Last updated on June 6th, 2023 at 09:44 am
ಕುಡ್ಲ: ಲೆಕ್ಸಾ ಲೈಟಿಂಗ್ಸ್ ಟೆಕ್ನಾಲಜೀಸ್ ಪ್ರೈವೇಟ್ ಲಿಮಿಟೆಡ್ ಬೊಕ್ಕ ಅಶೋಕನಗರ ಲಯನ್ಸ್ ಕ್ಲಬ್ ಆಶ್ರಯೊಡು ಡೈಜಿವರ್ಲ್ಡ್ ವಾಹಿನಿ ಎದುರು ಖನತಿನ ‘ಕಾಮಿಡಿ ರಾಜೆ 2’ ತುಳು ಸ್ಟ್ಯಾಂಡ್-ಅಪ್ ಕಾಮಿಡಿ ಶೋಡ್ ಮನೀಶ್ ಶೆಟ್ಟಿ ಸಿದ್ದಕಟ್ಟೆ ಗೆಂದ್‌ದೆರ್.
ಮನೀಶ್ ಶೆಟ್ಟಿ ಸಿದ್ದಕಟ್ಟೆ ಪಂತೊದೊಟ್ಟುಗು 50,000 ರೂ. ಪಣವುಲಾ ಗೆಂದಿಯೆರ್. ಕುಡ್ಲದ ತನುಷ್ ವಾಮಂಜೂರು ಸುರುತ ರನ್ನರ್ ಅಪ್, ಒಡಿಪುದ ಶಶಿರಾಜ್ ಆಚಾರ್ ರಡ್ಡನೇ ರನ್ನರ್ ಅಪ್ ಪ್ರಶಸ್ತಿ ಗೆಂದಿಯೆರ್. ವಿನ್ಯಾಸ್ ವಾಮಂಜೂರ್ ಬೊಕ್ಕ ಪ್ರಮೋದ್ ಕೃಷ್ಣಾಪುರ ನಾಲ್ ಬೊಊ ಐನನೇ ತಾನೊ ಪಡೆಯೊಂಡೆರ್.
ಲೆಕ್ಸಾ ಲೈಟಿಂಗ್ ಟೆಕ್ನಾಲಜೀಸ್ ಪ್ರೈ.ಲಿ.ನ ವ್ಯವಸ್ಥಾಪಕ ನಿರ್ದೇಶಕೆ ರೊನಾಲ್ಡ್ ಡಿಸೋಜಾ, ಅಶೋಕನಗರ, ಲಯನ್ಸ್ ಕ್ಲಬ್ ಗುರ್ಕಾರೆ ವಿಕ್ಟರ್ ಮೊರಾಸ್, ಡೈಜಿವರ್ಲ್ಡ್‌‌ದ ಸಂಸ್ಥಾಪಕೆ ವಾಲ್ಟರ್ ನಂದಳಿಕೆ, ಡೈಜಿವರ್ಲ್ಡ್‌‌ದ ಮಾರ್ಕೆಟಿಂಗ್ ಹೆಡ್ ಪ್ರವೀಣ್ ತೌರೊ, ಡೈಜಿವರ್ಲ್ಡ್‌‌ದ ಮಾನವ ಸಂಪನ್ಮೂಲ ನಿರ್ದೇಶಕೆ ರೊನಾಲ್ಡ್ ನಜರೆತ್, ಕಾಮಿಡಿ ರಾಜ್ 2 ಕಾರ್ಯಕ್ರಮೊದ ತೀರ್ಪುಗಾರೆರಾದ್ ಅರ್ಪಿತ್ ಇಂದ್ರವದನ್, ವಿಶೇಷ ತೀರ್ಪುಗಾರೆ ವಿಸ್ಮಯ ವಿನಾಯಕ್ ಬೊಊ ಕಾರ್ಯಕ್ರಮೊದ ನಿರೂಪಕೆ ಸಿಕೆ ಪ್ರಶಾಂತ್ ಒತ್ತುಪಾಲ್‌ಡಿತ್ತೆರ್.
