ಅನ್ನ ಭಾಗ್ಯ ಯೋಜನೆ: ಅರಿತ ಪಗತೆಗ್ ಕಾಸ್ ಕೊರ್ಯೆರ ರಾಜ್ಯ ಸರ್ಕಾರೊದ ನಿರ್ಧಾರ

Last updated on August 15th, 2023 at 06:40 pm

ಅನ್ನ ಭಾಗ್ಯ ಯೋಜನೆದಡಿಟ್ ಪ್ರತಿಯೊರಿಯಗ್ ಕೊರೊಡೂಂದುಪ್ಪುನ ಅರಿತ ಪಗತೆಗ್ ಕಾಸ್ ಕೊರ್ಪುನ ಪಂಡ್‌ದ್ ರಾಜ್ಯ ಸರ್ಕಾರ ಮಲ್ಲ ತೀರ್ಮಾನ ಗೆತೊಂದುಂಡು. ಇನಿ (ಜೂ. 28) ವಿಧಾನಸೌಧೊಡು ಮುಖ್ಯಮಂತ್ರಿ ಸಿದ್ದರಾಮಯ್ಯೆರೆನ ಗುರ್ಕಾರ್ಮೆಡ್ ನಡತಿನ ರಾಜ್ಯ ಸಚಿವ ಸಂಪುಟ ಇನಯೊಡು ಈ ಬಗ್ಗೆ ನಿರ್ಧಾರ ಗೆತೊಂದೆರ್. ಜುಲೈ 1ರ್ದೇ ಫಲಾನುಭವಿಲೆನ (ಬಿಪಿಎಲ್ ಕಾರ್ಡ್‌ದಾರೆರೆನ) ಬ್ಯಾಂಕ್ ಅಕೌಂಟ್‌ಗ್ ಕಾಸ್ ಪಾಡುನ ಪಂದ್ ತೀರ್ಮಾನ ಆತ್ಂಡ್.

ಸಂಪುಟ ಸಭೆ ಆಯಿನೇ ಸುದ್ದಿಗೋಷ್ಠಿಡ್ ಪಾತೆರ್ನ ಆಹಾರ ಸಚಿವೆ ಕೆ.ಎಚ್. ಮುನಿಯಪ್ಪೆರ್ ಈ ವಿಚಾರ ತೆರಿಪಾಯೆರ್. ಸದ್ಯೊಗು ಅರಿಕ್ ಕುಂದೆಲಾತಿನೆರ್ದಾವರ ಕಾಸ್ ಕೊರೊಂದುಲ್ಲ. ಒಂಜಿ ಕೆಜಿ ಅರಿಕ್ 34 ರೂಪಾಯಿ ಗೊತ್ತುಮಲ್ತ್‌ದ, ಪ್ರತಿ ಕುಟುಮೊಗ್ಲಾ ಕೊರೊಡೂಂದಿತ್ತಿ ಅರಿತ ಪಗತೆಗ್ ಕಾಸ್ ಕೊರ್ಪ ಪಂದ್ ಪಂಡೆರ್.

ಈ ಯೋಜನೆ ಬಿಪಿಎಲ್ ಕಾರ್ಡ್‌ದಕಲೆಗ್ ಮಾತ್ರ ಅನ್ವಯ ಆಪುಂಡು. ಪ್ರತಿ ಒರಿಯಗ್ 5 ಕೆಜಿ ಅರಿ ನಿಗದಿಮಲ್ದ್ಂಡ್, ಆ ಪ್ರಕಾರ ಪ್ರತಿ ಕೆಜಿ ಅರಿಕ್ 34 ರೂ. ದ ಲೆಕ ಪ್ರತಿ ಒರಿಯಗ್ 170 ರೂ. ಕೊರ್ಪುನ ತೀರ್ಮಾನ ಆತ್ಂಡ್. ಜು. 1ರ್ದೇ ಫಲಾನುಭವಿಲೆಗ್ ಈ ಕಾಸ್ ಎತ್ತುಂಡು ಪಂದ್ ಆರ್ ಪಂಡೆರ್.

ರಾಜ್ಯ ಸರ್ಕಾರೊದ ಯೋಜನೆದಡಿಟ್ ಮಾತ್ರ ಕಾಸ್
ಕೇಂದ್ರ ಸರ್ಕಾರೊದ ಅರಿ ಬುಡ್ದ್ ರಾಜ್ಯ ಸರ್ಕಾರ ಕೊರ್ಯೆರ ಇತ್ತಿನ ದರ್ಮೊದ ಅರಿತ ಯೋಜನೆತ ಪಗತೆಗ್ ಮಾತ್ರ ಲೆಕ್ಕಾಚಾರ ಅನ್ವಯ ಆಪುಂಡು. ಕೇಂದ್ರ ಸರ್ಕಾರೊದ ಯೋಜನೆದಡಿಟ್ ಬತ್ತಿನ ಅರಿ ಅಂಚೆನೇ ಜನೊಕ್ಲೆಗ್ ತಿಕ್ಕುಂಡು ಪಂದ್ ಸಚಿವೆರ್ ಪಂಡೆರ್.

ಏತ್ ಜನ ಇಪ್ಪುನ ಇಲ್ಲಗ್ ಏತ್ ಕಾಸ್ ತಿಕ್ಕುಂಡು?
ಒರಿ ಇಪ್ಪುನ ಇಲ್ಲಗ್ 5 ಕೆಜಿ, ರಡ್ಡ್ ಜನ ಇತ್ತಿನಡೆ 10 ಕೆಜಿ, ಐನ್ ಜನಕ್ 25 ಕೆಜಿ ಅರಿ ನಿಗದಿ ಆತ್ಂಡ್ ಪಂದ್ ಸಚಿವೆರ್ ವಿವರಿತೆರ್. ಆ ಲೆಕ್ಕೊಡು ಕೆಜಿ ಅರಿಕ್ 34 ರೂಪಾಯಿದಂಚ, 5 ಕೆಜಿ ಅರಿ ಕೊರ್ಪಿ ಇಲ್ಲಗ್ 170 ರೂ., 10 ಕೆಜಿ ಅರಿ ಕೊರ್ಪಿ ಇಲ್ಲಗ್ 340 ರೂ. ಅಂಚೆನೇ 25 ಕೆಜಿ ಅರಿ ಕೊರ್ಪಿ ಇಲ್ಲಗ್ 850 ರೂ. ಕೊರ್ಪ ಪಂದ್ ಸಚಿವೆರ್ ಪಂಡೆರ್.