೂಜಿ ಜನ ಆರೋಪಿಲೆಡ್ ಏರ್ಲಾ ಸಂತ್ರಸ್ತೆನ ಭ್ರೂಣೊಗು ಜೈವಿಕ ಅಮ್ಮೆ ಅತ್ತ್ ಪಂದ್ ತೋಜಿದ್‌ಬತ್ತ್ಂಡ್.
ತನಿಖಾಧಿಕಾರಿ ಸಂತ್ರಸ್ತೆನ ಒಂಜೊಂಜಿ ಪೊರ್ತು ಒಂಜೊಂಜಿ ಪಾತೆರೊಂದಿತ್ತಿನ ಪಾತೆರೊದ ಆಧಾರೊಡು ಸಂತ್ರಸ್ತೆನ ಅಮ್ಮನ ಮಿತ್ತ್ ಎದುರುಪಿರ ತೂವಂದೆ ಆರೋಪಪಟ್ಟಿ ಸಂದಾದೆರ್ ಪಂದ್ ಆದೇಶೊಡು ಪನ್ತೆರ್. ಐಒ ಬೊಕ್ಕ ಆರೆನ ಕೂಟ ನಿಜವಾದ್ಲಾ ತನ್ಕುಲೆ ಸ್ವಾರ್ಥೊಗು ಬೋಡಾದ್ ಇಂಚಿನ ಅವ್ಯವಹಾರ ಮಲ್ದೆರ್, ಮೊಕುಲು ಸಮಾಜೊಗು ಕಳಂಕ ಪನ್ಪಿನೆನ್ ತೋಜಾವುಂಡು ಪಂದ್ ನ್ಯಾಯಾಧೀಶೆ ರಾಧಾಕೃಷ್ಣೆರ್ ಪನ್ತೆರ್.
ನಿಜವಾಯಿನ ಬೊಕ್ಕ ಸಂಭವನೀಯ ಅಪರಾಧಿಲೆನ್ ಕಾತೊನುನ ಪೊರ್ತು ದಾಲ ತಪ್ಪು ಮನ್ಪಂದಿನ ಜನೊಕ್ಲೆಗ್ ಕಷ್ಟ ಕೊರ್ತಿನೆಕ್ ಮೊಕುಲೇ ಜಬದ್ದರಿಯಾದುಲ್ಲೆರ್. ತನಿಖಾಧಿಕಾರಿರ್ದಾವರ ಅತ್ಯಾಚಾರ ಸಂತ್ರಸ್ತೆನ ಅಮ್ಮೆ ಬೊಕ್ಕ ಕೂಲಿ ಬೇಲೆದಕುಲು ನಿಜವಾಯಿನ ಬಲಿಪಶುಲಾತೆರ್. ಮೊಕಲೆನ್ ಕ್ರಮವಾದ್ 8 ತಿಂಗೊಳು ಬೊಕ್ಕ ರಡ್ಡ್ ತಿಂಗೊಳು ಕರ್ಪಿಲ್ಲ್‌ಡ್ ದೀದಿತ್ತೆರ್.
ಸಂತ್ರಸ್ತೆನ ಪೊಪ್ಪಗ್ 4 ಲಕ್ಷ ಅಂಚೆನೇ ಪ್ರಸಾದ್‌ಗ್ 1 ಲಕ್ಷ ರೂಪಾಯಿ ಪರಿಹಾರೊನು 40 ದಿನೊತ ಉಲಯಿಡ್ ಕೊರ್ಪಿನ ಮುಕೇನ ಅನ್ಯಾಯೊನು ಸಮ ಮನ್ಪೊಡೂಂದು ಐಒ ಬೊಕ್ಕ ಆರೆನ ಕೂಟೊಗು ಸೂಚನೆ ಕೊರ್ತೆರ್. ಇಂಚಿನ ಅಕ್ರಮೊಲೆಗ್ ಕೈ‌ಪಾಡುನ ಅಧಿಕಾರಿಲೆಗ್ ಪಾಠ ಆಪುಂಡು ಪಂದ್ ನ್ಯಾಯಂತಡೆ ಪಂಡ್ಂಡ್ .
ತನಿಖೆಡ್ ತೂಂಬು, ದಾಖಲೆಲೆನ ಕಲುಗಲಕೆ, ಅಧಿಕಾರ ಬೊಕ್ಕ ಸ್ಥಾನೊದ ಕಲುಗಲಕೆಗ್ ಐಒ ಬೊಕ್ಕ ಆರೆನ ಕೂಟೊನು ಜಬದ್ದರಿ ಮಲ್ತಿನ ನ್ಯಾಯಾಧೀಶೆರ್, ತಪ್ಪು ಮಲ್ದಿನಕಲ್ನ ಮಿತ್ತ ಬೋಡಾಪಿನ ಕ್ರಮ ಗೆತೊನ್ರ ಗೃಹ ವೈವಾಟ್‌ಲೆನ ಪ್ರಧಾನ ಕಾರ್ಯಂತೆರ್ ಬೊಕ್ಕ ಕುಡ್ಲ ನಗರ ಪೊಲೀಸ್ ಆಯುಕ್ತೆರೆಗ್ ತೀರ್ಪುದ ಪ್ರತಿನ್ ಕಡಪುಡ್ರ ಸೂಚನೆ ಕೊರ್ತೆರ್.