Last updated on June 16th, 2023 at 09:16 am
ರಾಷ್ಟ್ರಮಟ್ಟೊಡು ಮಲ್ಲ ಸುದ್ದಿಯಾದಿತ್ತಿನ ಕುಡುಮದ ಕಾಲೇಜ್ ವಿದ್ಯಾರ್ಥಿನಿ ಸೌಜನ್ಯ (17) ಪನ್ಪಿನ ಪೊಣ್ಣನ್ ಅತ್ಯಾಚಾರ ಮಲ್ತ್ ಕೆರ್ತಿನ ಪ್ರಕರಣೊದ ತೀರ್ಪು 11 ವರ್ಸ ಕರಿದ್, ಇನಿ ಬೆಂಗ್ಳೂರ್ ಸಿಬಿಐ ವಿಶೇಷ ಕೋರ್ಟ್‌ರ್ದ್ ಪ್ರಕಟ ಆವರೆ ಉಂಡು.
ಕುಡುಮ ಗ್ರಾಮೊದ ಪಾಂಗಾಳ ನಿವಾಸಿ ಚಂದಪ್ಪ ಗೌಡೆರ್ ಬೊಕ್ಕ ಕುಸುಮಾವತಿ ದಂಪತಿಲೆನ ಮಗಲ್ ಸೌಜನ್ಯ ಕೊಲೆ ಪ್ರಕರಣೊದ ತೀರ್ಪುನು ಸಿಬಿಐ ವಿಶೇಷ ನ್ಯಾಯಂತಡೆ ಇನಿ ಪ್ರಕಟ ಮನ್ಪರೆ ಉಂಡು.
ಉಜಿರೆದ ಎಸ್‌ಡಿಎಂ ಕಾಲೇಜ್ ವಿದ್ಯಾರ್ಥಿನಿಯಾದಿತ್ತಿನ ಸೌಜನ್ಯ, 2012ತ ಅಕ್ಟೋಬರ್ 9ಗ್ ಬಯ್ಯಡ್ ಕಾಲೇಜ್‌ರ್ದ್ ಇಲ್ಲಗ್ ಪಿರ ಪೋನಗ ನಾಪತ್ತೆಯಾದಿತ್ತೆರ್. ಮನದಾನಿ ರಾತ್ರೆ ಕುಡುಮದ ಮಣ್ಣಸಂಕದಲ್ಪ ಪೊಣ್ಮನ ಪುಣ ತಿಕ್ಕ್‌ದಿತ್ತ್ಂಡ್.
ಬೊಲ್ತೇರ್ ಪೊಲೀಸ್ ಸ್ಟೇಷನ್‌ಡ್ ಅತ್ಯಾಚಾರ ಬೊಕ್ಕ ಕೊಲೆ ಪ್ರಕರಣ ದಾಕಲಾದಿತ್ತ್ಂಡ್.
ಶಂಕಿತ ಆರೋಪಿ, ಕಾರ್ಲ ತಾಲೂಕ್‌ದ ಕುಕ್ಕುಂದೂರು ಗ್ರಾಮೊದ ನಿವಾಸಿ ಸಂತೋಷ್ ರಾವ್ ಕುಡುಮದ ಬಾಹುಬಲಿ ಗುಡ್ಡೆದಲ್ಪ ಸಾರ್ವಜನಿಕೆರೆ ಕೈಗ್ ತಿಕ್ಕ್‌ದ್‌ಬೂರ್ದ್, ಬೊಕ್ಕ ಆಯನ್ ಪೊಲೀಸೆರೆ ವಶೊಕು ಕೊರ್ದಿತ್ತ್ಂಡ್.
ಪೊಲೀಸೆರ್ ಆಯನ್ ಕೈದ್ ಮಲ್ತ್‌ದ್ ಪ್ರಕರಣೊನು ಸಿಐಡಿಗ್ ಕೊರ್ದಿತ್ತೆರ್. ಸಂತೋಷ್ ರಾವ್ ಸುಮಾರ್ ಆಜಿ ಸರ್ತಿ ಸಿಬಿಐ ನ್ಯಾಯಂತಡೆಗ್ ಬರಂದೆ, ದೆಂಗ್ ತಪ್ಪಾವೊಂದಿತ್ತೆ.
ಪ್ರಕರಣ ನಡತ್‌ದ್ 11 ವರ್ಸ ಕರಿಯೊಂದು ಬರೊಂದಿತ್ತಿಲೆಕನೇ ಜೂನ್ 16 ಕ್ ಈ ಪ್ರಕರಣೊದ ತೀರ್ಪು ಪ್ರಕಟ ಆವೊಂದುಂಡು. ಇಂಚಾದ್ ಈ ಪ್ರಕರಣೊದ ತೀರ್ಪುನು ಜನೊಕುಲು ಬಾರಿ ಸೋದ್ಯೊಡು ಕಾತೊಂದುಲ್ಲೆರ್.