Last updated on August 15th, 2023 at 06:44 pm
ಪೇಜಾವರ ಮಠೊತ ಶ್ರೀ ವಿಶ್ವಪ್ರಸನ್ನತೀರ್ಥ ಶ್ರೀಪಾದೆರ್ ಸುಮಾರ್ 40 ಫೀಟ್ ಗಂತ್‌ದ ಗೂವೆಲ್‌ಗ್ ಜತ್ತ್‌ದ್ ಪುಚ್ಚೆನ್ ಬದ್‌ಕಾಯಿನ ನಡಕೆ ಐತಾರ ನಡತ್‌ದ್ಂಡ್.
ಸ್ವಾಮಿಲು ಚೆನ್ನೈ‌ರ್ದ್ ಮುಚ್ಲುಕೋಡು ದೇಲಂತಡೆಗ್ ಮಧ್ಯಾಹ್ನ ಬತ್ತಿತ್ತೆರ್. ಅಪಗ ದೇಲಂತಡೆದ ಗೂವೆಲ್‌ಗ್ ಒಂಜಿ ಪುಚ್ಚೆ ಬೂರ್ದಿನೆನ್ ಅಲ್ತ ಸಿಬ್ಬಂದಿಲು ತೆರಿಪಾದೆರ್.
ಸ್ವಾಮಿಲು ಅಪಗನ ಗೂವೆಲ್‌ದಂಚಿ ಪೋದು ಬಾಲ್ದಿ ಜಪುಡಾದ್ ಗೂವೆಲ್‌ದ ಚಡಿಟ್ ತಿಕಲೊಂದಿನ ಪುಚ್ಚೆನ್ ಬಾಲ್ದಿದ ಉಲಯಿ ಬರ್ಪಿಲೆಕ ಮನ್ಪೆರ ಪುಣೆತೆರ್. ಅವು ಎನ್ನಿಲೆಕ ಆವಂದಿನೆರ್ದಾವರ, ಪಾಡಿ ಕಾವೆಕುಂಟುನೇ ಗಟ್ಟಿ ಸೊಂಟೊಗು ಕಟ್ಟೊಂದು ಸುಮಾರ್ ಐನ್ ಫೀಟ್ ಅಗೆಲದ ಗೂವೆಲ್‌ಗ್ ಬಲ್ಲ್‌ದ ಸಕಾಯೊಡು ಜತ್ತ್‌ದೆರ್. ಒಂತಿ ಗಂತ್‌ನ್ ಬಲ್ಲ್‌ದ ಸಕಾಯೊಡುಜತ್ತ್‌ದ್ ಒರಿನ ಗಂತ್‌ಗ್ ಚಡಿಕ್ ಅಂಚಿಂಚಿ ಕೈ ಕಾರ್‌ದ ತಾಂಗ್ ಕೊರ್ದು ಜತ್ತ್‌ದೆರ್. ಪುಚ್ಚೆನ್ ಪತ್ತ್‌ದ್ ಬಾಲ್ದಿಗ್ ಪಾಡ್‌ದ್ ಮಿತ್ತ್ ಒಯ್ಪೆರ ಪಂಡೆರ್. ಆಂಡ ಬಾಲ್ದಿ ಮಿತ್ತ್ ಬತ್ತಿಲೆಕನೆ ಪುಚ್ಚೆ ಪೋಡಿದ್ ಪಿರ ಪಿದಯಿ ಲಾಗಿದ್ ಕುಡೊಂಜಿ ಚಡಿಟ್ ಕುಲ್ದುಂಡು. ಜತ್ತಿಲೆಕನೆ ಮಿತ್ತ್ ಬರ್ತಿನ ಸ್ವಾಮಿಲು ಮಿತ್ತ್‌ರ್ದ್ ಕೈಕುಂಟೊಂಜೆನ್ ಕೊರ್ಯೆರ ಪಂಡ್‌ದ್ ಪುಚ್ಚೆದ ನಾಲಿಡ್ ಪತ್ತ್‌ದ್ ಪಿರ ಬಾಲ್ದಿಗ್ ಪಾಡ್ರ ತೂತೆರ್. ಆಂಡ ಅವ್ವು ಸಮ ಆವಂದೆ ಇತ್ತಿನಗ ಒಂಜಿ ಕೈಟ್ ಪುಚ್ಚೆ ಒಂಜಿ ಕೈಟ್ ತಾಂಗ್ ಕೊರೊಂದು ಮೆಲ್ಲ ಮಿತ್ತ್ ಮಿತ್ತ್ ಬತ್ತೆರ್. ಮಿತ್ತ್ ಬರ್ತೆರ ನನ ಒಂತೆ ಉಂಡೂಂದಿಪ್ಪುನಗ ಪುಚ್ಚೆನ್ ಮಿತ್ತ್ ದಕ್ಕ್‌ದೆರ್. ಪೋಡಿದ್ ಪೋದಿತ್ತಿನ ಪುಚ್ಚೆ ಒಂಜೇಬರ ಬಲ್ತ್ ಪೋತುಂಡು
ಸ್ವಾಮಿಲು ಮಾತ್ರ ದಾಲ ಆವಂದಿಲೆಕ ಒಡಿಪು ಪೇಜಾವರ ಮಠೊಕು ಪೂಜೆಗ್ ಪೋಯೆರ್. ಕಾಂಡೆ ಚೆನ್ನೈ ಮಠೊಟು ಪೂಜೆ ಕರಿತ್‌ದ್ ಬಜಿ ಬಂಜಿಡ್ ಒಡಿಪುಗು ಬತ್ತಿತ್ತೆರ್. ಒಡಿಪುಡು ಬಯ್ಯಟ್ ಜ್ಯೋತಿಃಶಾಸ್ತ್ರಜ್ಞೆರ್ ದಿ| ಬೈಲೂರ್ ಅನಂತಪದ್ಮನಾಭ ತಂತಿರ್ಲೆನ ಜನ್ಮಶತಮಾನೋತ್ಸವಡ್ ಪಾಲ್‌ಗತೊಂದು ರಾತ್ರೆ ಪಿರ ಚೆನ್ನೈಗ್ ಪೋತೆರ್.
ಇಂಚಿಪ್ಪೊಗು ನೀಲಾವರ ಗೋಶಾಲೆದಲ್ಪ ನೇಲ್ಯ ಪೆಲತಮರಕ್ ಬರ್ತ್‌ದ್ ಸ್ವಾಮಿಲು ಸುದ್ದಿಯಾದಿತ್ತೆರ್.