ಮೂಡಾಯಿ ಮಟ್ಟಾರ್ ಬಬ್ಬರ್ಯ ಸಾನೊಗು ಕೆಸರ್‌ಕಲ್ಲ್ ಬೊಕ್ಕ ಪುಂಡಿ ಪನವು

Last updated on August 15th, 2023 at 06:41 pm

ಸುಮಾರು ಒಂಜರೆ ಕೋಟಿ ಕರ್ಚಿಡ್ ಜೀರ್ಣೋದ್ದಾರ ಆವೊಂದಿಪ್ಪುನ ಮೂಡಯಿ ಮಟ್ಟಾರ್ ಬಬ್ಬರ್ಯ ಸಾನ ಬೊಕ್ಕ ಪರಿವಾರ ಸಾನಿಧ್ಯೊಲೆನ ನವೀಕರಣ ಬೊಕ್ಕ ಪತ್ತೆರ್ ಸೇರ್ದ್ ಪ್ರಾರ್ಥನೆ, ಕೆಸರ್ ಕಲ್ಲ್, ಪುಂಡಿ ಪನವುದ ಲೇಸ್ ಜೂನ್ 19ಗು ಸಾನದ ಅಂಗನೊಡು ನಡತ್ಂಡ್. ಆಗಮ ಪಂಡಿತೆರಾಯಿನ ಕುತ್ಯಾರು ವೇದಮೂರ್ತಿ ಶ್ರೀಧರ್ ತಂತ್ರಿ ಮೆರೆನ ನೇತೃತ್ವಡ್ ಬೊಕ್ಕ ವಿಷ್ಣುಮೂರ್ತಿ ದೇವಲ್ಯದ ಪೆರಿಯ ಪೂಜರ್ಮೆದ ವೇದಮೂರ್ತಿ ರಘುಪತಿ ಗುಂಡುಭಟ್ ಧಾರ್ಮಿಕ ವಿಧಿ ವಿಧಾನೊಲೆನ್ ನಡಪಾಯೆರ್. ಮಟ್ಟಾರ್ ಆರ್ ಕೆ ಕ್ರಷರ್ ದ ಧನಿ ಉದ್ಯಮಿ ದಿವಾಕರ್ ಶೆಟ್ಟಿ ಮೇರ್ ಕೆಸರ್ ಕಲ್ಲ್ ಪಾಡಿಯೆರ್. ಬೊಕ್ಕ ನಡತಿನ ಕಜ್ಜಕೂಟೊಡು ಗುರ್ಕಾರ್ಮೆ ವಯಿಸೊನಿನ ಕಾಪು ಶಾಸಕೆ ಗುರ್ಮೆ ಸುರೇಶ್ ಶೆಟ್ಟಿ ಪಾತೆರ್ದ್ ಕುಟುಮದ ಬೇರು ಗಟ್ಟಿಯಾವೊಡು ಊರ್ದ ಸಮ್ಮಂದ ಗಟ್ಟಿಯಾವೊಡು ಪನ್ಪಿ ಉದ್ದೇಸೊಡು ತುಳುನಾಡ್ ದ ಸಂಸ್ಕೃತಿದ ದೈವ ದೇವಸ್ಥಾನೊಲೆನ್ ನಮ್ಮ ಪೆರಿಯಾಕ್ಲು ಬುಡ್ದ್ ಪೋತಿನ ವ್ಯವಸ್ಥೆಯಾದುಂಡು, ಅಂಚೆನೆ ಬಬ್ಬರ್ಯನ ಸೇವೆ ಮಲ್ಪುನ ಅತ್ಯಾಪೂರ್ವ ಸಂದರಪ್ಪು ಕೈಗೂಡಿನವು ಗ್ರಾಮದಕುಲು, ಊರುದ ಪತ್ತೇರ್ ಗೋಡಿದ್ ಮಲ್ಪುನ ಜೀರ್ಣೋದ್ಧಾರ ಕಜ್ಜೊಗು ಸರಕಾರ ಬೆರಿಬಲ ಕೊರ್ಜಿಡ ಎನ್ನ ಕೈಟಾಪಿನ ಸಹಕಾರ ಕೊರ್ಪೆ ಪನ್ದ್ ತೆರಿಪಾಯೆರ್.