ಸುರುತ ತಾನೊ ಗೆಂದಿನ ಮನೀಶ್ ಶೆಟ್ಟಿ ಪಾತೆರ್ದ್, ಕಾಮಿಡಿ ರಾಜೆ 2 ಕಾರ್ಯಕ್ರಮೊಗು ಅಜತ್ ಬತ್ತಿ ಬೊಕ್ಕ ಎಂಕ್ ಮಸ್ತ್ ಮಾನಾದಿಗೆ ತಿಕ್ಕೊಂದುಂಡು. ಎಂಕ್ ಅವಕಾಶ ಕೊರ್ನ ಡೈಜಿವರ್ಲ್ಡ್ ವಾಹಿನಿದ ಇಡೀ ಕೂಟೊಗು ಸೊಲ್ಮೆಲು ಪಂದ್ ಪಂಡೆರ್.
ವಾಲ್ಟರ್ ನಂದಳಿಕೆ ಪಾತೆರ್ದ್, ತುಳು ಮನರಂಜನಾ ಲೋಕೊಡು ಸ್ಟ್ಯಾಂಡ್-ಅಪ್ ಕಾಮಿಡಿ ಕಾರ್ಯಕ್ರಮೊ ಬಾರಿ ಪುದರ್ ಪೋತಿನ ಕಾರ್ಯಕ್ರಮೊಲೆಡ್ ಒಂಜಾದಿತ್ತ್‌ದ್, ಈ ಕಾರ್ಯಕ್ರಮೊರ್ದಾವರ ಪೊಸ ಪ್ರತಿಭೆಲ್ಲಾ ತಿಕ್ಕ್‌ದೆರ್. ಕರಾವಳಿ ಕರ್ನಾಟಕೊಡು ಮಸ್ತ್ ಪ್ರತಿಭೆಲುಲ್ಲ. ಬರ್ಪಿನ ದಿನೊಟು ನನಲಾತ್ ಮಹಿಳಾ ಪ್ರತಿಭೆಲು ಪಿದಯಿ ಬರೊಡು ಪಂದ್ ಪಂಡೆರ್.
ಸುಮಾರು 150 ಸ್ಪರ್ಧಿಲು ಆಡಿಷನ್‌ಡ್ ಪಾಲ್‌ಪಡೆದಿತ್ತೆರ್, ಪ್ರದರ್ಶನೊಡು ಸಿಂಗಲ್ ರೌಂಡ್, ಡಬಲ್ ಧಮಾಕಾ ರೌಂಡ್, ತ್ರಿಕೋನ ರೌಂಡ್ ಬೊಕ್ಕ ಪ್ರಾಪ್ಸ್ ರೌಂಡ್ ಸೇರ್ದ್ ನಾಲ್ ಸುತ್ತುಲೆನ್ ನಡಪಾದಿತ್ತೆರ್. ಉ್ಂದೆಟ್ ಪರಿಪೂರ್ಣ ಕಾಮಿಡಿ ಟೈಮಿಂಗ್ ಇತ್ತಿನ 10 ಜನೊನು ಸೆಮಿ-ಫೈನಲ್ ಸುತ್ತಿಗೆ ಅಜತಿತ್ತೆರ್. ಸ್ಟ್ಯಾಂಡ್-ಅಪ್ ಕಾಮಿಡಿ ರಿಯಾಲಿಟಿ ಶೋ ‘ಕಾಮಿಡಿ ರಾಜೆ 2’ ಡ್ ಐನ್ ತಿಂಗೊಲ್ದ ಪ್ರದರ್ಶನೊರ್ದು ಬೊಕ್ಕ ಐನ್ ಸ್ಪರ್ಧಿಲೆನ್ ಫೈನಲ್‌ಗ್ ಅಜತಿತ್ತೆರ್.
ಲೇಸ್‌ಡ್ ‘ಕಾಮಿಡಿ ರಾಜೇ 2’ ತಾಂತ್ರಿಕ ಕೂಟೊಗು ಮಾನಾದಿಗೆ ಮಲ್ತೆರ್.
ವಿಜೆ ಮಧುರಾಜ್ ಲೇಸ್ ಸುದಾರಿಕೆ ಮಲ್ತೆರ್.