Last updated on June 16th, 2023 at 08:01 pm
ಉಂದು ಬೆರ್ಮತೆತ್ತಿನ್ ತನ್ನ ಅಂಕೆಡ್ ದೀವೊಡು ಪನ್ಪುನ ಅಂಗಲಪ್ಪುಡು ನಮ್ಮ ದೇಸೊದ ಮಿತ್ತ್ ದಿಟ್ಟಿ ದೀದ್ ಪಜ್ಜೆ ಪಾಡೊಂದು ಬತ್ತಿನ ಉಗ್ರೆರ್ನ ಪುನೆಪುನ್ ಪೊಲ್ತಿನ ಪೊಲೀಸ್ ಒರಿಯನ ಪೊಲಬು. ಬೊಂಬಯಿಡ್ ಅಸಿಸ್ಟೆಂಟ್ ಸಬ್‌ಇನ್ಸ್‌ಪೆಕ್ಟರ್ ಆದ್ ಬೇಲೆ ಮಲ್ತೊಂತಿನ ತುಕಾರಾಮ್ ಓಂಬ್ಳೆ ಮುಪ್ಪತೊಂಜಿ ಓಡು ಎಡ್ಡೆಡ್ ಬೆಂದಿತ್ತೆರ್. ನಾಲ್ ಓಡು ಕರಿದ್ ಪೋತುಂಡ ಮೆರೆನ ಸರಕಾರಿ ಕಜ್ಜೊಗ್ಗು ಮುಗಿತಲದ ಚುಕ್ಕಿ ಬೂರ್ದು. ಓಂಬ್ಳೆ ಏಪೊಲ ಒರಿಯಾಗ್ ತೆಟ್ಟ್ ಬಯಕ್‌ದಿನಾರತ್ತ್, ಮಸೆತ್ತ್ ತೂತಿನಾರತ್ತ್, ನೆರ್ದ್ ಕೈದೆರ್ತಿನಾರತ್ತ್, ಒರಿಯನ ನುಪ್ಪುಗು ಕಲ್ಲ್ ಪಾರ್ದಿನಾರತ್ತ್, ಬಡವುದ ಗಂಜಿಗ್ ಪುಲಿ ಪೂಂಟುದಿನಾರತ್ತ್. ಮೆರೆಡ ಮಲ್ಲದಾಲ ಕೊಪ್ಪರಿಗೆ ಇತಿಜಿ. ಮೆರೆಡ ಇತ್ತಿನಿ ಮೆರೆನ್ ಮೋಕೆ ಮಲ್ಪುನ ಬುಡೆದಿ ಮೂಜಿ ಪೊನ್ನುಜೋಕುಲು ಬೊಕ್ಕ ಸರಕಾರ ಕೊರ್ತಿನ ಒಂಜಿ ಇಲ್ಲ್. ಇಂಚ ಮಾತಲ ಎಡ್ಡೆಡೇ ದುಂಪೋನಗ, ರಡ್ಡ್‌ಸಾರತ್ತ ಪತ್ತೊಂಜಿ ನವೆಂಬರ್ ಇರ್ವತ್ತಾಜೆಕ್ಕ್, ಪಗೆಮಾನಿ ಪಾಕಿಸ್ತಾನದ ಕಡಲ್‌ರ್ದ್ ನೂರೊಂದು ಬತ್ತಿನ ಉಗ್ರೆರ್ನ ಎಲ್ಯ ದಂಡ್ ಮುಕ್ಕಾಲ್ ಮೂಜಿ ಗಳಿಗೆಡ್ ಇಡೀ ಬೊಂಬಾಯಿನ್ ನಡ್ಗಾಯೆರ್-ಸಿರ್ಕಾಯೆರ್ ಅಲ್ಪ ಅಲ್ಪ ಬಾಂಬ್ ಪಾಡಿಯೆರ್, ಬೆಡಿ ಪತೊಂತು ಎಲ್ಲಿ-ಮಲ್ಲೆ ಆನ್-ಪೊನ್ನು ಪನ್ಪುನ ತರದಾಂತೆ ಮಾತೆರೆನ್ಲಾ ಕೆರ್ರೆ ಸುರು ಮಲ್ತೆರ್. ನೆಟ್ಟ್ ಒಂಜಿ ರಡ್ಡ್‌ಜನೊತ್ತ ಕೂಪೆ ನಾರಿಮನ್ ಆಸ್ಪತ್ರೆರ್ದ್ ಬೊಳ್ಳಿ ರಂಗ್‌ದ ಸ್ಕೋಡ ಕಾರ್ ಪತೊಂದು ಕುಡೊಂಜಿ ಕಡೆಟ್ಟ್ ನೆತ್ತೆರ್ದ ಓಕುಳಿ ಗೊಬ್ಬರೆ ಪಿದಡಿಯೆರ್.
