Last updated on June 7th, 2023 at 02:48 pm
ರಾಜ್ಯೊಗು ಮಾನ್ಸೂನ್ ಬರ್ಪಿನ ಕಡೆಸ್ಸಿನೆರ್ದಾವರ ಜಿಲ್ಲೆಡ್ ಇಲ್ಲ್, ಕಚೇರಿ, ಶಾಲೆ ಕಾಲೇಜಿಲೆಗ್ ನೀರ್‌ದ ಎತ್ವಾರ ಉಂಡಾತ್ಂಡ್. ಶಾಲೆಲು ಇಂಚಿಪ್ಪೊಗಾತೆ ಸುರು ಆತ. ಆಂಡ ಇತ್ತೆ ನೀರ್‌ದ ಎತ್ವಾರರ್ದಾವರ, ಕೆಲ ಶಾಲೆ ಕಾಲೇಜಿಲು ಜೋಕುಲೆಗ್ ರಜೆ ಕೊರ್ತ. ಕುಡ ಕೆಲ ಕಡೆ ಶಿಕ್ಷಣ ಸಂಸ್ಥೆಲು ಅರ್ಧ ದಿನ ಮಾತ್ರ ಕ್ಲಾಸ್ ಮಲ್ತೊಂದುಲ್ಲ. ಅಂಚೆನೇ ಆನ್‌ಲೈನ್‌‌ಡ್ ಕಾಲೇಜಿ ವಿದ್ಯಾರ್ಥಿಲೆಗ್ ಪಾಠ ನಡತೊಂದುಂಡು.
ಬಡಕಾಯಿ ಕುಡ್ಲ ಬೊಕ್ಕ ಕುಡ್ಲ ಪೇಂಟೆಗ್ ರಡ್ಡ್ ದಿನೊಕ್ಕೊರ ನೀರ್ ಬರೊಂದುಂಡು. ಕರಿನ ರಡ್ಡ್ ದಿನೊಟು ನೀರ್‌ದ ಪೈಪ್‌‌ದ ಬೇಲೆ ಆವೊಂದಿಪ್ಪುನೆರ್ದಾವರ ಕುಡ್ಲ ಭಾಗೊಡು ನೀರ್ ಪೂರೈಕೆ ಕಡೆಸ್ಸೊಂದುಂಡು. ಇಲಾಖೆದ ಪ್ರಕಾರ ಮೂಲ್ಕಿದ ಮೂಜಿ ಶಾಲೆಲೆಗ್, ವಿಟ್ಲದ ಒಂಜಿ ಶಾಲೆಗ್ ವಾರಗೊರ ನೀರ್ ಪೂರೈಕೆ ಆವೊಂದುಂಡು ಪಂದ್ ವರದಿಯಾತ್ಂಡ್. ಉ್ಂದೆರ್ದಾವರ ಜೋಕುಲೆಗ್ ಮಸ್ತ್ ಸಮಸ್ಯೆಲಾವೊಂದುಲ್ಲ.
ಅಂಚೆನೇ ಹಾಸ್ಟೆಲ್‌‌ಲೆಡ್ಲಾ ನೀರ್‌ಗ್ ಎತ್ವಾರ ಉಂಡಾತ್ಂಡ್. ಪ್ರಮುಖ ವಿದ್ಯಾಸಂಸ್ಥೆಡೊಂಜೆಟ್ ಒಂಜಿ ದಿನೊಟು 10ಟ್ಯಾಂಕರ್‌ ಮುಟ್ಟ ನೀರ್ ಪೂರೈಕೆ ಮಲ್ತ್‌ದ್, ಪರಿಸ್ಥಿತಿನ್ ಅಂಕೆಡ್ ದೀವೊಂದುಲ್ಲೆರ್ ಪಂದ್ ತೆರಿದ್‌ಬೈದ್ಂಡ್.