Last updated on June 7th, 2023 at 07:23 am
ಕುಡ್ಲ: ಪೆತ್ತೊಲೆನ್ ಕಸಾಯಿಕಾನೆಗ್ ಕೊನೊವೊಂದಿತ್ತಿನ ನಾಲ್ ಜನ ಶಂಕಿತೆರೆನ್ ಕೈದ್ ಮಲ್ದ ಪಂದ್ ಪೊಲೀಸೆರ್ ತೆರಿಪಾದೆರ್.
ಪೊಲೀಸೆರೆ ಪ್ರಕಾರ, ನಾಲ್ ಆರೋಪಿಲು ಐತಾರ ಅಂಬ್ಲಮೊಗೇರ್ ಗ್ರಾಮೊಡು ಒಂಜಿ ಪೊಂಜೊವುಡ ಪೆತ್ತೊಲೆನ್ ಕಾಸ್‌ಗ್ ಗೆತೊಂದೆರ್. ಬೊಕ್ಕ ಐಕುಲೆನ್ ಕೆರ್ಯೆರ ಉಳ್ಳಾಲ ತಾಲೂಕ್‌ದ ಅಲೇಕಲಕ್ ಮಿನಿ ಗೂಡ್ಸ್ ಗಾಡಿಡ್ ದಿಂಜವೊಂದು ಪೋವೊಂದಿತ್ತೆರ್.
ಆಂಡ ಪೋಪಿ ಸಾದಿಡ್ ಗಾಡಿ ಬಾಕಿ ಅತ್ಂಡ್. ಗಾಡಿಡಿತ್ತಿನ ಮೂಜಿ ಜನ ಜತ್ತ್‌ದ್ ಗಾಡಿನ್ ನೂಕೆರ ತೂವೊಂದುಪ್ಪುನಗ ಗ್ರಾಮಸ್ಥೆರ್ ಮೊಕಲೆಗ್ ಸಕಾಯ ಮನ್ಪೆರ ಬೈದೆರ್.
ಈ ಪೊರ್ತುಡು ಗಾಡಿದುಲಯಿ ಪೆತ್ತೊಲೆಗ್ ಟಾರ್ಪಲ್ ಪೊದೆಪಾದಿನೆನ್ ಗ್ರಾಮಸ್ಥೆರ್ ತೂತೆರ್. ಅನುಮಾನೊಡು ನಾಲ್ ಜನೊಟ ಕೇನ್ನಗ, ಅಕುಲು ಅಲ್ಪರ್ದ್ ಪದ್ರಾಡಾತೆರ್.
ಅಲ್ಪದಾರೆನ ಒರ್ಯನ ಒಯಿಲ್‌ದ ಪ್ರಕಾರ ಉಳ್ಳಾಲ ಪೊಲೀಸೆರ್ ಕರ್ನಾಟಕ ಗೋಹತ್ಯೆ ತಡೆ ಬೊಕ್ಕ ಜಾನುವಾರು ಸಂರಕ್ಷಣೆ ಕಾಯ್ದೆ-2020ದ ಅಡಿಟ್ ಪ್ರಕರಣ ದಾಖಲ್ತೊಂದು ನಾಲ್ ಜನೊನ್ಲಾ ಪತ್ತ್‌ದ್ ಕೈದ್ ಮಲ್ದೆರ್.
ಆರೋಪಿಲು ಅಹ್ಮದ್ ಇರ್ಷಾದ್, ಖಾಲಿದ್ ಬಿಎಂ, ಜಾಫರ್ ಸಾದಿಕ್ ಬೊಕ್ಕ ಫಯಾಜ್ ಪಂದ್ ತೆರಿದ್‌ಬೈದ್ಂಡ್. ಖಾಲಿದ್ ಕೇರಳೊದ ಕಾಸ್ರೋಡ್ ಜಿಲ್ಲೆದ ಬಂಗ್ರ ಮಂಜೇಶ್ವರದಾಯೆ ಆದಿತ್ತ್‌ದ್, ಬಾಕಿದಕುಲು ಉಳ್ಳಾಲದಕುಲಾದುಲ್ಲೆರ್.