ಲೇಸ್ ದ ಬಿನ್ನೆರಾದಿತ್ತಿನ ಶಿರ್ವ ಗ್ರಾಮಾ ಪಂಚಾಯತ್ ಗುರ್ಕಾರೆ ರತನ್ ಕುಮಾರ್ ಶೆಟ್ಟಿ, ಜೀರ್ಣೋದ್ದಾರ ಸಮಿತಿದ ಗುರ್ಕಾರೆ ಶಿರ್ವ ನಡಿಬೆಟ್ಟು ನಿತ್ಯಾನಂದ ಹೆಗ್ಡೆ, ಸಮಿತಿದ ಕಾರ್ಯಂತೆರ್ ಮಟ್ಟಾರು ರತ್ನಾಕರ ಹೆಗ್ಡೆ, ಶಿರ್ವ ವ್ಯವಸಾಯನಿಕ ಸಹಕಾರಿ ಸಂಘದ ಗುರ್ಕಾರೆ ಕುತ್ಯಾರು ಪ್ರಸಾದ್ ಶೆಟ್ಟಿ, ಶಿರ್ವ ವಿಷ್ಣುಮೂರ್ತಿ ದೇವಲ್ಯದ ಪೆರಿಯ ಪೂಜರ್ಮೆದ ವೇದಮೂರ್ತಿ ರಘು ಭಟ್ ಪಾತೆರಿಯೆರ್.ಸಾನದ ಮುಕೇಸ್ತರೆರಾಯಿನ ಭಗವಾನ್ ದಾಸ್ ಶೆಟ್ಟಿ, ಗುರುರಾಜ್ ಭಟ್, ಬಬ್ಬರ್ಯ ಸಮಿತಿ ಗುರ್ಕಾರೆ ಜಗದೀಶ್ ಶೆಟ್ಟಿ, ಉದ್ಯಮಿ ವಿವೇಕ್ ಆಚಾರ್ಯ ಮಿತ್ತರ್ಮೆಡಿತ್ತೆರ್.ಮಾಜಿ ತಾಲೂಕು ಪಂಚಾಯತ್ ಪದುಕೆರಾಯಿನ ಇಗ್ನೇಶಿಯಶ್ ಡಿಸೋಜ್, ಧರ್ಮಟ್ಟು ಶಂಕರ್ ಶೆಟ್ಟಿ, ಮಟ್ಟಾರ್ ಶೈಲೇಶ್ ಹೆಗ್ಡೆ, ಬಲ್ಲಾಡಿಗುತ್ತು ವಸಂತ್ ಶೆಟ್ಟಿ, ಜೀರ್ಣೋದ್ಧಾರ ಸಮಿತಿದ ಕಾರ್ಯಂತೆರಾಯಿನ ಹರೀಶ್ ಪೂಜಾರಿ ಬೊಕ್ಕ ಪದುಕೆರ್, ಜಾಗೆಜಾಗೆದಕುಲು, ಗ್ರಾಮಸ್ಥೆರ್, ಭಕ್ತೆರ್ ಇತ್ತೆರ್. ಮಂಜುನಾಥ ಆಚಾರ್ಯ ಲೇಸ್ ನಡಪಾದ್ ಸೊಲ್ಮೆ ಸಂದಾಯೆರ್. ಬೊಕ್ಕ ಪುಂಡಿ ಪನವು ಕಜ್ಜ ಮಲ್ತ್ ,ಕರಿದ್ ಲೇಸ್ ಡ್ ಪೊಸ ಶಾಸಕೆರೆಗ್ ಮೂಡಾಯಿ ಸಾನೊರ್ದು ಅಂಚೆನೆ ಗ್ರಾಮಸ್ಥೆರೆದ್ದ್ ಅಭಿನಂದನ ಕಜ್ಜ ನಡತ್ಂಡ್.