ಬೊಲ್ಪುದಾಯೆ ಕಡಲ್ದುಲಯಿ ದೆಂಗ್‌ದ್ ಕುಲ್ದು ತಿಂಗೊಲ್ದಾಯೆ ಬಾನೊಡು ಮೀಂದೊಂತಿನ ಪೊರ್ತು. ಬೆಡಿತ್ತ ಸಬ್ದ ಕೇನಿನೆಕ್ಕ್ ಗಿರ್‌ಗಾವ್ ಚೌಪಾಟಿದ ಕಡಲಬರಿಟ್ಟ್ ಇತ್ತಿನ ಜನಕ್ಲೆನ್ ಅಲ್ಪರ್ದ್ ಲಕ್ಕಾವೊಂತಿನ ಪೊಲೀಸ್ ತೂಕರಾಮ್ ಓಂಬ್ಳೆ ಆನಿ ಬೇಲೆಗ್ ಬರಂದಿನ ಕುಡೊಂಜಿ ಪೊಲೀಸ್ದಾರ್ನ ಬೇಲೆನ್ ಮಲ್ತೊಂತೆರ್. ಆತಾನಗ ಅಲ್ಪದ ಪೆರಿಯಮಾರ್ಗೊಡು ಅಡ್ಡ ಕಟ್ಟೊಡು, ಬೊಳ್ಳಿರಂಗ್‌ದ ಸ್ಕೋಡ ಕಾರ್ ಬತ್ತ್ಂಡ ಅವೆನ್ ಉಂತಾವೊಡು ಪಂದ್ ಪೆರಿಯ ಪೊಲೀಸ್‌ದಕುಲು ತೆರಿಪಾಯೆರ್. ಒಂತೆ ಪೊರ್ತುಡೇ ಮಾರ್ಗಗ್ ಬ್ಯಾರಿಕೇಡ್‌ಲೆನ್ ಅಡ್ಡ ಕಟ್‌ದಿತ್ತೆರ್ ಪೊಲೀಸ್ ದಕುಲು ಬೆಡಿ ಪತೊಂದು ಉಗ್ರೆರೆನ್ ಪತ್ತರೆ ಉಂತುದಿತ್ತೆರ್, ಆಂಡ ಗಾಡಿ ಮಾತ್ರ ಉಂತಂದೆ ಎದುರು ತಾಂಟರೆ ಬನ್ನಗ ಗುಂಡು ರಾಪಾವೊಡೇ ಆಂಡ್. ಪತ್ತ್-ಪದ್‌ನೈನ್ ನಿಮಿಸರ್ದ್ ಬೊಕ್ಕ ಗುಂಡುಲು ರಾಪುನ ಉಂತ್ಂಡ್, ಕಾಲಿ ಕಡಲ್‌ದ ಸಿರೆಕುಲ್ನ ಸಬ್ದ ಮಾತ್ರ ಕೆಬಿಕ್ಕ್ ಬೂರೊಂತುಂಡು. ಆತ್ ಮನಿಪಂದೆ ಇತ್ತ್ಂಡ್ ಅಲ್ಪದ ಜಾಗೆ. ಪೆರಿಯ ಪೊಲೀಸ್ ಅಧಿಕಾರಿಲೇ ನರ್ಗ್‌ದ್ ಪಿರವುಂತುದಿತ್ತೆರ್, ಅಪಗ ಕೈಟ್ಟೊಂಜಿ ಪೊಲೀಸ್ ಲಾಠಿ ಪತೊಂದು ಐವತ್ತೊಂಜೋಡು ಪ್ರಾಯದ ತುಕಾರಾಮ್ ಓಂಬ್ಳೆ ಮೆಲ್ಲನೇ ಗಾಡಿ ದಂಜಿ ಪಜ್ಜೆ ಪಾಡಿಯೆರ್. ಗುಂಡುಲು ಗಾಡಿದ ಕುಪ್ಪಿನ್ ಪುಡತ್ತ್ ಉಗ್ರೆರ್ನ ತಿಗಲೆ ಸೇರ್ದಿತ್ತ್ಂಡ್, ಆಂಡ ಒರಿಮಾತ್ರ ಜೀವ ಪೋತಿನಂಚ ಜೆತ್ತಿತ್ತೆ, ಓಂಬ್ಳೆ ಕೈತಲ್ ಬತ್ತಿನೇ AK-47ಡ್ ಗುಂಡು ರಾಪಾರೆ ಸುರು ಮಲ್ತೆ. ಕರ್ಬದುಡಲ್ದ ಓಂಬ್ಳೆ ಆಯನ್ ಗಟ್ಟಿ ಪತಿಯೆರ್ ಬಲ್ಪರೆ ಬುಡ್ಜೆರ್, ಆತಾನಗ ಪತ್ತ್ ಗುಂಡುಲು ಜೀವ ಸೇರ್ದಿತ್ತ್ಂಡ್, ಓಂಬ್ಳೆ ಕಾಯ ಬುರ್ದಿತ್ತೆರ್. ಅಲ್ಪ ಸೇರ್ದಿತ್ತಿನ ಪೊಲೀಸ್ ದಕುಲು ಆ ಉಗ್ರನ್ ಪತ್‌ದ್ ಪೆಟ್ಟ್ ಪಾಡರೆ ಸುರುಮಲ್ತೆರ್. ಅಂದ್ ಅಜ್ಮಲ್ ಕಸಬ್‌ನ್ ಜೀವಪ್ಪ ಪತಿನ ಬೀರೆ ತುಕಾರಾಮ್ ಓಂಬ್ಳೆ. ಕೇಂದ್ರಸರಕಾರ ಮೆರೆಗ್ ಅಶೋಕ ಚಕ್ರ ಕೊರಿಯೆರ್. ಇಂಚ ದೇಸೊದ ಮಟ್ಟೆಲ್ಡ್ ಕಾಯ ಬುರ್ದು, ಪರತಿರಿಟ್ಟ್ ಚುಕ್ಕಿ ಆದ್ ಮೆನ್ಕೊಂದಿಪ್ಪುನ ಈ ಬಿರ್ದ್‌ದ ಪೊಲೀಸ್ ಅಧಿಕಾರಿ ತುಕಾರಾಮ್ ಓಂಬ್ಳೆನ ಬೀರನ್ ನೆನೆತೊಂದು ಅರೆಗ್ ನೆಂಪುದ ಪುರ್ಪ ಸಂದಾಗ.